All for Joomla All for Webmasters

ने.सं. ११३६ यंलागा अष्टमी

नेपालभाषा परिषद्या थीथी सिरपाः - मथुरायात भाषाथुवाः, अमेरिकन दबूयात चित्तधर

नेपालभाषा परिषदं झी कवि चित्तधर हृदयया बुन्हि लाकाः दँय्दसं बीगु याना वयाच्वंगु थीथी सिरपाः घोषणा जूगु दु । शुक्रवाः च्वंगु परिषद्या कार्यकारिणी बैठकं थ्व सिरपाःया निर्णय याःगु खः । परिषद्पाखें थुगुसी ‘भाषाथुवाः’ उपाधिपाखें वरिष्ठ आख्यानकार मथुरा साय्मियात छाय्पीगु निर्णय याःगु दु ।

अथे हे चित्तधर सिरपाः नेपालं पिने च्वनाः नं नेवाः भाय् व जातिया उत्थानय् सक्रिय जुया वयाच्वंगु संस्था नेवाः अमेरिकन दबू शिकागोयात बीगु निर्णय जूगु दु । उकथं हे नेपालभाषाया निबन्धकारतय्त बीगु ठाकुरलाल सिरपाः च्वमि योगेन्द्रमान श्रेष्ठयात बीगु निर्णय जूगु दु । अनुसन्धानात्मक ज्याय् योगदान बिउपिंत बीगु पूर्णहिरा सिरपाः वरिष्ठ भाषासेवी रोहिणी बहादुर कायस्थयात बीगु जूगु दु ।

उकथं हे मिसा च्वमिपिंत बीगु मोतिलक्ष्मी सिरपाः बाखं च्वमि रीना तुलाधरयात बीगु निर्णय जूगु दु । थुकी ‘भाषाथुवाः’ उपाधि कथं दोसल्लां न्ययेकाः सम्मान याइगु खःसा चित्तधर, ठाकुरलाल व पूर्णहिरा सिरपाः २५–२५ द्वः तका लिसें ताम्रपत्र व मोतिलक्ष्मी सिरपाः १० द्वः तका लिसें ताम्रपत्रं सम्मान याइगु खः । परिषदं याकनं हे छगू ज्याझ्वः यासें थ्व सिरपाः लःल्हाइगु खँ धाःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.