All for Joomla All for Webmasters

ने.सं. ११३६ यंलागा अष्टमी

भुँइकटहरया फाइदा व बेफाइदा

भुइँकटहर (Pineapple) ब्राजीलया आदिवासी मा खः । क्रिस्टोफर कोलम्बसं सन् १४९३ य् क्यारेबियन द्वीप समूहया ग्वाडेलोप नांगु द्वीपय् थ्व लुइकूगु खः । अले थुकियात ‘पाइना दी इंडिज’ धकाः नां छूगु खः । कोलम्बसं युरोपय् भुइँकटहर खेती सुरुवात याःगु खः । भुइँकटहरमाया कचा ध्यनाः चाय् थुनाबिल कि न्हूगु मा बुयावइ । भुइँकटहर साप हे साःगु सि खः । थुकिया कचिगु सि पाउँसे च्वनी, पाके जूगु सि चाकुसेच्वनी । थुकी थाइमिन, राइबोफ्लेमिन, सुक्रोज, ग्लुकोज, क्याफिक एसिड, साइट्रिक एसिड, कार्बोहाइड्रेट व प्रोटीन दु । 

भुइँकटहरया फाइदा

– गर्मीबलय् थुकिया सर्बत त्वन धाःसा तांन्वःगु लनी, चःति नं वइ मखु ।
– ताजा भुइँकटहरया १०० ग्राम रस मस्तय्त त्वंका बिल धाःसा उमि प्वाथय् दायाच्वंपिं चिचीधिकःपिं कीत सिनावनी । ध्यान बीमाःगु खँ छता छु धाःसा थ्व खालि प्वाथय् गबलें नं त्वंके मजिउ ।
– भुइँकटहर तासय् यानाः उकियात चिचीकुक तानाः नयाबिल धाःसा पित्त जूगु थीथी समस्या क्वलाइ ।
– म्ह मनावयाच्वंपिंत नं भुइँकटहरं फाइदा याः ।
– भुइँकटहरय् मलय्चुं व बुय्चिचुं हाःहाः यानाः नया बिल धाःसा अपचया समस्या ज्यनी ।
– न्हिं २०० ग्राम भुइँकटहरया रस त्वनेगु यात धाःसा ल्ह्ंगु कम जुइ, छाय्कि भुइँकटहरया रसं दाः नायेकाः शरीरं पित छ्वया बी ।
– भुइँकटहरया रस कथु व म्हुतुया जीवाणुजन्य थीथी ल्वचय् लाभकारी सिद्ध जू ।
– भुइँकटहरया सेवन यात कि पिसाब रोके जुइ मखु ।
– भुइँकटहर, जिफ्वः, पिपी, बेय्चि व जी थ्व सकतां चीज बराबर मात्राय् कयाः नचुक निनादिसँ । थ्व चुं ३ ग्रामया मात्रा कयाः सुथय् व बहनी सेवन यात धाःसा यक्व यक्व च्व फायेमालीगु समस्या ज्यना वनी ।
– ज्वर वइबलय् नं भुइँकटहरया रसया सेवन याःसा बांलाः ।
– अजीर्णया ल्वगिं भुइँकटहरय् मलय्चुं हाःहाः यानाः, सिंचि तयाः सेवन यायेगु यायेमाः ।
– भुइँकटहरया सर्बत त्वन धाःसा दुनें निसें तांन्वःगु नं लनी ।
– भिटामिन ‘सी’ व मेमेगु खाद्य पदार्थया अभावं यानाः स्कर्भी ल्वय् जुल धाःसा भुइँकटहर नयेगु व उकिया रस त्वनेगु यात धाःसा यक्व लाभ जुइ ।
– भुइँकटहरं म्हया क्वँय् बल्लाकेगुया लिसेलिसें म्हय् फुर्ति नं थकया बी ।
– म्हय् हि मगात धाःसा भुइँकटहरया रस त्वनादिसँ, यक्व हे लाभ जुइ ।
– थी मजिउ जुइबलय् हि गाक्क कुहां मवइगु जुयाच्वन धाःसा भुइँकटहरया रस त्वनादिसँ, माःकथं हि कुहां वइ ।
– गर्मीबलय् नुगः धुकधुक मिनीगु व अय् च्वने थय् च्वने मदइगु जुयाच्वन धाःसा भुइँकटहरया रस वा सर्बत त्वन धाःसा यक्व हे लाभ जुइ । तसकं प्याःचाःगु नं लनी ।
– भुइँकटहरया लाः गर्मी कै थेंज्याःगु वयाच्वंथाय् लेप तया बिल धाःसा यक्व हे फाइदा जुइ ।
– कथुइ टन्सिल वल, अथवा सः सुत धाःसां भुइँकटहर नयेबलय् फाइदा हे जुइ ।
– भुइँकटहरं झीगु म्हय् ल्वय्लिसे ल्वायेगु क्षमता अप्वयेका बी, अले सामान्य ठण्डी नं राहत दइ ।
– पाके जूगु भुइँकटहरया रस पिकयाः उकी कपाय् छकू थुनाः गिजाय् इला बिल धाःसा वा स्याःगु लना वनी ।

भुइँकटहरया बेफाइदा

– प्वाथय् दुपिं मिसातय्सं शुरुशुरुया दिनय् भुइँकटहर नये मजिउ । छाय्कि थुकि गर्भपात जुइगु खतरा अप्वयेकी ।
– अपसं च्वनेबलय् अथवा प्वाः द्यांलाःबलय् भुइँकटहर नयेगु धयागु विष नयेगु सरह हे जुइ ।
– भुइँकटहर नयेबलय् उकिया दथुइ लाक च्वंगु छाःगु भाग वांछ्वयेमाः । छाःगु भाग नल धाःसा प्वाः स्यायेयः ।
– भुइँकटहर नयेबलय् गुलिं गुलिं मिसातय्त व मिजंतय्त एलर्जी जुइयः । एलर्जीं यानाः म्हुतुसि मना वइगु,कथु वालावाला मिनीगु वा वाइँवाइँ वइगु जुइ । थथे मजुइकेत भुइँकटहरया स्लाइस तानाः चिलखय् कुर्कादिसँ । थथे यायेबलय् कथु वालावाला मिंकीगु        एंजाइम खतम जुयावनी ।
– भुइँकटहरय् चिनिया मात्रा प्रशस्त दइ । अथे जुयाः चिनिल्वय् दुपिंसं थ्व नयेमजिउ । छाय्कि थुकिं छथुं हे ब्लडसुगर लेभल थकयाः वयागु ज्यान खतराय् लाका बीफु ।
– गुपिं मनूतय्सं हि छ्वालुइगु वासः नयाच्वंगु दु, इमित नं भुइँकटहरं नोक्सान यायेफु ।

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.