All for Joomla All for Webmasters

ने.सं. ११३६ यंलागा अष्टमी

धर्मोदय सभाया न्हय्स्वक्वःगु वार्षिक साधारणसभा


नेपाःया राष्ट्रिय बौद्ध संस्था नापं विश्व बौद्ध भातृत्व संघ नेपाल क्षेत्रीय केन्द्र धर्मोदय सभाया न्हय्स्वक्वःगु वार्षिक साधारणसभा आः नकतिनि जुल । श्रीकीर्ति विहार किपुलिइ जूगु साधारणसभाया उलेज्या मूपाहां लुम्बिनी विकास कोषया उपाध्यक्ष भिक्षु निग्रोधं बोधिदीप प्रज्वलन यासें यानाबिज्याःगु खः । साधारणसभाया उलेज्याय् मूपाहां कोषया उपाध्यक्ष भिक्षु निग्रोधं बुद्ध धर्मया संरक्षण व संवद्र्धन यायेगु ज्याय् धर्मोदय सभाया योगदानया चर्चा यानाबिज्यासें लुम्बिनी विकास कोषं सम्पादन याना वयाच्वंगु थीथी गतिविधिया बारे नं बःचाहाकलं जानकारी बियाबिज्याःगु खः ।

वसपोलं धर्मोदय सभां राष्ट्रिय व अन्तर्राष्ट्रिय बौद्ध जगतय् कायम यानातःगु छवियात ध्यानय् तयाः न्ह्याः वनाः सफलता प्राप्त याये फयेमा धकाः नं भिंतुना बियाबिज्यात । साधारणसभा न्ह्यः बौद्ध धर्मया स्वंगुलिं निकायपाखें परित्राण, मंगलपाठ व स्वस्तिवाचन यायेगु ज्या जूगु खःसा भिक्षु निग्रोधपाखें पंचशील बियाबिज्याःगु खः । महासचिव सागरमान वज्राचार्यं लसकुस यासें बौद्ध धर्मया प्रवद्र्धनया निंतिं धर्मोदय सभां याना वयाच्वंगु थीथी गतिविधियात कयाः जानकारी बियादीगु खः । वय्कलं जनआन्दोलनपाखें उपलब्धि स्वरुप प्राप्त जूगु धर्मनिरपेक्षता व गणतन्त्र नेपाःया समुन्नतिया निंतिं न्ह्याबलें लगे जुयाच्वनेत नं इनाप यानादिल ।


ज्याझ्वलय् सांसद राजन के.सीं. साधारण सभाया सफलताया कामना यासें संविधान प्रदत्त अधिकार व धार्मिक स्वतन्त्रताया सम्मान यायेमाः धयादिल । बौद्ध गुम्बा छाउनीया प्रमुख लामा श्रेष्ठ भिक्षु कालसांगं साधारणसभाया सफलताया कामना याना बिज्याःगु खः । सभापतिया आसनं धर्मोदय सभाया उपाध्यक्ष इन्द्रबहादुर गुरुंगं धर्मनिरपेक्षता विरुद्ध सः ल्ह्वनेगु दष्कार्य खः धासें थुकिया विरुद्ध सकलें छप्पँ जुइमाःगु खँय् बः बियादिल ।निगूगु सत्रय् महासचिव वज्राचार्यं वार्षिक प्रतिवेदन व कोषाध्यक्ष त्रिरत्न तुलाधरं आर्थिक प्रतिवेदन नापं लेखा परीक्षणया प्रतिवेदन न्ह्यब्वयादीगु खः ।

ज्याझ्वलय् सभाया सम्बन्धन प्राप्त बौद्ध संस्था युवक बौद्ध मण्डलया अध्यक्ष राजेश शाक्य व बौद्ध महिला संघ, नेपालया महासचिव कृष्णकली शाक्यं साधारणसभायात भिंतुना देछासे थःथःगु संगठनया गतिविधिया बारे जानकारी बियादीगु खः । अथे हे सभाया थीथी कचापाखें नं थःथःपिनिगु प्रतिवेदन नं न्ह्यब्वःगु खः । साधारणसभाय् थुगु दँय् दिवंगत जुयादीपिं दुजःपिं नापं बौद्ध समाजया अतिकं सम्मानित व्यक्तित्व प. बद्रीरत्न वज्राचार्यया पुण्यस्मृतिइ दुःख प्वंकुसे छगू मिनेट मौन धारण नं याःगु खः । निगूगु सत्र उपाध्यक्ष सुचित्रमान शाक्यया सभापतित्वय् जूगु खःसा ल्याय्म्हम्ह भिक्षु सर्वजीन लामां धर्मदेशना बियाबिज्याःगु खः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.