All for Joomla All for Webmasters

ने.सं. ११३६ यंलागा अष्टमी

देय् दबू आर्थिक अनियमितताय् (?)

नेवाःतय्गु राष्ट्रिय संगठन नेवाः देय् दबुलिं दिनाच्वंगु खुक्वःगु तःमुँज्या न्ह्याके धकाः निक्वः तक तिथि क्वःछीधुंकूगु खःसां आः हाकनं क्वःछिनातःगु तिथि दुने दांगय् अधिवेशन मजुइगु सुचं पित हयाः न्हूगु तिथि घोषणा याःगु दु । निक्वः तक लिछ्याःगु तःमुँज्या आः न्हूगु तिथिइ जुइ धयागु विश्वास नं गनं जुयाच्वंगु खने मदु । चैत ४ व ५ गतेया तःमुँज्या लिछ्याःगु कारण तःमुँज्याय् प्रतिनिधि जुयाः वइपिनिगु विवाद धयाच्वंगु दुसा थुगु विवाद ज्यंकेत आः तक छुं नं कुतः जुयाच्वंगु खनेमदु । देय् दबू कार्यसमितिया सर्वसम्मत निर्णयकथं खुक्वःगु तःमुँज्या ग्वसाः खलःयात ‘फुक्क’ कथंया अधिकार बियाः नं कार्यसमितिया मुँज्यां तःमुँज्या लिज्याःगु व न्हूगु तिथि घोषणा याःगु कारणं आः खुक्वःगु तःमुँज्या ग्वसाः खलःया छु हैसियत धयागु न्ह्यसः ब्वलंगु दु ।

तःमुँज्या ग्वसाः खलकं तःमुँज्याया निंतिं प्रतिनिधि आह्वान याःगु ज्यायात कार्यसमितिया निर्णयं बदर याना बीवं आः हाकनं तःमुँज्या ग्वसाः खलः सक्रिय जुइ फइगु खःकि मखु धयागु अन्यौल ब्वलंगु दु ।तःमुँज्या ग्वसाः खलकं छुं दिं न्ह्यः थःपिनिगु तयारी व थःपिंसं तःमुँज्याया निंतिं प्रतिनिधि आह्वान यानागु ज्या पना बीवं कार्यसमिति व तःमुँज्या ग्वसाः खलः लगायत देय् दबूया पूर्व पदाधिकारी, सल्लाहकार व संरक्षकपिनिगु मंकाः भेलाया ग्वसाः याःगु खःसा थुकियात कार्यसमितिया पदाधिकारी व संरक्षकपिंसं असहयोग यायेवं भेला एकपक्षीय थें जक खने दत ।

छगू हे टेबुलय् च्वनाः तःमुँज्याया तयारी ज्या न्ह्याकाच्वनागु खःसां थःपिंत जानकारी हे मबिसे, तयारीया स्थितियात मूल्याङ्कन हे मयासे एकपक्षीय रुपं कार्यसमितिं आः जुइत्यंगु तःमुँज्याया प्रतिनिधि प्रवेशयात पना बिउगु द्वपं तःमुँज्या ग्वसाः खलकं याःगु दु ।
दिनाच्वंगु तःमुँज्या हानं यायेगु तिथि तःक्वः तःक्वः घोषणा यानाः नं तःमुँज्या यायेत कार्य समितिया पदाधिकारीत इच्छुक मजुयाच्वंगुया मू कारण देय् दबू दुने तःधंगु आर्थिक अनियमितता जुयाच्वंगु व उकिया खुलासा जुइगु भयया कारणं हे तःमुँज्या मजुयाच्वंगु बारे नं आः टिकाटिप्पणी जुयावःगु दु ।

नेवाः देय् दबू थनया स्थानीय विकास कार्यालयय् दर्ता जुयाच्वंगु व थुकियात हरेक दँय् आयब्यय विवरण पारित यानाः नवीकरण यायेमाःगु प्रावधान दु । तर नेवाः देय् दबूया तःमुँज्या दिनाच्वंगु हे न्यादँ दयेधुंकूगु दुसा थुकिया आयब्यय विवरण मात्र कार्यसमितिं पारित यानाः थःगु ज्या न्ह्याकाच्वंगु खनेदु । थुकिया दकलय् तःधंगु न्ह्यसः धयागु देय् दबूया खुक्वःगु तःमुँज्या आनन्दकुटी स्कुलय् जूगु इलय् १२०० स्वयां अप्वः प्रतिनिधितय्गु सहभागिता दुगु खः । प्रत्येक प्रतिनिधितय्के म्हतिं १००० तका प्रतिनिधि शुल्क काःगु खःसा हरेक खलः पुचःया सदस्य संख्याया लिधंसाय् म्हतिं १०÷– तका पुलेमाःगु प्रावधान नं दुगु खः ।

थुगु ल्याखं आनन्दकुटीया अधिवेशनय् जक १६ लाख स्वयां अप्वः दां आम्दानी दुसा उकिया ल्याःचाः आः न्यादँ दयेधुंकाः नं सार्वजनिक याःगु मदुनि । थ्व ल्याःचाःया अनुमोदन तःमुँज्यापाखें जुइमाःगु प्रावधान विधानय् तप्यंक हे न्ह्यथनातःगु दु । यदि थ्व रकम वास्तविकरुपं हे अपचलन जूगु खःसा आःया फुक्क कार्यसमितिया दुजः, संरक्षक व सल्लाहकारपिं नं जिम्मेवार जुइगु खँय् शंका मदु । थुज्वःगु हे अनियमितता सार्वजनिक जुइगु भयया कारणं तःमुँज्या यायेत देय् दबूया पदाधिकारीपिं इच्छुक मजूगु खँ चर्चाया विषय जुयाच्वंगु दु । यदि थ्व वास्तविकता मखुसा आःया कार्यसमितिं आम जनताया दुने दयाच्वंगु भ्रम (?) चीकेत जूसां नं तःमुँज्या यायेत कार्यसमितिं तत्परता क्यने माःगु खः ।

नेवाः देय् दबू नेवाःतय्गु राष्ट्रिय संगठन खः । थुकिं देय्न्यंकंया नेवाःतय्गु संगठनया हक अधिकार प्राप्तीया निंतिं आन्दोलनरत जुइमाःगु स्थिति दु । तर कार्यसमितिया अकर्मण्यताया कारणं नेवाः आन्दोलनयात हे प्रतिकुल लिच्वः लाकाच्वंगु एकमत बिचाः थुकिया सल्लाहकारतय्गु दु । दिनाच्वंगु तःमुँज्या न्ह्याकाः राष्ट्रिय संगठनयात चुस्त यायेमाःगु आवश्यकतायात सकसिनं वाःचायेकाच्वंगु दुसा छगू वा मेगु त्वह तयाः देय् दबूया अधिवेशन लिछ्यायेगु प्रपञ्च जुयाच्वंगु बांलाक हे वाःचायाच्वंगु दु ।
देय् दबू दुने जुयाच्वंगु अनियमितता व विधान मिचाइयात कयाः सकसिनं सः तयाच्वंगु दु । कार्य समितिया गतिविधियात निर्देशन व नियमित यायेगु भाला संरक्षकपिनिगु खः ।

तर देय् दबूया निम्ह संरक्षकपिं लक्ष्मण राजवंशी व मल्ल के. सुन्दरपिंसं कार्यसमितिं याःगु अनियमित ज्यायात जक संरक्षण यानाच्वंगु खनेदत । देय् दबूया संरक्षक धयागु समस्त नेवाःत दुथ्यानाच्वंगु राष्ट्रिय संगठनया नं संरक्षक खः, तर वय्कःपिंसं क्यनाच्वंगु उदासिनतां थ्व अनियमित ज्याय् रहश्यमय न्ह्यसः थनाच्वंगु दु । देय् दबूया दिनाच्वंगु खुक्वःगु अधिवेशन आः न्हूगु तिथिइ जुइ धयागु खँया आशंका अनेक दनि । दकलय् न्हापां ला वर्तमान कार्यसमितिया इच्छा शक्तिया कमीया कारणं हे थ्व तःमुँज्या याइ मखु धयागु अधिकांश दुजःपिनिगु आशंका दु । मेखे मुलुकया वर्तमान राजनैतिक माहौल व चुनावया कारणं नं आः दांग थेंजाःगु थासय् थ्व चुनाव जुइ धयागु खँय् शंका दु ।

मुलुकय् स्वंगू मछि चुनाव यायेमाःगु अवस्थाय् न्ह्याबलें हे राजनीतिक सकस ब्वलनाच्वनीगु निश्चित खः । मेखे वैशाख थेंज्याःगु गर्मीया इलय् अनया तापक्रमया कारणं आपालं मनूत ब्वति कायेगु इच्छा दयाः नं मथ्यनीगु सम्भावना आपालं दु । उकिं कोरमया न्ह्यसः दन धाःसा परिणाम छु जुइ ? उकिं थ्व फुक्क समस्या समाधान यायेत क्वःछिनातःगु इलय् दांगय् तःमुँज्या जुइ मफुसा येँय् हे तःमुँज्या न्ह्याकेमाःगु अवस्था दु । थुकियात सम्बन्धित पदाधिकारीतय्सं सकारात्मककथं चिन्तन याइ धयागु आशा याये । दिनाच्वंगु तःमुँज्या सुचारु मजूतले देय् दबूया अन्यौल नं न्हना मवनीगु निश्चित खः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.