All for Joomla All for Webmasters

ने.सं. ११३६ यंलागा अष्टमी

माओवादीपाखें भरतपुरय् हाकनं मतदान यायेत माग

माओवादी केन्द्रया भरतपुर जिल्ला संगठनं भरतपुर महानगरपालिकाया मतगणना इलय् मतपत्र खूगु थासय् हाकनं मतदान यायेमाःगु माग याःगु दु । जिल्ला संगठनं छगू विज्ञप्ति जारी यासें मतपत्र खूगु सम्बन्धित वडाय् हाकनं मतदान यायेमाःगु माग याःगु खः । जिल्ला संगठन समितिया इन्चार्य इश्वरी भट्टराइ नं हस्ताक्षर यानाः पिथँगु वक्तव्यय् मतपत्र खूगु द्वपनय् ज्वनातःपिं थः कार्यकर्ता द्रोणबाबु शिवाकोटी व मधु न्यौपानेयात नं तुरुन्त त्वःतेत माग याःगु दु ।

प्रम पुष्पकमल दाहालया म्ह्याय् रेणु दाहाल व एमालेया देवी ज्ञवाली दथुइ तीव्र प्रतिस्पर्धाया दथुइ जुयाच्वंगु मतगणनाय् ल्वापु जुयाः मतपत्र खुनाबिइवं थौं वंगु चान्हंनिसें मतगणना हे स्थगित जूगु दु । निर्वाचन आयोगया अधिकृतं थ्व घटनायात कयाः म्हिगः जारी याःगु सूचनाय् मतगणनास्थलय् ल्वापु यानाः गणनास्थल हे कब्जाय् कायेगु तकया कुतः याःगुलिं मतपत्र ल्याः खायेगु ज्या स्थगित याये माःगु खँ धयातःगु दु । आयोगं सुयातं दोष धाःसा बिउगु मदु ।

चितवन नपा वडा १९ या मतगणना जुयाच्वंगु इलय् थ्व घटना जूगु खः । निर्वाचन आयोगं आः मेगु सूचना पिहां मवःतले गणना मजुइगु खँ धाःगु दु । थ्व मतगणना जुयाच्वंगु इलय् तकं एमालेया उम्मेदवार देवी ज्ञवाली ७०० मतं न्ह्यःने लानाच्वंगु दु । आः वडा नं. १८ व १९ या जक मतगणना जुइ ल्यं दनि । थनया मतगणनाय् गबलें एमाले न्ह्यःने गबलें कांग्रेस–माओवादी न्ह्यःने लानाः तीव्र प्रतिस्पर्धा जुयाः अन्तिम इलय् तक नं सु त्याइ धकाः धाये मफयाच्वंगु खः ।

आः पुनः मतगणना कि पुनः मतदान ?

मतपत्र ल्याः खायेगु स्थगित जुइवं आः अन पुनः मतदान यायेगु लाकि मतगणना जक यायेगु धइगु खँय् नं विवाद पिहां वःगु दु । एमालें १९ नम्बर वडाय् मतगणना सुचारु यायेमाःगु माग याःगु दुसा नेपाली कांग्रेसं थ्व वडाय् मतदान हे हानं शुरु यायेमाःगु माग याःगु दु । निगुलिं पार्टीं पिकाःगु अलग अलग वक्तव्यय् थ्व अलग अलग माग यानातःगु खः ।

एमालें मतपत्र खुइगु ज्याय् माओवादीया द्रोण शिवाकोटी, दिलीप न्यौपाने लगायतया कार्यकर्ताया ल्हाः दु धासें उमित कारवाही यायेमाःगु माग याःगु दु । एमालें थ्व घटनाया विरोधय् थौं नारायणघाटय् छगू प्रदर्शन समेत यायेत्यंगु दु । उखे माओवादी कार्यकर्तातय्सं धाःसा मसि लटपट जुयाच्वंगु छपाः मतपत्र सदर यायेगु लाकि बदर यायेगु धकाः पिहां वःगु विवादया दथुइ सातुमतु साःबलय् गूगु खः धकाः धाःगु दु ।

तर एमालें माओवादी कार्यकर्तातय्सं मतपत्र खुइगु धकाः न्हापा हे योजना दयेकाच्वंगु खँ थःपिंसं सिउ धाःगु दु । कांग्रेस–माओवादीया मंकाः उम्मेदवार रेणु दाहालं धाःसा थःपिं त्याइगु निश्चित खने दयेवं एमाले कार्यकर्तात आँटे चायाः थज्याःगु ज्या याःगु खः धकाः द्वपं बियादीगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.