All for Joomla All for Webmasters

ने.सं. ११३६ यंलागा अष्टमी

मेट्रो सिटी, बाह्य चक्रपथ व नेवाः

स्वनिगःया मूलवासी नेवाःत खः । नेवाःतय्सं दयेकातःगु स्वनिगःया कला, सम्पदा व संस्कृतिया कारणं नेपालं विश्वय् थःगु म्हसीका तयाच्वंगु दु । स्वनिगःया लागा अतिकं चिकूसां थन न्यागुलिं मल्याक विश्व सम्पदा धस्वानाच्वंगु दु । थनया कला, सम्पदा, संस्कृतिया जगेर्ना व संरक्षणय् विशेष ध्यान सरकारया वनेमाःगु खः ।

अझ उकिसनं वंगु दँय् ब्वःगु विनासकारी भुखाचं आपालं महत्वपूर्ण सम्पदा स्यंका बिल । थुकिया पुनर्निर्माणं गति अझं कायेफुगु मदुनि । थुज्वःगु गरिमामय सम्पदाया पुनर्निर्माणया निंतिं विदेशी दातृ राष्ट्रतय्सं नुगः चकंकाः ग्वाहालिया बचं बिल, तर उकिया कार्यान्वयन धाःसा जुइ फयाच्वंगु मदु ।

मेखे स्वनिगःयात हे विकासया नामय् अनेककथंया योजना, परियोजना पित हयाः थनया सम्पदा ल्यंकेगु स्वयां नष्ट यायेगुपाखे हे अप्वः केन्द्रित जुयाच्वंगु खनेदु । स्वनिगःया स्वरुप हिलाः विकासोन्मुख शहरत नीस्वनेगु खःसा अज्याःगु ज्यां थनया कला सम्पदा गुकथं संरक्षित जुइगु खः उकिया छुं नं कथंया खबर, योजना पिहां वयाच्वंगु खनेमदु । 

स्थानीय तहया निर्वाचनया क्रमय् येँ महानगरपालिकायात छगू विकसित शहर दयेकेगु, मोनोरेल, मेट्रोरेल आदि चले यायेगु खँ चुनावी मुद्दाकथं थीथी राजनीतिक पार्टीतय्सं न्ह्यःने हःगु खने दत । उकथं हे २०७४÷७५या वार्षिक बजेटय् स्वनिगःयात मेट्रो सिटी दयेकेगु निंतिं बजेत फ्यानातःगु नं खने दत ।
स्वनिगःया १८ गू नगरपालिकायात छथासं तयाः

काठमाडौं मेट्रो सिटी दयेकेगु निंतिं सरोकारवालातय्सं सरकारयात सुझाव बिउगु दु । येँया ११, यलया ३ व ख्वपया ४ नगरपालिका एकिकृत यानाः मेट्रो सिटी दयेकेमाःगु उमिगु बिचाः दु ।थ्वयां न्ह्यः स्थानीय तह पुनःसंरचना आयोगं नं काठमाडौं महानगरपालिका सहित स्वनिगःया एकिकृत विकासया निंतिं राजधानी मेट्रो सिटी दयेकेत सरकारयात सुझाव बिउगु खः ।

उगु हे सुझावया लिधंसाय् आः सरोकारवालातय्सं काठमाडौं राजधानीयात मेट्रो शहर दयेकेबलय् विकास निर्माणया ज्याय् अःपुइगु तर्क तया वयाच्वंगु दु । मेखेर बाहिरी चक्रपथ विकास आयोजनां न्हापांगु खण्डया ज्या न्ह्याकेगु तयारी पूवंके धुंकूगु दु । थुकिया निंतिं छुं ईया दुने हे स्वनिगःया १३,७६४ कित्ता जग्गा अधिग्रहण याइगु जूगु दु । थुकिया सुचं राजपत्रय् पिदनेधुंकूगु दु ।

न्हापांगु चरणकथं चोभारंनिसें सतुंगः तकया ब्वय् ६.६ किलोमिटर सडक दयेकेगु ज्या न्ह्याकेत्यंगु दु । बाहिरी चक्रपथ निर्माणया निंतिं ८,९५६ रोपनी जग्गा अधिग्रहण याइगु जुयाच्वंगु दु । थ्व चक्रपथ दयेकेगु निंतिं करिब २०० खा छेँ थुने मालीगु खँ नं न्ह्यःने वयाच्वंगु दु । सरकारया थुज्वःगु योजनां भौतिक पूर्वाधार व विकासया खँ स्थापित जुइ फइ ।

तर थनया आदिवासीतय्गु स्थिति छु जुइगु खः, थ्वपाखे धाःसा सरकार मौन जुयाच्वंगु दु । छेँबुँ विस्थापित जुइपिं गन वसोवास याः वनीगु खः, थुकिया योजना सार्वजनिक जूगु मदुनि । भौतिक पूर्वाधार, विकास निर्माण सकसिगुं चाहना जुयाच्वनी । विकास मयःपिं मनूत दइ मखु । तर विकासया नामय् छेँबुँ मदयेका च्वनेगु नं सुयां इच्छा जुयाच्वनी मखु ।

स्वनिगः दुने आःया समस्या धयागु सामान्य जीवन यापनया निंतिं मदयेक मगाःगु लः, धः, मत, लँया समस्या खः । थनया बाली पीगु बुँ धमाधम नाश जुया वनाच्वंगु कारणं वातावरण प्रदुषण धमाधम अप्वया वनाच्वंगु दु । थनया मेगु मू समस्या धयागु पिने जिल्लां थन बसोवास सरे जुया वइपिनिगु खः ।स्वनिगः राजधानी जूगुया हे कारणं थन अवसर व सुविधा अप्वः दयाच्वनीगु कारणं न्ह्याम्हं मनूत स्वनिगलय् बसोबास यायेत वयेगु याना वयाच्वंगु दु ।

आप्रवासनया कारणं हे थन शान्ति सुरक्षाय् हाथ्या ब्वलनाच्वंगु दु । आः हे नं चोरी, डकैटी, हत्या हिंसाया समाचार स्वयेबलय् उकिया पात्र स्वनिगःवासीत मखुसें पिनें वयाः स्वनिगलय् च्वनाच्वंपिं हे अप्वः जुइगु वास्तविकता जुयाच्वंगु दनि ।गामंनिसें छु छु म्हगस खंकाः स्वनिगलय् दुहां वइ । थन दुहां वयाः म्वाये फत धाःसा थनया कला, संस्कृति, सम्पदा, भाषायात मचायेक नष्ट याना यंकेगु ज्याय् भूमिका म्हिती ।

म्वाये मफुत धाःसा खुँ, लुच्चा, फटाहा वा डन जुयाः थनया शान्ति सुरक्षायात तप्यंक हाथ्या बीगु शुरु याइ । स्वनिगः उमिगु लागिं छगू अज्याःगु थाय् खः गन म्वायेगु लागिं न्ह्यागु याःसां जिउ । थ्व शहरप्रति उमिगु छुं हे जिम्मेवारी मदु । थज्याःपिं हे पिनें वःपिं मनूतय्सं दयेकीगु शहरी विकासया योजनां थौं स्वनिगःयात धमाधम ध्वस्त यायां यंकाच्वंगु खः । उकियात भिंक अःपु अवश्य नं मजू । तर मभिंकुसें नं मगाः ।

विकासया नामय् स्वनिगःया मौलिकता नष्ट जुयावंसां उमित चिउताः मदु । थौंकन्हय् जुयाच्वंगु व जुइगु धकाः चर्चाय् वयाच्वंगु विकासया ज्या नं फुक्क अज्याःगु हे खः । आः न्हू वःपिं स्थानीय निकायया जनप्रतिनिधितय्सं थुकियात गय् यानाः संशोधन याइगु खः, उकी विशेष ध्यान बीमाःगु आवश्यकता दु ।स्थानीय निकाय धइगु स्थानीय जनतां शासन याइगु प्रणाली खः ।

तर थौं देशय् स्थानीय निकायया चुनाव जुयाः स्थानीय जनतां ल्यःपिं स्थानीय जनप्रतिनिधित हे वयेधुंकाः वहे स्थानीय जनतां न्हापांनिसें विरोध याना वयाच्वंगु योजनात लागू यायेगु धकाः व्यापक रुपं खँ न्ह्यःने हयाच्वन ।थ्व स्थानीय जनतायात हाथ्या बिउगु खः लाकि मखु ? स्थानीय जनताया स्वीकारोक्ति मदयेक थ्व ज्या न्ह्यःने न्ह्याके दइ मखु । 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.