All for Joomla All for Webmasters

ने.सं. ११३६ यंलागा अष्टमी

ब्याक गियरय् नेपाःया राजनीति

नेपाःया राजनीतिइ तःतधंगु हिउपाः वयेत ताः ई मकाः । झिदँय् छक्वः ला न्ह्याबलें छगू न छगू कथंया राजनीतिक फेरबदल जुयां तुं च्वंगु दु । छगू दशकया दुने हिउपाः वइगु कारणं नेपाःया राजनीतिं गबलें स्थिरता काये मफुत । झिदँय् छक्वः जुइगु हिउपाः धाःसा न्ह्याबलें अग्रगमनपाखे जक जूगु धाःसा मखु । ई न्ह्यःने वनाच्वंसां झिदँय् छक्वः जुइगु छुं छुं घटना धाःसा प्रतिगामी नं जुयाच्वंगु जुल । थुकिं यानाः नेपाःया राजनीति झन् लिउने लाका नं च्वंगु जुल । थज्याःगु घटनां यानाः झिदँ न्ह्यः तक परिवर्तनया संवाहक जुयाच्वंपिं झिदँ लिपा उपिं यथास्थिति व प्रतिगामी बिचाःया प्रतिनिधित्व याइपिं जुइगु व झिदँ न्ह्यः तक प्रतिगामी शक्ति जुयाच्वंपिं झिदँ लिपा हानं बल्लाःगु राजनीतिक शक्ति कथं परिचित जुइगु यानाच्वंगु दु ।

राजनीतिक परिवर्तन लिसें राजनीतिक पार्टी व राजनीतिक नेतात गबलें बल्लाःगु शक्ति, गबलें कमजोर शक्ति जुइगु यानाच्वंगु दु । झिदँ न्ह्यः निगूगु जनआन्दोलनया इलय् जनताया दथुइ छगू कथं उत्साह, जोश व विश्वासया वातवरण ब्वलंगु खः, न्हूगु नेपाःया निंतिं । गणतन्त्र, धर्मनिरपेक्ष, संघीय व समावेशिता सहितया अग्रगामी न्हूगु नेपाःया निंतिं । न्हूगु नेपाःया परिकल्पना नापं राजसंस्था व जुजु लिक्कया नेतातय् भविष्य नेपाःया राजनीतिइ मदइगु अनुमान याःगु खः । तर थौं छगू दशक लिपा जनआन्दोलनया इलय् ज्ञानेन्द्र शासनया गृहमन्त्री जुयाच्वंम्ह कमल थापा हाकनं सरकारया छगू महत्वपूर्ण पदय् थ्यन । वंगु सरकारय् उपप्रम नापं परराष्ट्र मन्त्री जुयाच्वंम्ह थापा आः नं उपप्रम नापं स्थानीय विकास मन्त्री जुयाच्वंगु दु ।

जुजु सहितया गणतन्त्र व सनातन हिन्दू राज्यया पक्षय् वकालत याना जूम्ह थापा छगू दशक लिपा हानं छक्वः नेपाःया राजनीतिइ छम्ह महत्वपूर्ण खेलाडी कथं पिहांवःगु दु । जनआन्दोलन सफल जुइधुंकाः कमल थापा हानं सत्ताय् वइ धकाः सुनां बिचाः तकं मयाःगु जुइमाः । अय्नं नेपाःया राजनीतिक वातावरण गनं गन थ्यनी धइगु अनुमान तकं याये मफइगु कथं न्ह्याः वनाच्वंगु दु । जनआन्दोलनं खारेज यायेधुंकूगु राजतन्त्र व हिन्दू राज्यया माग ज्वना जूम्ह थापा आः वहे एजेण्डया बलय् छगू बल्लाःगु वैकल्पिक शक्ति कथं न्ह्यःने वयाच्वंगु दु । विडम्वना ! गणतन्त्र व धर्मनिरिपेक्ष नेपाःया संविधानया सपथ नयाः मन्त्री जूम्ह थापा आः उगु हे संविधानया भावनाया अःख जुजु व हिन्दू राज्यया वकालत यासें मन्त्री जुयाच्वंगु दु ।

मन्त्री पदय् च्वनाः हे देय्या संविधान अःख प्रचार प्रसार यायेगु ज्या यानाच्वंसां शाही शासनया गृहमन्त्रीयात गणतन्त्र नेपालय् धाःसा प्रशस्त छुट बियातःगु दु ।प्रतिगमनया एजेण्डा ज्वनाच्वंम्ह कमल थापा थें अग्रगमनया विरोध यानाच्वंम्ह केपी शर्मा ओली व एमालेया नं थौंकन्हय् यक्व तडकभडक खनेदु । एमालें नकनिति क्वचायेकूगु मेची–महाकाली अभियान लिपा एमाले नेतातय् स्वभावय् यक्व फरक वःगु खनेदु । खतुं एमालें मेची–महाकाली अभियानयात राष्ट्रियताया निंतिं धकाः प्रचार यात । अथे खःसां थुगु अभियानया मू एजेण्डा धइगु एमाले अग्रगमनया पक्षय् मदु धकाः क्यनेगु हे खः ।

मेची निसें महाकाली तक याःगु तःगूमछि सभायात सम्बोधन यासें एमाले नेतातय्सं राष्ट्रियताया स्वयां नं अग्रगामी एजेण्डाया विरोधय् बिचाः प्वंकूगु खनेदत । अज्याःगु सम्बोधनया आधारय् स्वयेगु खःसा एमालें अग्रगामी व समावेशी नेपाः दयेकेगु निंतिं छुं भचा नं कम्प्रोमाइज याये फइ मखु धकाः सन्देश बिउगु दु । छगू दशक थुखे एमालेया गति नं अग्रगमनपाखे स्वयां झन् लिउने वयाच्वंगु प्रष्ट जुइधुंकल । चाहे व जनतां प्रत्यक्ष ल्ययेगु कार्यकारी प्रमुखया सवाल जुइमा वा पहिचान सहितया संघीय व्यवस्थाया । एमालें न्हापांगु संविधानसभाय् राज्य पुनःसंरचना यायेगु निंतिं पहिचान व सामथ्र्य सहितया झिंन्यागू प्रदेशया खाका न्ह्यब्वःगु खः ।

लिपा संविधानसभां झिंप्यंगू प्रदेशया खाका न्ह्यब्वयेवं एमालें नेतात थःपिंसं हे न्ह्यब्वःगु एजेण्डाया अःख सार्वजनिक रुपं विमति प्वंकूगु खः । लिपा झिंन्यागू प्रदेशया विकल्पय् न्हय्गू प्रदेशया खाका न्ह्यब्वःगु एमालें पहिचानया आधारयात बेवास्ता यानायंकूगु खः । उखे शासकीय स्वरुपय् प्रत्यक्ष निर्वाचित कार्यकारी प्रधानमन्त्रीया पक्षय् दुम्ह एमाले उगु एजेण्डापाखें नं ब्याक जुयाः हानं संसदीय व्यवस्थाया पक्षय् लबिङ याःगु खः । लुमंकेबहः जू, निगूगु जनआन्दोलनया इलय् प्रायः निष्कृय जुयादीम्ह व उगु आन्दोलनया बलय् गणतन्त्र सम्भव मदु धकाः अभिव्यक्ति बियादीम्ह केपी शर्मा ओली थौं एमालेया अध्यक्ष जुयाच्वनादीगु दु ।अले वय्कलं हे नेतृत्व यानाच्वनादीगु दु, एमालेया प्रतिगमन पाखेया यात्रा ।

हलिंन्यंकं कट्टर पन्थी व अनुदार खेमाया नेतृत्व यानाच्वंपिं नेतातय् उदय जुयाच्वंगु इलय् नेपालय् नं प्रतिगमनया एजेण्डा ज्वनाच्वंपिं अनुदार नेता व राजनीतिक दलया हालीमुहाली जुयाच्वंगु दु । छगू दशक न्ह्यः स्थापित जूगु एजेण्डात संस्थागत जुइ मलाःनिवं हानं पुलांपिं अनुदार खेमाया हालीमुहालीं यानाः अग्रगामी एजेण्डात धरापय् लाःगु दु ।

गणतन्त्र, धर्मनिरपेक्षता, संघीयता, समावेशिता व राज्यया पुनःसंरचना थज्याःगु जनआन्दोलनया मागयात अनुदारवादी नेतातय्सं संस्थागत याके मबीत तःधंगु भूमिका म्हिताच्वंगु दु । छखे जुजु व हिन्दू राज्य थज्याःगु प्रतिगामी एजेण्डा ज्वनाच्वंम्ह कमल थापा दुसा मेखे थापा स्वयां अझ छपलाः न्ह्यःने अनुदार जुयाः पलाः ल्ह्वनाच्वंम्ह केपी शर्मा व एमाले दु । थज्याःगु अनुदारवादी नेतात हानं छक्वः नेपाःया राजनीतिइ हावी जुइगु धइगु नेपाःया राजनीति गाडी ब्याक गियरय् वनाच्वंगुया हे संकेत खः ।

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.