All for Joomla All for Webmasters

ने.सं. ११३६ यंलागा अष्टमी

अधिकार क्वपालातःगु संशोधन

राजनीतिइ सुं नं स्थायी शत्रु व स्थायी मित्र दइ मखु, ई कथं थुकी हिउपाः वयाच्वनी । थ्व धापू नेपाःया राजनीतिइ न्ह्याबलें चर्चा जुयाच्वं । जुयाच्वंगु नं अथे हे दु । गणतान्त्रिक सरकार लिपाया सत्ता समीकरण स्वयेगु खःसा वामपन्थी शक्ति व लोकतान्त्रिक शक्ति जक धकाः धुव्रीकरण जुया मच्वं । अझ गणतन्त्र पक्षधर व राजतन्त्र पक्षधर, हिन्दू राज्य व धर्मनिरपेक्षता पक्षधर, संघीयता पक्षधर व संघीयता विरोधी जक धकाः थन पक्ष व विपक्षया स्थिति जुया मच्वं । अझ न्ह्यइपुगु खँ ला जनआन्दोलनया पक्षधर व विरोधी तकं थौंकन्हय् छगू हे क्याबिनेटय् दु । थ्व सकतां स्वयेगु खःसा स्पष्ट जू कि नेपाःया राजनीतिइ सुं नं स्थायी शत्रु मखु, अले सुं नं स्थायी मित्र मखु ।

सायद थज्याःगु परिस्थिति मेमेगु देशय् नं जूगु जुइमाः । तर छता खँ छु स्पष्ट धाःसा गन गन राजनीतिक इमान्दारिताया कमी जुइ अन धाःसा स्थायी शत्रु व स्थायी मित्रया परिभाषा इलय् ब्यलय् हिलां तुं च्वनी । राजनीति छगू सम्भावनाया खेल नं खः । अथे जूसां न्ह्याबलें थः मित्र शक्ति व विपक्षी शक्तिया परिभाषा हिलाच्वनीगु धइगु अनया राजनीति याइपिंके इमान्दारिताया कमी दुगु दसि खः । नेपाःया राजनीतिक नेतृत्वयाके राजनीतिक इमान्दारिताया खँ भ्याः भतिचा हे मदुगुलिं राजनीतिक समीकरण चीहाकःगु इलय् हे फेरबदलया शिकार जुयाच्वंगु जुल ।

छगू इलय् कट्टर विरोधी शक्तित जूसां राजनीतिक लाभया निंतिं अस्थायी मित्रया नकाब पुइत तयार जुयाच्वं, नेपाःया राजनीतक दलत ।मू खँ, थज्याःगु राजनीतिक इमान्दारिता म्हो जूगुलिं नेपाःया राजनीतिक अवस्था तसकं नाजुक जुयाच्वंगु दु । आः न्ह्यानाच्वंगु संविधान संशोधनया प्रक्रिया नं थज्याःगु नैतिकता व इमान्दारिता मदुगुलिं न्ह्याः वनेमफयाच्वंगु खः । प्यला न्ह्यवंनिसें संसदय् थानाच्वंगु संविधान संशोधनया प्रस्तावयात सरकारं लित कयाः न्हूगु प्रस्ताव दर्ता यात । ताः ई तक सरकारी पक्ष व मधेशी मोर्चाया नेता दथुइ जूगु वार्तायात निष्कर्षय् थ्यंकीगु कथं यक्व वार्ता जुल ।

उगु वार्ताया लिधंसाय् न्हूगु संविधान संशोधन दर्ता यायेगु व मधेशी मोर्चां स्थानीय निकायया चुनावय् ब्वति कायेगु कथं अनौपचारिक सहमति जूगु खः । निगुलिं पक्ष च्वनाः संविधान संशोधनया न्हापांगु खाका तयार यायेगु नं ज्या जुल । पूर्णरुपं सरकारी पक्ष उकियात तयार नं यात, संसदय् दर्ता नं जुल । तर मधेशी मोर्चां उकियात अस्वीकार यात ।फुक्कसिनं बिचाः याइगु खँ थ्वहे खः कि निगुलिं पक्ष च्वनाः तयार याःगु संविधान संशोधनया प्रस्तावयात मधेशी मोर्चां अस्वीकार यायेगु धइगु उमिसं चुनाव चाहे मजू । आः प्रचार जुयाच्वंगु तरिका नं थथे हे दु ।

स्वयम् मधेशी मोर्चा जानाः तयार याःगु प्रस्ताव उमिसं स्वीकार मयाये माःगु कारण छु ? मधेशी मोर्चा चुनाव खनाः ग्यानाच्वंगु जकं मखुला ? मोर्चां सहमति याये चाहे मजुयाच्वंगु जकं खःला ? गुकथं आः प्रचार प्रसार जुयाच्वंगु दु, थथे जिज्ञासा वइगु स्वाभाविक खः । थन न्ह्यागु जूसां उकिया प्रतिक्रिया कि त मधेशीतय्त वइगु कि त आदिवासी जनजातितय्त । गबलें नं थज्याःगु न्ह्यसः ब्रम्हू–क्षेत्रीत पाखे स्वइ मखु ।नकतिनि संसदय् दर्ता जूगु न्हूगु संविधान संशोधनया विधेयकया सवालय् नं अथे हे । सरकारी पक्षया वार्ता पुचलय् ब्रम्हू–क्षेत्री नेतात ।

अले मधेशी मोर्चाया वार्ता पुचलय् आदिवासी जनजाति व मधेशी नं दुथ्याः । तर संविधान विधेयकय् समस्या वयेवं उकिया अपजस केवल आदिवासी जनजाति व मधेशीतय्त जक । छु धाथें निगू पक्षय् दथुइ जूगु सहमति व लिच्वः कथं हे न्हूगु संशोधन विधेयक वःगु खःला ? थ्व न्ह्यसः धाःसा गनं पिहांवःगु खने मदु । केवल मोर्चां विधेयक प्रस्ताव अस्वीकार यात धकाः प्रचार जुयाच्वंगु दु । तर उमिसं छाय् अस्वीकार यात धकाः धाःसा छुं नं मालेगु ज्या जुयाच्वंगु मदु ।च्यागू बुँदाय् न्हूगु संशोधन विधेयकय् दर्ता जूगु खः । उकी मध्ये भाषा सम्बन्धी विधेयक स्वयेगु खःसा सरकार अग्रगमनपाखे मखुसें प्रतिगमनपाखे वनाच्वंगु जकं खःला धकाः आशंका ब्वलंकी ।

न्हापा दयाच्वंगु अधिकार तकं म्हो यानाः न्हूगु विधेयक पेश जूगु दु । न्हापा प्रदेशं थःगु सम्पर्क भाय् निर्धारण याये फइगु व्यवस्था दुगु खःसा आः उकियात हीकाः केन्द्रं नीस्वंगु भाषा आयोगया सिफारिसय् केन्द्रया स्वीकृति लिपा जक प्रदेशया भाय् निर्धारण याये फइगु व्यवस्था यानातःगु दु । थ्व ल्याखं स्वयेगु खःसा भाषाया सवालय् सरकारं झन कठोर पलाः ल्ह्वंगु खनेदु । पिने धाःसा मोर्चाया सहमतिइ विधेयक पेश याःगु धकाः प्रचार यायेगु तर दुने धाःसा न्हापा दयाच्वंगु अधिकार तकं क्वपालीगु जुइवं अज्याःगु विधेयक सुं नं भाषिक व अधिकार प्राप्तिया निंतिं आन्दोलित पक्षयात स्वीकार मजुइगु स्वाभाविक खः ।

सत्ताया समीकरण फेरबदल यायेगु इलय् राजनीतिक दलतय्सं थःगु इमान्दारिता व नैतिकतायात ल्वःमंकाः व्यवहार याइ, आः नं अज्याःगु हे नैतिकता व इमान्दारिता ल्वःमंकाः अधिकार कटौती यानाः सरकारं संसदय् संशोधन विधेयक पेश याःगु खनेदु । सरकारं थःगु थासं आन्दोलनरत पक्षयात सहमति यायेत कुतः यानाच्वंगु थें क्यनेगु अले सहमतिइ मवः धासें उकिया द्वपं आन्दोलनरत पक्षयात बीगु यानाच्वंगु दु । पिनें स्वयेगु खःसा आन्दोलनरत पक्षं सहमति वयेत आनाकानी यानाच्वंगु खनेदुसां दुने धाःसा सरकारं न आन्दोलनरत पक्षयात सहमति हयेत स्वयाच्वंगु खनेदु न अधिकार बी हे चाहे जूगु खनेदु ।

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.