All for Joomla All for Webmasters

ने.सं. ११३६ यंलागा अष्टमी

मलेशियाय् भकाभक नेपाःमि ज्वन

अवैध नेपाःमितय्त दूतावासया सम्पर्कय् वयेत आह्वान

वैदेशिक रोजगारीया लागिं नेपाःमितय् नं तसकं यःगु देय् मलेशियाय् अवैध रुपं च्वनाच्वंपिं धासें भकाभक नेपाःमितय्त ज्वनेगु शुरु याना हःगु दु । थःगु देशय् अवैध रुपं च्वनाच्वंपिं विदेशी नागरिकयात देश त्वःताः पिहां वनेगु लागिं नां दर्ता याः वा धकाः मलेशिया सरकारं वंगु फेब्रुअरी १५ निसें जुन महिनान्यंकंया ई बिउगु खः । उगु अवधिया दुने करिब १५०० म्ह नेपाःमितय्सं थःपिं अवैध रुपं च्वंच्वनागु खः धकाः स्वीकार यासें नां दर्ता याःगु दु ।

थःपिंसं बियागु थ्व ई तक नं नां दर्ता याः मवःपिं आप्रवासीतय्त धाःसा आः धमाधम ज्वनेगु शुरु याःगु खः । थ्व झ्वलय् वंगु प्यन्हुया दुने मलेशिया प्रहरीं १०० म्ह स्वयां अप्वः नेपाःमितय्त ज्वने धुंकूगु खँ अनया नेपाली राजदूतावासं धाःगु दु । अवैध रुपं च्वनाच्वंपिं नेपाःमितय्त नं ज्वनेगु शुरु यायेवं मलेशियाया निंतिं नेपाःया राजदूतावासं अवैध नेपाःमितय्त याकनं हे दूतावासय् सम्पर्क तः वा धकाः आह्वान याःगु दु ।

अथे सम्पर्क तः वल धाःसा मलेशिया सरकारपाखें याइगु दण्डपाखें बचे यानाः नेपाः लित छ्वया हयेगु व्यवस्था याये फइ धाःगु दु । थौंकन्हय् मलेशिया सरकारं नेपाःमि लगायत आप्रवासीत च्वनीगु जक्सन, ज्या याइगु थाय् व उमिगु डेराय् छापा मारे यानाः धरपकड शुरु यानाच्वंगु दु । थुकी ज्वन धाःसा दण्ड जरिवाना समेत पुइकाः स्वदेश लित छ्वयेगु ज्या जुइ ।

मलेशियाय् थौंकन्हय् करिब ४ लाख ८५ हजार नेपाःमित ज्या यानाच्वंगु तथ्यांक दु । उकी मध्ये द्वलंद्वः हे नेपाःमित अवैध रुपं ज्या यानाच्वंगु दु । अवैध आप्रवासीयात ज्वनाः लित छ्वयेगु शुरु जुइवं अज्याःपिं नेपाःमित उखेंथुखें सुलाः च्वनाच्वंगु खँ सीदुगु दु ।

कतार वनीपिं ह्वात्त हे कम

थौंकन्हय् वैदेशिक रोजगारीया लागिं नेपाःमितय् न्हापांगु गन्तव्य देय् जुयाच्वंगु कतार वनीपिं नेपाःमितय् ल्याः ७५ प्रतिशतं कम जूगु दु । कतारयात जःलाखःलाया मुस्मां देय्तय्सं नाकाबन्दी समेत तया बीवं अन ज्या याः वनीपिं नेपाःमि लगायत विश्वन्यंकंया ज्यामितय् ल्याखय् कमी वःगु खः ।

कतारय् थ्व समस्या पिहां वयेवं कतार वनीपिं नेपाःमित कम जूगु खः । थौंकन्हय् कतारया लागिं श्रम स्वीकृति काइपिं नेपाःमित तसकं कम जूगु खँ श्रम विभागं धाःगु दु । कतारय् समस्या पिहां वःसां अन च्वंपिं नेपाःमितय्त छुं समस्या धाःसा मदुगु खँ धाःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.