All for Joomla All for Webmasters

ने.सं. ११३६ यंलागा अष्टमी

स्थानीय निर्वाचनया उम्मेदवार गज्याःपिं ?

मुलुकया वर्तमान राजनीतिक परिस्थिति अति हे असहज स्थितिइ थ्यनाच्वंगु आभास याये फइ । मुलुकय् जुइ धयाच्वंगु स्थानीय तहया चुनाव क्वःछिनातःगु तिथि दुने हे जुइ धयागु खँय् अझं यकिन जुइफुगु स्थिति मदुनि । सत्तारुढ राजनीतिक दलत चुनाव यायेगु हे धकाः न्ह्यचिलाच्वंगु खनेदुसा मधेसी मोर्चा लगायतया ६८ गुलिं मल्याक राजनीतिक पार्टीत निर्वाचन याके बी मखु धकाः हुँकार यानाच्वंगु खनेदु ।

न्हूगु मोडकथं न्यागू तराई मधेसया राजनीतिक पार्टीत छथाय् च्वंगु खँ थीथी संकेत यानाच्वंगु आभास जुइ । न्यागू तराई लागाया राजनीतिक पार्टीत छथासं च्वनाः विरोधया कार्यक्रम सशक्त याइगु खः कि थुपिं संयुक्त रुपं हे निर्वाचनय् कुहां वयाः सत्तारुढ राजनीतिक पार्टीतय्त उमिगु हैसियत क्यना बीगु खः, छुं दिं दुने हे निक्र्यौल जुइगु स्थिति दु । स्थानीय तहया चुनावं अनेक तरङ्ग हयाच्वंगु दु । विशेषकथं नीदँ लिपा जुइत्यंगु थुगु स्थानीय तहया चुनावं राजनीतिक कार्यकर्ता दुने नं अनेक ध्रुवीकरणया लहर न्ह्याका हयाच्वंगु दु ।

माउ पार्टीं न्हूगु पार्टीपाखे कार्यकर्तात ध्रुवीकरण जुइगु कुतलय् दुसा न्हापा विचलनय् वनेधुंकूपिं कार्यकर्तात हाकनं थःगु माउ पार्टीपाखे लिहां वनेगु क्रमं नं गति कयाच्वंगु खनेदु । आःया स्थानीय तहया निर्वाचनय् छगू न्हू पुस्ताया मतदातातय्गु उपस्थिति महत्वपूर्ण खनेदु । थुपिं मतदातात मात्र मतदाता मखुसें स्थानीय तहया उम्मेदवारया आकांक्षी जुयाच्वनीगु नं स्वाभाविक हे खः । नेवाःतय्त राज्यं उत्पीडनय् लाकाच्वंगुया भुक्तभोगीत नं खः ।

तर राजनीतिक पार्टीतय्सं थःपिनि हे कट्टर समर्थकतय्त जक उम्मेदवार दयेकेगु खँ ल्हायेगु याना वयाच्वंग व ताः इलंनिसें थःपिंसं सम्बन्धित राजनीतिक पार्टी दुने योगदान यानाच्वनागु कारणं आःया मौकाय् थःपिं हे उम्मेदवार जुइ दयेमाः धयागु माग नं खनेदइगु स्वाभाविक खः । थुकिं राजनीतिक पार्टीप्रति आस्था दुपिं व आकर्षित जुयाच्वंपिं कार्यकतातय् दथुइ द्वन्द्व जुइगु नं स्वाभाविक हे जुइ ।

आःया स्थानीय तहया निर्वाचनय् उम्मेदवार गज्याःपिं जुइमाः धयागु चर्चा नं छखे ब्यापक दुसा स्वनिगः दुनेया महानगरपालिका दुनेया प्रमुख व उपप्रमुख थनया आदिवासी नेवाःत हे जुइमाः धयागु छगू मान्यतां थाय् कयाच्वंगु खंके फइ । स्वनिगःया येँ, यल व ख्वप नेवाःतय्गु पहुँच व प्रभाव दुगु थाय् खः । उकिं थनया मतदातातय्त बिच्के याये मजिउ धयागु मान्यता छखे दुसा मेखेर नेवाः भाषा, अधिकारया निंतिं ज्या सना जुया धकाः दावी यानाच्वंपिं अनेक नेवाः खलः, पुचःतय्सं नं थनया प्रमुख पदया उम्मेदवार नेवाःत हे जुइमाः धयागु मान्यतां सः थ्वयेका वयाच्वंगु खनेदु ।

मतदातातय्गु भावनाया कदर स्वरुप राजनीतिक पार्टीतय्सं नं थनया प्रमुख पदय् नेवाःतय्त हे उम्मेदवार दयेकीगु सम्भावना नं मदुगु मखु । तर बिचाः यायेमाःगु खँ छु धायेबलय् थन न्ह्यागुं राजनीतिक पार्टीपाखें न्ह्याम्ह नेवाः जूसां जिउ धकाः थनया नेवाः खलः, पुचःत सक्रिय जुइगु खःकि नेवाः भावनां ज्या याइम्ह, नेवाः हक अधिकारया आन्दोलनययात थूम्ह मनूया उम्मेदवारी माः धकाः सः तयेगु खः? तर अज्याःपिं उम्मेदवारत न्ह्याक्व हे नेवाः भावना दुम्ह, नेवाः अधिकारया आन्दोलनय् ब्वति हे कयाच्वंम्ह खःसां थःगु मातृ पार्टीया भाषा, जातिया सिद्धान्त अःखः जुइ फइम्ह खः कि मखु ? पार्टी निर्देशन माने मयाइम्ह मखु कि पार्टीं कयाच्वंगु मान्यता मिले मजू धकाः संघर्ष यायेफुम्ह मनू जुइमाः ।

न्हापाया नं अनेक अनुभव थन दयाच्वंगु दु । पार्टीपाखें कार्यरत जुयाच्वंपि मनूतय्सं जाति व भाषाया अधिकारया वकालत यायेवं ‘छि ला राष्ट्रिय नेता जुइमाःम्ह, थज्याःगु जाति भाषाया खँ ल्हानाः छगू जातिया जक नेता जुइम्ह थें च्वं’ धकाः इमोशनल ब्लाकमेल यानाच्वंगु नं न्यने दु । मेखे आः थुपिं राजनीतिक पार्टीतय्सं मतदाताया यःम्ह मनू मखु कि पार्टीप्रति वफादारम्ह मनूयात उम्मेदवार दयेकेमाःगु सिद्धान्त ज्वनाच्वंगु नं अःपुक हे अनुमान याये फइ ।

नेवाःतय्गु अधिकार व स्वनिगःयात ब्यवस्थित यायेमाः धकाः मान्यता कयाच्वंपिं राजनीतिक पार्टी दुने सक्षम उम्मेदवारत दुसां थुपिं लिपा विचलनय् वनेफु वा पार्टीया नीति निर्देशनयात हाथ्या बी फइगु सम्भावना खंकाः अज्याःपिं सक्षम उम्मेदवारया थासय् पार्टीप्रति वफादार मनूतय्त जक उम्मेदवार दयेकीगु सम्भावना आपालं दु । आःया अभियान प्रमुख उम्मेदवार नेवाःत हे जुइमाः धयागु सःया औचित्य गुकथं खंके फइ ?

छथ्वः मनूतय्सं क्वचाःगु निक्वःगु संविधान सभाय् नं थुकथंया हे नारा ज्वनावःगु खः । उगु इलय् नं ग्वाःग्वाः नेवाःत उम्मेदवार जुइवं सुयात समर्थन यायेगु धयागु अन्यौल सामान्य नेवाःतय्गु दथुइ ब्वलंगु ला ख हे खत । तर छगू विडम्वना उगु इलय् सक्षम नेवाः धकाः अभियान न्ह्याकूपिंसं सुयात समर्थन यात वहे जक सक्षम नेवाः जूगु व मेपिं नेवाः उम्मेदवारत नेवाः जुयां नं पराजित जुइमाःगु खँया लिधंसाय् थुगु अभियानयात दुवाले फइ ।

विजयी जूम्ह नेवाः उम्मेदवारया दुने थुपिं परिचालन मजूगु खः धयागु आधार छु दु ? थुकथं अमूर्त अभियानय् नेवाःत न्ह्याः वनेमालीगु नं छगू विडम्वना हे खः । थुकिं ‘नेवाः मनोभावना’ यात राजनीतिक उपलब्धीपूर्ण लँपुइ यंकेगु स्वयां नं छुं उपलब्धी मजुइगु केवल भावनाया जक लिउ लिउ तया यंकीगु सम्भावना अप्वः दइ ।

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.