All for Joomla All for Webmasters

ने.सं. ११३६ यंलागा अष्टमी

येँया मतदाता दथुइ पवित्र स्वयां रञ्जु प्रिय

नोवेल शान्ति सिरपाः त्याकादीम्ह दक्षिण अफ्रिकी अधिकारकःमि देस्मन्ड टुटुं धयादी, ‘यदि अन्यायया इलय् छ तटस्थ च्वनेगु ज्या जूसा छं शोषकतय् पक्ष काःगु जुइ ।’ अफ्रिकाय् हाकुगु जातितय् विरुद्ध जुयाच्वंगु दमनया विरुद्ध वय्कलं धयादीगु थ्व धापू अफ्रिकाय् जक मखु विश्वन्यंकं शोषणय् लाःपिं जनताया निंतिं प्रेरणादायी जुया बिउगु दु ।

नेपालय् जुयाच्वंगु भाषिक, जातीय व सांस्कृतिक दमनया विरुद्ध न्ववायेमाः, उकिया विरुद्ध संघर्ष यायेमाः धइगु प्रेरणा देस्मन्ड टुटुपाखें कायेगु नं यानाच्वंगु दु । वर्तमान इलय् दक्षिण अफ्रिकी अधिकारकःमि टुटुया प्रेरणा कथं दमन, शोषण व एकल जातीय शासक विरुद्ध संघर्ष यायेमाः धइगु एजेण्डा ज्वनाच्वंगु पार्टीत खः संघीय समाजवादी फोरम व नयाँ शक्ति नेपाल ।

वंगु स्थानीय निर्वाचन इलय् निगू ज्वःलाःगु एजेण्डा ज्वनाच्वंगु फोरम व नयाँ शक्ति पार्टीं कार्यगत एकता यात । नेवाः लगायत उत्पीडित जनताया निंतिं सः थ्वयेकाच्वंम्ह पवित्र वज्राचार्ययात निगू पार्टीं मंकाः कथं येँया मेयर पदया निंतिं उम्मेदवार ल्यल । लिच्वः कथं पवित्र बज्राचार्य ६०५० मत हयाः खुगूगु थासय् लानादिल । वय्कः स्वयां न्ह्यःने एमाले, कांग्रेस व माओवादी जक मखु न्हूगु निगू पार्टीत विवेकशील नेपाली व साझा पार्टी नं खनेदत ।

न्ह्यसः वइ, उत्पीडन, दमन व शोषणया निंतिं ल्वायेगु पार्टी एजेण्डा दुसां पवित्र वज्राचार्य छाय् लिउने लात ? केवल विकासवादी एजेण्डा दुगु व राजनीतिक एजेण्डा हे स्पष्ट मजूगु न्हूगु पार्टीत गुकथं न्ह्यःने वल ? छाय् दमन व शोषणया इलय् सुम्क च्वनाः शोषक पक्ष काःगु पार्टीं पवित्र बज्राचार्यं स्वयां अप्वः मत हल ?न्ह्यसःत थन यक्व दु । झीसं उकिया लिसः मालेगु कुतः यायेमाःगु खनेदु ।

न्हापांगु चरणया चुनावी लिच्वः वयाः त्यानावःपिं पदाधिकारी–तय्सं ज्या शुरु यायेधुंकूगु दु । गुलिसिनं निगूगु चरणया चुनावया निंतिं तयारी नं यानाच्वंगु दु । येँय् जूगु चुनावी लिच्वः बुलुहुँ पुलां जुया वनाच्वंगु दु । तर लिच्वः पुलां जुल आः उकिया बारे छाय् चर्चा यानाच्वनेगु धकाः लिचिलेगु खःसा झीसं हानं दमन व शोषणया इलय् सुम्क च्वनाच्वंगु पार्टी व उकिया उम्मेदवारतय्त मेगु चुनावया निंतिं अग्रसर जुइगु छुट बियाच्वंगु जुइ ।

उकिं लिच्वः न्ह्याक्व पुलां जुइमा झीसं उकिया मूल्यांकन यानाः न्ह्याः वनेमाः । मूल्यांकन यायेगु ज्यापाखें लिचिलेगु जूसा राज्यपाखें दमनया विरुद्ध ल्वानाच्वंसां, पहिचानया निंतिं सः थ्वयेकाच्वंसां चुनावी लिच्वलय् तटस्थ च्वनाच्वंगु पार्टी हे न्ह्यःने लाःवनेफु । सुनां स्पष्ट रुपं शोषक वर्गयात हे फाइदाय् लाकी ।थुगुसीया न्हापांगु चरणया स्थानीय चुनाव उलि हे उत्साह व आशंकाया दथुइ जुल ।

नयाँ शक्ति पार्टी व संघीय समाजवादी फोरमं चुनावय् ब्वति काइगु खः वा मखु धकाः न्हापा आशंका जुल । लिपा हानं निगू पार्टी दथुइ कार्यगत एकता यानाः चुनावय् वनेगु व उम्मेदवार ल्ययेगु खँय् लिपांगु न्हि तक सहलह जुयाच्वन । पवित्र बज्राचार्यया नां नं उम्मेदवार मनोनयन यायेगु अन्तिम इलय् तिनि क्वःछिउगु जुल । छगू ल्याखं चुनावय् भचा लिउने लायेमाःगु छता कारण थ्वहे खत ।

मेखे नेवाःतय् भोट विभाजित जुयाः गैर नेवाः त्याइ धकाः पवित्र बज्रार्चायात वनीगु भोट विद्यासुन्दर शाक्ययात वंगु मेता कारण जुइफु । तर म्हो मत वःगु कारण थुली हे खः ला ? अथेमखुसा मेगु कारण छु ले ?येँ महानगरपालिकाया मेयरय् बिचाः मयाः कथं रञ्जु दर्शनां २३,४३९ मत हयाः स्वंगूगु थासय् लायेत सफल जुल । येँय् गैर नेवाःत अप्वः दुगु वडाय् रञ्जुया अप्वः मत वइ व कोर नेवाः ईलाकाय् पवित्र बज्राचार्ययात अप्वः मत वइगु अप्वःसिया अनुमान फ्लप जुल ।

नेवाःतय् कोर ईलाकाय् तकं रञ्जुया मत पवित्र स्वयां अप्वः वःगुलिं नं थ्वपाखे विश्लेषण यायेगु थप आवश्यकता जुया बिउगु दु । रञ्जुया भोट विशेष यानाः ल्याय्म्हतपाखें वःगु खनेदु । तर मात्र ल्याय्म्हतपाखें वःगु धाःसा मखु । येँया कोर ईलाकाय् च्वंपिं नेवाःत उकिसनं न्यय्दँ पुलेधुंकूपिंसं नं रञ्जुयात मतदान याःगु खनेदत । तर विशेष यानाः ल्याय्म्हतय् भोटया कारणं हे रञ्जुया मत अप्वः वःगु खत ।

जम्मा द्वःछि दुजः दुगु विवेकशीलं गुकथं उलिमछि मत हल ? अले समग्र नेवाःतय्गु थःगु हे मुद्दा ज्वनाच्वंम्ह पवित्र बज्राचार्यया मत छाय् रञ्जु स्वयां कम जुल, आः चर्चाया विषय थ्वहे खः । थुकियात दुवालाः स्वयेगु खःसा झीसं भाषाया निंतिं, जातिया निंतिं व पहिचानया निंतिं यानाच्वंगु आन्दोलनय् पुलांगु पुस्ता व न्हू पुस्ताया नेवाःत दथुइ तःधंगु ‘ग्याप’ जुयाच्वंगु खनेदु ।

झीसं न्ह्याकाच्वंगु अभियान मुक्कं पुलांगु तरिका जक जुयाच्वन, थुकिं यानाः न्हूगु पुस्तात अज्याःगु खँय् आकर्षित जुइ फयाच्वंगु मदु । मुद्दा व बिचाःया ल्याखं पवित्र बज्राचार्य यक्व न्ह्यःने लाः । तर पवित्र बज्राचार्ययात भोट मवगु धइगु आःया तत्कालिक लिच्वः जक मखु । झीसं न्ह्याकाच्वंगु आन्दोलन न्हापा स्वंगू प्यंगू दशक न्ह्यः यानाच्वंगु शैलीया जक निरन्तरता जुयाच्वन । उकिं यानाः न्हूगु पुस्ता प्रतिया आकर्षण म्हो जूगु खः ।

आःया आवश्यकता धइगु अज्याःपिं वर्गयात आकर्षण यायेगु तरिकाया तर्जुमा यानाः न्हून्हू कथंया ज्याझ्वः यायेगु खः । न्हूगु शैलीं मनूतय् चेतनाया स्तर थकायेगु व थुइकेगु खः । गुकी झी लिउने लाःगु खनेदु । साझा पार्टीपाखें येँया मेयर उम्मेदवार किशोर थापाया कथं राजनीतिइ भावना नापं ग्लेमर अप्वः चले जुइ ।

आः खनेदुगु लिच्वः नं वहे ग्लेमरया लिच्वः खत । ग्लेमर धइगु केवल मनूया लुक्सया जक खँ मखु । थन ग्लेमर धइगु न्हूगु प्रविधि, न्हूगु तरिका व आकर्षित यायेगु शैली खः । गनं झीगु आन्दोलनय् थज्याःगु हे न्हूगु ग्लेमरया कमी जुयाच्वंगु जकं मखुला ?

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.