All for Joomla All for Webmasters

ने.सं. ११३६ यंलागा अष्टमी

देय् दबूया सुनिश्चित भविष्य गुकथं ?

काठमाडौं जिल्ला कार्यालयस दर्ता जुयाच्वंगु नेवाःतय्गु राष्ट्रिय संगठन नेवाः देय् दबूया दिनाच्वंगु खुक्वःगु अधिवेशन आः दांग जिल्लाय् थ्व हे बैशाख महिनाय् जुइगु समाचार नेवाः ख्यलय् चर्चा जुयाच्वंगु दु । युद्धस्तरं तयारी न्ह्याकाच्वन धाःगु उगु तयारीया झ्वलय् छन्हुं हे प्यंगू जिल्लाय् जिल्ला अधिवेशन क्वचायेकूगु समाचार नं पिदंगु दु । नेवाःतय्गु हक अधिकार व विकासया निंतिं थुलि हे गतिं ज्या न्ह्यानाच्वंगु खःसा नेवाःतय्गु संगठन गुलि सशक्त जुइगु खः अनुमान तकं याये फइगु स्थिति मदु । नेवाः देय् दबूया अधिवेशन विधान सम्मत जुइगु दावी आःया विधान सम्मत (?) पदाधिकारीतय्गु दु ।

तर विधानया ब्वहलय् बन्दुक पाछायाच्वंपिं पदाधिकारीतय्गु गतिविधिं असन्तुष्ट जुयाः विधान अधिवेशन याःगु चितवन जिल्लाया नेवाः देय् दबूया पदाधिकारीतय्सं आः संशोधित धयातःगु विधान जालझेलया प्वः जूगु कारणं उगु संशोधन विधान स्वीकार्य मजूगु विज्ञप्ति पित हयेधुंकूगु दु । मेखे प्रदेश नं. ४ य् दुगु ११ गू जिल्ला मध्ये गोर्खा, कास्की, लमजुंग, म्याग्दी, नवलपरासी, पर्वत, स्यांग्जा व तनहुँया सम्पूर्ण नेवाः खलः पुचःतय्सं थुगु अधिवेशनय् ब्वति मकायेगु धकाः नेवाः देय् दबूया केन्द्रीय कार्यालयय् पौ हे छ्वया हये धुंकूगु अवस्था दु । माला वन धाःसा प्रदेशस्तरीय नेवाः खलः पुचःतय्गु संघ नीस्वनाः न्ह्याः वने मालीगु अवस्था तकं दुगु थुकी संलग्न मनूतय्सं धयाच्वंगु दु ।

अथे खःसां थनया न्हापांनिसें ज्या यानाच्वंगु खलःपुचःया दुजःपिनिगु ब्वति मदुसां न्हूपिं मनूत दुथ्याकाः जिल्ला अधिवेशन यायेगु व उकियात हे मान्यता बीगु ग्वसाः जुयाच्वंगु खनेदु । थुकिं नेवाःतय्त गुलित छधी छप्पँ याइ, थ्व चिन्तनीय विषय खः । नेवाःतय्गु भाषा, संस्कृति व अधिकार संवद्र्धनया निंतिं दयेकातःगु थ्व संगठन मुक्कं नेवाःतय्गु वृहत हितया निंतिं खः । थ्व सरकारया नियम व नीति नालाः नेवाःतय्गु अधिकार न्ह्याक्व हे क्वपालाः संस्थाया अस्तित्व ल्यंका तयेत मखु । नेवाःतय्गु राष्ट्रिय संगठनं भावनात्मक रुपं देय्न्यंकंया नेवाःतय्त छप्पँ छधी यायेगु निंतिं खः कि निश्चित मनूतय्गु निहित स्वार्थपूर्तिया निंतिं खः, सकल नेवाःतय्सं चिन्तन यायेमाःगु आवश्यकता दु ।

देय् दबूया स्थापनाकालंनिसें संलग्न जुया वयाच्वंगु खलःपुचःत देय् दबुली मन्ह्यनीगु खःसा थुकिया समाधान नं माले मालीगु आवश्यक जुइ । नेवाः देय् दबूया आःया अधिवेशन सहमतिया अधिवेशन जुइमाःगु खँय् विवाद मदु । आःया संशोधित विधानं नेवाःतय्गु एकतायात गुकथं क्वातुकी धयागु खँया चिन्तन जुइमाः । विधानया लिधंसाय् आः नेवाःतय्गु प्रमुख शक्ति जुयाच्वंगु जातीय खलः पुचःयात बहिष्करण जुइ धुंकाः थुगु शक्तियात संचय याना तयेगु निंतिं गज्याःगु भूमिका जुइमाः धयागु छलफल आः तक जुयाच्वंगु मदुनि । आःया अधिवेशन विधान सम्मत यायेगु धकाः दावी यानाच्वंपिंसं विधानय् लिकयातःगु जातीय खलः पुचःतय्त मतदान याकल धाःसा अन विवाद ब्वलनीगु निश्चित खः ।

नेवाः जातीय संगठनतय्सं जिमित पिने तयाः विधान छाय् संशोधन याना हयाः धकाः न्ह्यसः मात्र तयेवं हे थुकिया उचित लिसः आःया पदाधिकारीतय्सं बी फइगु स्थिति मदु । जातीय संगठनतय्गु ऐक्यवद्धता बिना नेवाःतय्गु राष्ट्रिय संगठनया औचित्य मदु । नेवाः देय् दबूया कार्यसमितिया क्वःछिनाकथं दांगय् जुइगु अधिवेशनया निंतिं ग्वसाः खलः नीस्वनाः ज्या न्ह्याकूगु खःसां लिपा ग्वसाः खलःयात हे कयाः विवाद ब्वलन । उकियात पंगु यानाः आः कार्य समितिया हे सक्रिताय् अधिवेशन तयारी जुयाच्वंगु खनेदु । विधान सम्मत यायेगु नामय् केवल मतदान जक यानाः नेतृत्व ल्ययेगु ज्यां नेवाः देय् दबूयात जीवन्त याये मफइगु निश्चित दु ।

उकिं नेवाः देय् दबूयात स्वच्छन्द यायेगु निंतिं नं थुकी असन्तुष्ट लगायत आः विवादित जुयाः पिने च्वनाच्वंपिं फुक्क पक्षयात कःघानाः अधिवेशन क्वचायेके माःगु दु । थुकिया निंतिं सकलें वीन–वीन पोजिसनय् थ्यंकेत सहमतिया कार्य समिति जुइमाः । मेखे अङ्कगणितीय मतदान जक जुल धाःसा थुकिं सुयातं गन्तब्यय् मथ्यंकीगु खँय् होशियार जुइमाः । नेवाः देय् दबूयात गतिमान यायेगु निंतिं थुकिया संरक्षक, सल्लाहकारपिंसं आः भूमिका म्हितेमाःगु अपरिहार्य ई वःगु दु । वर्तमान यथास्थितियात न्ह्यब्वयाः आःया परिस्थिति व संकटमोचनया निंतिं ज्या जुइमाः । सुं मनू पक्षय् वा विपक्षय् वनी धकाः ग्याःचिकु पहः कयाच्वनेगु थ्व ई मखु ।

आःया ईयात संक्रमणकालीन ईकथं कयाः थुकिया समाधान मालेमाः । मखु छखेर जबर्जस्ती हे सुनां यायेगु सोच दयेकाच्वंगु वा विधानया लिधंसाय् थःपिं आधिकारिक व थःपिनिगु हे कार्य सम्पादन जायज धकाः च्वना च्वनेगु खःसा देय् दबूया भविष्य सुनिश्चित मदया वनीगु सम्भावना आपालं दया वइ । उकिं ई ल्वयेक ज्या यायेगु, स्थितियात स्वीकार यायेगु हे आःया निंतिं उत्तम उपाय खः । नेवाःत हरेक ख्यलय् विभाजित जुया वन धयागु भ्रम जनमानसय् ब्वलनाच्वंगु इलय् थुज्वःगु सहमति न्ह्यब्वयाः नेवाःतय् दुने एकता दु धयागु खँयात उला बीगु आःया आवश्यकता खः ।

थज्याःगु ज्याय् सु क्वय् लात, सु द्यःने लात धकाः ल्याः तयाच्वनेगु ई मखु । सकसिनं बिचाः याये । सकारात्मक लिच्वःपाखे न्ह्याः वने । नेवाः एकताया निंतिं नेवाः नेतृत्वतय्सं माःकथं माःगु इलय् पलाः ल्ह्वनेमफुत धाःसा थुमिगु औचित्य व विश्वसनीयतायात कयाः नं न्ह्यसः ब्वलनीगु स्वाभाविक हे जुइ ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.