All for Joomla All for Webmasters

ने.सं. ११३६ यंलागा अष्टमी

नेपालभाषा परिषद्या थीथी सिरपाः लःल्हात

नेपालभाषा परिषदं दँय्दसं बिया वयाच्वंगु भाषाथुवाः उपाधि नापं थीथी सिरपाः म्हिगः प्रज्ञा भवनय् जूगु छगू समारोहया दथुइ लःल्हात । थुगुसी नेपालभाषाया प्रतिष्ठित ब्यक्तित्वतय्त बीगु भाषाथुवाः उपाधि खुगू दशक न्ह्यवंनिसें बाखं व उपन्यास विधाय् च्वसा न्ह्यानादीम्ह आख्यानकार मथुरा साय्मियात लःल्हाःगु खः । अथेहे परिषदं बीगु चित्तधर सिरपाः नेवाः अमेरिकन दबू सिकागोयात लःल्हात ।

नापं निबन्ध बिधाय् बीगु ठाकुरलाल सिरपाः इतिहासकार योगेन्द्रमान श्रेष्ठयात लःल्हात । मोतिलक्षी सिरपाः डा. रीना तुलाधरयात व पूर्णहिरा सिरपाः भाजु रोहिणीबहादुर कायस्थयात लःल्हात ।कविकेशरी चित्तधर हृदयया १११ दँ बुदिंया लसताय् नेपाल प्रज्ञा प्रतिष्ठान व नेपालभाषा परिषद्या मंकाः ग्वसालय् जूगु ज्याझ्वलय् मूपाहां प्रतिष्ठानया कुलपति गंगाप्रसाद उप्रेतिं उगु सिरपाः व सम्मान लःल्हानादीगु खः ।

मथुरा साय्मि खुगू दशक न्ह्यवंनिसें हे बाखं व उपन्यास लेखनय् संलग्न ब्यक्तित्व खः ।अथेहे नीन्याद्वः तकाया चित्तधर सिरपाः थुगुसी विदेशय् च्वनाः नं नेपालभाषाया सेवा यानाच्वंगु संस्था नेवाः अमेरिकन दबूयात लःल्हात खः । म्हतिं झिंन्याद्वः तकाया मोतिलक्ष्मी सिरपाः व ठाकुरलाल सिरपाः डा. रीना तुलाधर व योगेन्द्रमान श्रेष्ठयात लःल्हाःगु खःसा अन्वेषक रोहिणीबहादुर कायस्थयात बिउगु सिरपाः नीन्याद्वः तका दां व ताम्रपत्र सहितया खः ।

ज्याझ्वःया मूपाहां नेपाल प्रज्ञा प्रतिष्ठानया कुलपति गंगाप्रसाद उप्रेतिं निजीस्तरं जूसां देय्या महान ब्यक्तित्व चित्तधर हृदयया सम्मानय् जुइगु भावी गतिविधिया लागिं नं प्रज्ञा प्रतिष्ठानं ग्वाहालि यायेगु प्रतिवद्धता प्वंकादिल ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.