All for Joomla All for Webmasters

ने.सं. ११३६ यंलागा अष्टमी

नेपाली कांग्रेसं थुइके मफुगु नेवाः शक्ति

स्थानीय निर्वाचन अन्तर्गतया न्हापांगु चरणय् येँ महानगरपालिकाया निर्वाचन परिणाम पिदनाः नेकपा एमालेया उम्मेदवार विद्यासुन्दर शाक्यं मेयर पदभार नापं न्ह्याकेधुंकूगु दु । मेयर पदया मेम्ह सशक्त उम्मेदवार राजुराज जोशीं मतदानय् कुहां वःगु फुक्क मतया परिणाम पिदने न्ह्यः हे पराजय स्वीकार याःगु दु । थु्गु निर्वाचनय् नेकपा एमाले व नेपाली कांग्रेसया प्रत्यासीतय्गु दथुइ हे कडा प्रतिस्पर्धा जुइगु अनुमान यानातःगु खः ।

तर थुकिया दथुइ मेमेगु परम्परागत राजनीतिक पार्टीया उम्मेदवारत स्वयां न्हूगु राजनीतिक पार्टी विवेकशील पार्टीया उम्मेदवार रञ्जु दर्शनां हःगु मतं फुक्क हे राजनीतिक पार्टी व परिवेक्षकतय्त चकित याना बिउगु दु । थुगु निर्वाचनय् न्हूगु ख्वापालं न्हूगु लिच्वः पित हइगु अनुमान ला सकसिनं यानाच्वंगु खः तर थुलिमछि परिमाणया लिच्वः पिदनीगु आशा धाःसा म्हो हे जक मनूतय्सं याःगु खयेमाः ।

क्वचाःगु येँ महानगरपालिकाया मेयरया निर्वाचनय् परम्परागत राजनीतिक पार्टीया उम्मेदवारतय्गु दथुइ हे प्रतिस्पर्धा जुइगु खँय् मतदातातय्गु अनुमान सामान्यकथं हे जुयाच्वंगु खःसां नेपाली कांग्रेसया उम्मेदवार उलिमछि अन्तरं पराजित जूगुयात स्वयम् काठमाडौंया नेपाली कांग्रेसया नेता कार्यकर्तातय्सं अनुमान थ्यंकं मयाःगु मखु ।

स्वनिगः दुने बहुसंख्यक मतदाता नेवाःत हे जुयाच्वंगु कारणं नेपालमण्डल दुनेया ततःधंगु शहरय् थनया आदिवासी नेवाःतय्त हे प्रमुख पदय् उम्मेदवार दयेकेमाः धयागु मान्यता प्रायः फुक्क हे राजनीतिक पार्टीतय्सं यानाच्वंगु दु । उकथं हे उम्मेदवार नं घोषणा यायेगु यानाच्वंगु दु । थुकियात थनया आदिवासी नेवाःतय्सं राजनीतिक पार्टीतय्गु सद्भावकथं हे कयाः थःथःपिनिगु राजनीतिक आस्थाकथं मतदान यायेगु याना वयाच्वंगु खः ।

तर नेपाली कांग्रेसं थ्व बिचाःयात गबलें हे स्वीकार याःगु खने मंत । नेपाली कांग्रेसं सक्षम नेवाः उम्मेदवारत दःसांतबि उकियात अनादर याःगु कारणं हे आःया मेयर पदया निर्वाचनय् पराजय जूगु खँ पिदनाच्वंगु दु । आः तकया स्थानीय निर्वाचनय् सर्वमान्य नेता गणेशमान सिंहं ‘जिं कथि जक थंसां येँय् निर्वाचित जुइ’ धकाः छगू इलय् हरिबोल भट्टराईयात काठमाडौ प्रमुख व तीर्थराम डंगोलयात उपप्रमुखय् उम्मेदवारी बियाः निर्वाचनय् त्याकूगु खः ।

थुकियात नेपाली कांग्रेसं छम्ह नेवाः व छम्ह गैर नेवाःया उम्मेदवारी धकाः माने यानाच्वंगु खने दत । अनं लिपा जूगु स्थानीय निर्वाचनय् उकथं हे नेवाः व गैर नेवाःयात उम्मेदवार दयेकाः नेपाली कांग्रेसं पराजय फये माल । आःया स्थानीय निर्वाचनय् नं उकथं हे पलाः ल्ह्वनाः थनया आदिवासी नेवाःतय्गु आस्थायात कुठाराघात यानाः नेपाली कांग्रेसं मेयरया पद ल्हातं चुलुकेमाःगु स्थिति ब्वलंगु दु ।

नेपाली कांग्रेसया आःया मेयर पदया उम्मेदवारयात कयाः नेपाली कांग्रेसया सभासद् भिमसेनदास प्रधानं नं छगू अन्तर्वार्ताया माध्यमं थःपिनिगु असन्तुष्टि प्वंकेगु ज्या यानादीगु खः । निक्वःगु संविधानसभाय् बांलाःगु परिणाम हयेत ताःलाःगु थुगु पार्टीं आःया इलय् थुज्वःगु परिणाम फयेमाःगुया कारण नेपाली कांग्रेसया नेतातय्गु येँयात स्वयेगु दृष्टिदोष हे खः धकाः थुइकेमाःगु अवस्था दु । .

नेपाली कांग्रेस जातीय संघीयताया विरोधी खःसां थुकी जः जुयाच्वंपिं अधिकांश नेवाःत थःपिनिगु पहिचान दयेमाःगु खँय् विरोधी मखु । तर पार्टीया निर्देशन अःखः जुइगु कारणं उपिं सामान्यत मौन हे जुयाच्वंगु खः, तर उमिगु चाहना नं येँ महानगरया नेतृत्व थनया नेवाःतय्सं कायेमाः धयागु मौन स्वीकृति दुगु खः । तर पार्टी नेतृत्वं मेयर पदया निंतिं चर्चाय् वयाच्वंपिं पुलांम्ह सांसद व मन्त्री नं जुइधुंकूम्ह तीर्थराम डंगोल व नविन चित्रकारया नां अनुमोदन मयासें राजुराज जोशीया नां पित बीवं कांग्रेस कार्यकर्तातय्गु दुने उत्साह ब्वलने मफुगु खः ।

नेपाली कांग्रेस देय्या हे छगू तःधंगु राजनीतिक पार्टी खःसा उमिके नेपाःया मूलवासी नेवाः प्रति स्वयेगु दृष्टिकोणय् परिपक्वता वये मफुगु अनुमान याये फइ । नेपाली कांग्रेसया स्थापना कालय् स्वनिगःया बहुसंख्यक नेवाःत थुगु पार्टीपाखे सकारात्मक सोच तयाः न्ह्यानाच्वंपिं खः । थौं तक नं जिमि अबु बाज्यां नेपाली कांग्रेसयात समर्थन याःगुलिं जिपिं नं कांग्रेस हे खः धयागु सोचं कांगे्रस पक्षय् मतदान यानाच्वंपिं आपालं नेवाःत दनि ।

तर उमिगु भावना, सोच व सकारात्मकतायात नेपाली कांग्रेसया नेतातय्सं गबलें हे उपिं प्रति सकारात्मक भाव तयाः उमिगु भावनायात कदर यायेगु ज्या मयाः । थुकथंया साइलेन्ट भोटरर्सतय्सं थःपिंसं न्ह्यागु निर्णय याःसां उपिं विपरित जुइ मखु धयागु मान्यता तयाच्वंगु खनेदत । थुज्वःगु परिस्थितिइ वर्तमान चुनावय् नेपाली कांग्रेसया मेयरयात मतदान याःगु खने दत ।

आः क्वचाःगु स्थानीय तहया निर्वाचनय् नेपाली कांग्रेसया छम्ह सशक्त उम्मेदवार जुइम्ह व्यक्तित्व तीर्थराम डंगोल खः । वय्कः न्हापाया संसदीय निर्वाचन व स्थानीय निर्वाचनय् विजयी जुइत सफलम्ह प्रत्यासी खः । उकिसनं वय्कः नेवाः समुदाय दुने अतिकं लोकंह्वाःम्ह नेता कार्यकता नं खः । तीर्थराम डंगोलं नेवाः दुनेया बहुसंख्यक नेवाः ज्यापु जातिया प्रतिनिधित्व यानादी ।

आःया निर्वाचनय् येँ देय्या स्वीनिगू वडाय् हे दकलय् अप्वः ल्याखय् थुगु हे जातिया उम्मेदवारत वडा अध्यक्षय् निर्वाचित जुयाः वयेत ताःलाःगु दु । थुकिं नं सीके फइ कि ज्यापु समुदायया वर्चश्व नेवाःतय्गु दथुइ अझं ल्यनाच्वंगु दनि । थुगु प्रकरणं नं तीर्थराम डंगोलया सम्भावना आपालं दुगु क्यनी । तर नेपाली कांग्रेस दुने यथास्थितियात मूल्याङ्कन यायेगु क्षमताया कमीया कारणं राजधानी थेंजाःगु महत्वपूर्णगु मेयर पदं ल्हाः च्वतुके माल धकाः कुंखिनाच्वंपिनिगु ल्याः नं म्हो मदु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.