All for Joomla All for Webmasters

ने.सं. ११३६ यंलागा अष्टमी

स्थानीय चुनावया निंतिं मोर्चाबन्दी

यदि आःया राजनीतिक लकसय् तःधंगु हिउपाः मवःसा थ्वहे वालय् सरकार व मधेशी मोर्चा दथुइ छगू सहमति जुइफु । छुं ई न्ह्यवंनिसें निगुलिं पक्षया राजनीतिक नेतातय् सक्रियताय् जुयाच्वंगु सहमतिया कुतः सम्भवतः थ्वहे वाःया दुने सफल जुइफु । निगुलिं पक्ष दथुइ नागरिकता, भाषा, राष्ट्रियसभाया प्रतिनिधित्व, राष्ट्रियसभाया गठनया निंतिं निर्वाचन मण्डलय् स्थानीय तहया प्रतिनिधित्व चीकेगु कथं संविधान संशोधन यायेगु सहमतिया खाका तयार जुयाच्वंगु जुल । संविधानया धारा २७४ यात धाःसा गुकथं संशोधन यानाः मिलनबिन्दू मालेगु धइगु बारे सहलह जारी दनि ।

सरकारं संसदय् दर्ता यानातःगु संशोधन प्रस्ताव–यात लित कयाः संशोधन सहितया प्रस्ताव दर्ता यायेगु व उकियात प्रमुख प्रतिपक्षी दल सहितया सहमतिइ पारित यायेगु कथं कुतः जुयाच्वंगु जुल । सिमांकन फेरबदलया सवालय् धाःसा छगू शक्तिशाली आयोग नीस्वनाः स्वलाया दुने प्रतिवेदन न्ह्यब्वइगु कथंया सहमति यायेगु मनस्थितिइ निगुलिं पक्ष खनेदु । सहमतिया निंतिं जुयाच्वंगु कुतः स्वयेगु खःसा बैशाख ३१ गतेयात क्वःछिनातःगु स्थानीय तहया चुनावया लकस बुलुहुँ निर्माण जुयाच्वंगु आभास दयावःगु दु ।

छुं ई न्ह्यः जक सरकारं एकपक्षीय तरिकां स्थानीय तहया चुनावया मितिया घोषणा जुइवं चुनाव जुइगु खः वा मखु, आन्दोलनरत दलत चुनावय् ब्वति काइगु खः वा मखु वा थज्याःगु स्थितिइ चुनाव जूसा उकिया लिच्वः गज्याःगु जुइ धइगु खँय् सर्वसाधारणतय्सं चिउताः प्वंकाच्वंगु खः । सहमतिया लकस निर्माण जुया वनाच्वंगुलिं आः चिउताःया विषय स्थानीय तहलय् उम्मेदवार जुइपिं सु जुइ ? पार्टीं सुयात टिकट बी ? चुनावी माहोल सुयागु पक्षय् वनी ? चुनावय् सुनां बहुमत हइ ? थज्याःगु विषयत आः सकभनं चर्चाय् वयाच्वंगु दु ।

विशेष यानाः स्थानीय तहया चुनाव झिंगुदँ लिपा जुइत्यंगुलिं दक्व राजनीतिक दलतय्त आः जुइत्यंगु चुनावयात तसकं महत्व बियाच्वंगु दु । आः जुइगु स्थानीय तहया चुनावं कन्हय् प्रदेशया चुनाव व संसदया चुनावय् तकं प्रभाव लाकीगुलिं नं सतिक वयाच्वंगु चुनाव महत्वया विषय जुया बिउगु दु । देशय् तच्वयेक धुव्रीकरण जुयाच्वंगु व मतदातात नं धुव्रीकरणया शिकार जुयाच्वंगुलिं सुयागु पक्षय् अप्वः मत कुहां वनी धइगु अनुमान अःपुक यायेत थाकु । थःथःगु पक्षय् मतदातात
सालेत फुक्क राजनीतिक शक्तित लगे जुइगु निश्चित खः ।

थुखे पहिचान पक्षधर शक्तित अझ विभाजित जुयाच्वंगु अवस्थाय् पहिचान सहितया संघीय पक्षधर मतदातात धाःसा सुयात मतदान यायेगु धइगु विषयय् ‘कन्फ्यूज्ड’ जुयाच्वंगु दु । अथेखःसां पहिचान पक्षधरतय् निंतिं नं स्थानीय चुनाव उलि हे महत्वपूर्ण जू । देय् संघीय प्रणाली अन्तर्गत वनेधुंकूगु व वहे कथं स्थानीय तहया निर्वाचन नं जुइत्यंगुलिं पहिचान पक्षधर शक्तितय्सं थुगु निर्वाचनय् अप्वः मत हयेत आवश्यक जू । अप्वः मत हयेत आवश्यक जूगु खँ झीसं वाचायेका च्वंसां अझ नं पहिचान पक्षधर शक्तित एकीकृत जुया वनेगु लकस धाःसा निर्माण मजूनि । निगूगु संविधानसभाय् पहिचान पक्षधर शक्तित एकीकृत जुइमखुगुलिं वःगु लिच्वःयात बिचाः यानाः आः छगू हे मोर्चा दयेकाः स्थानीय तहया निर्वाचनय् ब्वति कायेमाःगु खनेदु ।

देय् संघीय प्रणाली अन्तर्गत वनेधुंकूसां अझ नं संघीयतायात कार्यान्वयन व व्यवस्थित धाःसा याये ल्यं दनिी । सायद संघीयताया व्यवस्थापन संघीयता विरोधीतय्सं पक्कां याइ मखु जुइ । उकिया निंतिं संघीयता पक्षधरतय्सं हे थःगु प्रभाव व प्रभुत्व सहित स्थानीय निकायय् दुहां वनेमाः । उकिं संघीयता व पहिचान पक्षधर जनआधारया बलय् नेपाः संघीय प्रणाली देय् जूगुलिं संघीयतावादी व पहिचान पक्षधर शक्तितय् निंतिं थुगु स्थानीय तहया निर्वाचन तसकं महत्वपूर्ण जुया बिउगु दु ।छुं ई न्ह्यः जक स्थानीय तह पुनःसंरचनाया निंतिं नीस्वंगु आयोगं ७४४ गू न्हूगु स्थानीय तह दुगु प्रतिवेदन न्ह्यब्वःगु खः ।

संघीय पक्षधर व पहिचान पक्षधरत मदुगुलिं अज्याःगु प्रतिवेदनय् न्ह्यब्वःगु स्थानीय तहतय् नां तकं अनया स्थानीय भाय् व संस्कृतियात आधार कयाः तयातःगु मदु । स्थानीय तहया नां तकं मौलिकताया आधारय् मतयाच्वंगु इलय् कन्हय् पहिचान विरोधीतय् हालिमुहाली जूसा स्थानीय भाय्यात ज्याखँया भाय् कथं छ्यली धइगु छुं ग्यारेन्टी मदु । भाय् जक मखु संस्कृतिइ जुयाच्वंगु अतिक्रमणयात पनेगु ग्यारेण्टी नं छुं दइ मखु । स्थानीय तहलय् स्थानीय भाय्यात हे थाय् मबीगु, अनया संस्कृतिया बचाउ मयाइगु जूसा अज्याःगु स्थानीय तह केवल नामय् जक स्थानीय तह जू वनी । नापं संघीय व्यवस्था कार्यान्वयन जुइगु स्वयां झन् जटिल अवस्थाय् लाः वनी ।

मेखे स्थानीय तहया निर्वाचनया निंतिं आः चर्चाय् वयाच्वंपिं उम्मेदवारतय् नां स्वयेगु खःसा अन स्थानीय रैथाने मनूत स्वयां पिनेयापिं मनूतय् नां अप्वः चर्चाय् वयाच्वंगु दु । नेवाःतय् बाहुल्यता दुगु येँ महानगरपालिका तकं गैर नेवाः व गैर रैथाने मनूतय्त उम्मेदवार दयेकेगु धकाः जुयाच्वंपिं पहिचान विरोधीतय्सं स्वनिगः दुनेया मेमेगु महानगर व नगरपालिकाय् नेवाः उम्मेदवार दयेकीगु ग्यारेण्टी मदु । थज्याःगु इलय् स्थानीय मनूतय्त हे स्थानीय तहलय् प्रतिनिधित्व दयेकेमाः धकाः ल्वाइपिं केवल पहिचान पक्षधर शक्तित जक जुइ ।

थुगु ल्याखं नं पहिचान पक्षधर शक्तित छगू हे मोर्चा दयेकाः चुनावी मैदानय् कुहां वनेमाःगु खनेदु । स्थानीय तहया चुनाव पहिचान विरोधीतय् ल्हातय् वनीगु धइगु झीगु थाय्, भाय् व संस्कृतिया निंतिं खतरा जुइगु ला जु हे जुल । संघीय व्यवस्था पहिचान विरोधीतय् माग हे मखुगुलिं अज्याःगु संघीय व्यवस्थायात कार्यान्वयन यायेत ग्वाहालि याइ धकाः नं कल्पना याये फइ मखु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.