All for Joomla All for Webmasters

ने.सं. ११३६ यंलागा अष्टमी

स्थानीय पदय् उम्मेदवारी जनता कि पार्टी ?

स्थानीय तहया निर्वाचनया न्हि न्ह्यःने वःलिसे थुकिया चर्चा परिचर्चा नं अप्वया वःगु दु । स्थानीय निर्वाचन अपरिहार्य हे जूगु कारणं सत्तारुढ पार्टीतय्सं न्ह्याथे यानाः जूसां नं निर्वाचनया ज्याझ्वः क्वचायेके हे माः धयागु मान्यताया दुने तःकथंया संयम व सहमति क्यनाः थुकियात तार्किक निष्कर्षय् यंकेगु कुतः नं न्ह्याका हे च्वंगु दु । मधेसी दलतय्गु सहमतिइ थ्व निर्वाचन निगूगु चरणय् क्वचायेकेगु खँ नं तय जुइधुंकूगु दु । थीथी राजनीतिक पार्टीतय्सं नं आः स्थानीय निर्वाचन जुइगु हे लक्षण खंकाः थःपिनिगु निर्वाचन विरुद्धया मागयात मत्थर यानाः निर्वाचनया तयारीइ वनाच्वंगु खनेदु ।

चुनाव चिंया मागयात प्रमुख मुद्दा दयेकाः आन्दोलन न्ह्याकाच्वंगु नयाँ शक्ति नेपाल पार्टी नं मेगु हे राजनीतिक पार्टीया चुनाव चिं त्याय् कयाः निर्वाचनया तयारीइ न्ह्यचिलेधुंकूगु दु । समग्रकथं स्वयेबलय् आः थ्व स्थानीय निर्वाचन क्वःछिनातःगु ई दुने हे क्वचाइगु लगभग तय जुइधुंकूगु आभास सकसिनं वाःचायेकाच्वंगु दु । 

राजनीतिक पार्टीतय् निर्वाचन माहौल ब्वलने धुंकाः आः निर्वाचनय् उम्मेदवारी बीपिनिगु नां नं धमाधम पिदनाच्वंगु दु । निर्वाचनय् सहभागी जुइपिं तःधंगु राजनीतिक पार्टीतय्सं थासंथाय्या उम्मेदवारतय्गु नां क्वःछीधुंकूगु दुसां देय्या राजधानी येँ, यल व ख्वपया प्रमुख पदय् नां बीत ताः लानाच्वंगु मदुनि । नां पित बीवं हे नांया समर्थक व वया विपक्ष दुने कार्यकर्तातय्गु धु्रवीकरण, निर्वाचनय् असहयोग, घात प्रतिघात जुइ फइगु ग्याःचिकुया कारणं तःधंगु राजनीतिक पार्टीया नेतातय् थःपिं सुरक्षित थासय् च्वनेगु कुतः यानाच्वंगु जुइमाः ।

आःया स्थानीय निर्वाचनय् येँ महानगरपालिकाया प्रमुख व उपप्रमुखया पद त्याकेगु फुक्क हे राजनीतिक पार्टीतय्गु प्रतिष्ठाया खँ जुयाच्वंगु दु । येँ महानगरपालिकाया मूलवासी नेवाःत जूगु कारणं प्रमुख पदय् नेवाः उम्मेदवार मबीगु पार्टी थ्व निर्वाचनय् ताःलाये फइ मखु धयागु आंकलन स्वयम् राजनीतिक पार्टीतय्के नं दु । उकिं प्रमुख, उपप्रमुख पदया निंतिं नेवाःतय्गु उम्मेदवारी दइ धयागु खँय् निश्चिन्त जुइ फइ । तर नेवाः जुइवं हे थनया मूलवासीतय्गु समर्थन त्याके फइ कि मफइ थ्व नं छगू न्ह्यसः खः ।
स्वनिगः दुने नेवाःतय्सं थःपिनिगु भाषिक, जातीय, सांस्कृतिक अधिकारया निंतिं तःक्वः हे आन्दोलन यायेधुंकूगु दु ।

आःया स्थानीय निर्वाचन मुलुक गणतन्त्रय् वने धुंकाः पिदंगु संविधानकथंया न्हापांगु निर्वाचन खः । मुलुकय् थःपिनि पहिचान सहितया संघीयता, गणतन्त्र स्थापना यायेगु निंतिं थनया मूलवासी नेवाःतय्सं आपालं बलिदान याःगु खः । अथे खःसां आः जारी जुयाच्वंगु संविधानं पहिचान बियाच्वंगु मदु । मुलुकय् राजनीतिक परिवर्तन हयेगु निंतिं गुकथं राजनीतिक पार्टीतय्सं बहुजातीय, बहुभाषिक व बहुधार्मिक मुलुकय् थनया फुक्क जातजातिया मनूतय्त समान हक अधिकारया विश्वास याकूगु खः, राजनीतिक उपलब्धि लिपा थुमिसं हानं नं आदिवासी जनजातितय्त विश्वासघात याःगु खँ सकसिनं वाःचायेका हे च्वंगु दु ।

थुज्वःगु सन्दर्भय् आः थुपिं हे राजनीतिक पार्टीतय्सं थथे याना बी अथे याना बी धयागु आश्वासनं सुं नं सचेत मनूत विश्वस्त जुइ फइगु अवस्था मदु । अथे खयां नं संविधानं प्राप्त जूगु स्थानीय सरकारया स्वरुपयात फयांफत्तले सदुपयोग जुइमाः धयागु मान्यता सकसिनं कयाच्वंगु दु ।आःया स्थानीय निर्वाचनय् मतदातातय्सं उम्मेदवार ल्ययेगु धयागु राजनीतिक सिद्धान्तयात नालाः जक मखु, स्थानीय रुपं थःपिं अधिकार सम्पन्न जुइगु निंतिं दत्तचित्त जुइकथं ज्या याइम्ह उम्मेदवार स्थानीय सरकारया प्रमुख पदय् थ्यंकेमाःगु दु । 

वर्तमान परिपे्रक्षय् स्थानीय निर्वाचनया माध्यमं अधिकार सम्पन्न जुइगु निंतिं राजनीतिक पार्टीत जक मखु, सरकारया गलत ज्या, हेपाह प्रवृतिया कारणं येँ लगायत स्वनिगःया जनता विस्थापित जुयाच्वंगुयात पनेगु निंतिं न्ह्यचिलाच्वंपिं दु, नेवाः राज्य स्थापना जुइमाःगु माग यानाः तःदँ निसें आन्दोलन यानाच्वंपिनिगु शक्ति निर्वाचनया मैदानय् दु उकथं हे सरकारया गैर न्यायिक सडक विस्तारया कारणं छेँ बुँ मदयाः विस्थापित जुयाच्वंपिं मनूत नं आःया स्थानीय निर्वाचनया सदुपयोग जुइमाःगु खँय् चिन्ता क्यनाच्वंगु दु । मुलुकय् जुइगु छुं नं स्तरया राजनीतिक प्रयोजनया निर्वाचनय् राजनीतिक पार्टीत चलायमान जुइगु स्वाभाविक खः । तर जनताया मत हे सर्वाधिक शक्तिशाली हतियार खः धयागु विश्व मान्यता नं छखेर दु ।

आःया स्थानीय तहया निर्वाचन न्हापा न्हापाया मेयर, वडा अध्यक्षया निर्वाचन थेंजाःगु हल्का कथंया निर्वाचन मखसें थ्व स्थानीय सरकार निर्माणया हे निर्वाचन खः । थुमिगु अधिकार न्हापा थें सीमित मखु, स्थानीय तहया सरकार सञ्चालनया स्तरय् दइगु जूगुलिं थुकी न्ह्याथेंजाःम्ह उम्मेदवार वा न्ह्याथेजाःगु राजनीतिक पार्टीया उम्मेदवारयात मतदान यायेगु स्वयां अज्याःपिं उम्मेदवारत गुलि क्षमतावान धकाः आंकलन यायेगु नं आवश्यक जुइ । राजनीतिक पार्टीं गथे गथे धाल, अथे अथे हे जक याइपिं जूसा अज्याःपिं उम्मेदवारत त्याना वःसां उकिया छुं औचित्य दइ मखु ।

उकिं स्थानीय आवश्यकता, विकास निर्माण व अधिकार सम्पन्न यायेगु ज्या, राज्यं विभेद यानातःगु थासय् अधिकार प्राप्तीया निंतिं आन्दोलनरत जुइ फइपिं उम्मेदवारया चयन हे आःया मूल आवश्यकता खः । फलाना पार्टीया संगठन तःधं, फलाना पार्टीया नेताया भाषण बांलाः धकाः उम्मेदवारतय्त मतदान यायेगु स्वयां आः तक फुक्क हे राजनीतिक पार्टीतय्सं झी आदिवासी जनजातितय्त न्ह्याबलें लखय् मिखा कंकाच्वंगु इतिहासयात नं वाःचायेकेमाः । राजनीतिक पार्टीतय्सं थःपिं सत्तारुढ जुइवं थः समर्थकतय्त हे म्वाय् चुइकाच्वंगु यथार्थयात नं लुमंकेमाः । आःया इलय् न्ह्याम्हं ‘जि छिमिगु हे निंतिं खः’ धकाः ध्वंचातय्सं ख्वाःपाः पुयावइगु खँय् होशियारी जुइमाः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.