All for Joomla All for Webmasters

ने.सं. ११३६ यंलागा अष्टमी

नेवाः स्वाभिमान व पदीय दायित्व

स्थानीय तहया निर्वाचनं निर्वाचित जुया वःपिं पदाधिकारीत थौंकन्हय् छगू जोश व जाँगर ज्वनाः न्ह्यःने न्ह्याः वनाच्वंगु दु । अस्तब्यस्त येँ देय् व येँ देय् दुनेया व्यवस्थापन लगभग ध्वस्त हे जुइधुंकूगु दु । येँ देय् लगायत स्वनिगःयात सरकारी संयन्त्रं दुरु न्ह्याये जिउम्ह सा बाहेक मेगु महत्व बियातःगु खने मदु । हरेक थासय् केन्द्रिकृत जुयाच्वंगु अधिकारयात स्वायत्तकथं स्वाहायेका हयेगु हे नं छगू हाथ्या जुइगु खने दयाच्वंगु दु । 

येँ महानगरपालिका नेपाःया राजधानी जक मखु, थन दुने अनेक महत्वपूर्ण विधा, सम्पदात दु । छखेर आधुनिक विकासया नामय् अनेक आधुनिक भौतिक पूर्वाधार निमार्णया खँ दु मेखे थनया मौलिकता, परम्परा व नेवाः भावना जगेर्ना यायेमाःगु महत्वपूर्ण आयामत नं दु । थुमिगु दथुइ सन्तुलन हये मफुत धाःसा स्थानीय तहलय् निर्वाचित जुयावःपिं जनप्रतिनिधितय्गु मूल्य नं मदया वनीसा मेखेर आम नेवाःतय्सं थुपिंपाखें आशा यानातःगु फुक्क हे विश्वास नं झ्वाकलय् दुना वनी ।

तर आः तत्काल पिदनाच्वंगु छुं छुं समाचारं नवनिर्वाचित पदाधिकारीतपाखें आशावादी जुइ फइगु स्थिति आपालं दया वयाच्वंगु दु । येँ महानगरपालिकाया निर्वाचित पदाधिकारीतय्गु न्हापांगु मुँज्यां मेयर विद्यासुन्दर शाक्यं थःगु प्रतिवद्धताकथं नेपालभाषायात महानगरपालिका दुने थप आधिकारिक मान्यताया भाय्कथं महानगरय् छ्यलाबुलाय् हयेगु सैद्धान्तिक रुपं निर्णय यायेधुंकूगु दु ।

तर थुकिया कार्यान्वयन व कार्य सम्पादनया विषयय् धाःसा आपालं ज्या याये ल्यं दनि । मात्र बैठकया निर्णय यायेवं थुकिया प्रभावकारिता पूर्ण जूगु वाःचायेके फइ मखु । थुकिया कार्वान्वयनय् विशेष बी बीमाःगु खनेदु । मेगु च्वछायेबहःगु निर्णय धइगु येँ महानगरपालिका दुने वंगु तःभुखाचं पीडित जूपिंत सरकारं सुविधा स्वरुप बिउगु ट्याक्सी येँ महानगर दुने सञ्चालन याके फइ मखु धइगु सम्बन्धी खः ।

येँ महानगरपालिकाया सार्वजनिक यातायात सुविधाया निंतिं चिचीग्वःगु मोटरकारयात चीकाः उकिया थासय् ततःग्वःगु बस सञ्चालन यायेगु धकाः निर्णय याना तयेधुंकूगु सन्दर्भय् आः सरकारं हाकनं ट्याक्सी सञ्चालन यायेगु धकाः हयाच्वंगु प्रस्ताव वास्तवय् येँ महानगरपालिकाया अभियान अःखः जूगु दु । संविधान कथं हे स्थानीय तहया निर्वाचन जुयाः जनतां ल्ययातःपिं प्रतिनिधितपाखें स्थानीय सरकार अस्तित्वय् वयेधुंकाः आः केन्द्रीय सरकारं थःपिनिगु निर्णय क्वचिंकेगु ज्या याये फइ मखु ।

अज्याःगु ज्याया विरोध जुइ हे माःगु खःसा थुकिया विरोध येँ महानगरपालिकापाखें जुइधुंकूगु दु । नेपाःया थीथी जिल्लाय् भुखाचं पीडित जूपिंत सरकारं राहत सुविधा स्वरुप ट्याक्सी चले याकेगु धकाः बिउगु अनुमतियात च्वछायेमाः, तर थ्व फुक्कं ट्याक्सीया छ्यलाबुला येँ शहरय् जक जुइमाः धयागु खँ धाःसा जुइ मखु ।

स्वनिगः दुने आः हे यातायातया समस्या विकराल जुयाच्वंगु दुसा उकिया समाधानया निंतिं ततःग्वगु बस सञ्चालन जुइमाःगुमाःथाय् अन्यथा जुइगु धयागु हाकनं येँदेय्यात थप उत्पीडनय् यंकेगु बाहेक मेता जुइ मखु । येँदेय्या सतकय् आः हे ट्राफिक ब्यवस्थापन याये थाकुइधुंकूगु सन्दर्भय् थप ट्याक्सी सञ्चालन याकेगु धइगु पूवंक हे अदूरदर्शी व अविवेकी निर्णय खः धायेत लिफः स्वये माली मखु ।

मेगु, जनप्रतिनिधितय्सं येँया निवासीतय्त प्रत्यक्ष लिच्वः लाइगु स्थितियात पनेगु निंतिं जूगु हस्तक्षेप धयागु येँ १२ नं. वडाया नेशनल ट्रेडिंगया भवन व जग्गा बिक्री प्रकरण खः । येँ १२ वडाय् लानाच्वंगु नेशनल टे«डिङया ५२ रोपनी जग्गा नेपाल आयल निगमं न्यानाः अन इन्धन भण्डारण यायेया निंति पूर्वाधार निर्माण यायेगु खँ पिहां वःगु दु ।

नेशनल ट्रेडिङया जग्गा मियाः अनया कर्मचारीतय्त एकमुष्ठ तलब बियाः थुगु संस्थान हे बन्द याना छ्वेगु तयारी सरकारं यानाच्वंगु दु । नेशनल ट्रेडिंगया कर्मचारीतय्त तलब तकं नके मफयाः थःगु मातहतय् लानाच्वंगु जग्गा हे मियाः कर्मचारीतय्त पुलेमाःगु दां पुलेगु ग्वसाः सरकारं यानाच्वंगु दु । थ्व जग्गा मीगु कुतः सरकारं न्हापांनिसें हे याना वयाच्वंगु खः ।

छगू सरकारी निकायं मीगु अले मेगु सरकारी निकायं न्यायेगु धयागु आम जनताया मिखाय् धुलं छ्वाकेगु बाहेक मेता मखु । उकिं सरकारं अधिग्रहण यानाः कयातःगु जग्गा न्हापायापिं जग्गा धनीतय्त हे लित बीगु न्हापांगु प्राथमिकता जुइमाः धयागु सः नं पिदनाच्वंगु दु । राणा सरकारया इलंनिसें पंचायती शासन कालय् येँ लगायत स्वनिगःया आपालं बुँ सरकारं न्यून दामं दुकयाः थीथी प्रयोजनया निंतिं छ्यला वयाच्वंगु खः ।

तर सरकारं छ्यला वयाच्वंगु अज्याःगु जग्गा, बुँ निर्धारित प्रयोजनया निंतिं छ्यले मफयेवं सम्बन्धित जग्गा धनीतय्त हे प्रचलित जग्गाया दरभावं लित बीगु प्रावधान दयेमाःथाय् सरकारं अज्याःगु जग्गा थम्हं हे मियाः जग्गाया अनुचित फाइदा कायेगु कुतः यानाच्वंगु दु । नेपाल आयाल निगमं अनया जग्गाय् इन्धन भण्डारण यायेगु धयागु म्हो खतराया खँ मखु ।

सहरया दथुइ सधन वसोवास जुयाच्वंगु थासय् अज्याःगु प्रज्वलनशील सामाग्री भण्डारण यायेगु धयागु आम जनताया सुरक्षाय् हे खेलवाड यायेगु जुइ । न्हापा हे नं अज्याःगु प्रज्वलनशील सामाग्री मानव वस्ती स्वयां तापाक जुइमाः धयागु मान्यताय् थानकोटय् आयल निगमं अज्याःगु भण्डारण यायेगु याना वयाच्वंगु खः ।

मानववस्तीया दथुइ थुज्वःगु ग्यानापुगु निर्माण योजनापाखे सतर्क जुयाः सम्बन्धित वडा अध्यक्ष विकास डंगोलं जग्गाया खरीद बिक्रीया खँय् चिउताः तइगु स्वाभाविक हे खः । जनप्रतिधिनिया हैसियतं जनताया हित सुरक्षायात कयाः चिन्तन जुइ हे माः ।

मखुसा वडाया छम्ह सरकारी कर्मचारी व निर्वाचित प्रतिनिधिया हैसियतय् फरक हे छु खनेदइ ? येँदेय् व थनया निवासीतय्त प्रत्यक्ष लिच्वः लाकीगु योजनात आः नं आपालं पिदनी तिनि । अज्याःगु इलय् नं स्थानीय तहया निर्वाचित पदाधिकारीतय्सं चिउताः तयेमाःगु आःया आवश्यकता खः ।

 

Rate this item
(1 Vote)
Login to post comments
Go to top

Copyright © 2016  nepalbhasa.com. All rights reserved.