All for Joomla All for Webmasters

ने.सं. ११३६ यंलागा अष्टमी

तःमुँज्या लिछ्यायेगु अधिकार गनं वल ?

नेवाः देय् दबूया पलिस्था वि.सं. २०५१ सालय् जूगु खः । विधान कथं प्रत्येक स्वदँय् अधिवेशन मार्फत न्हूगु नेतृत्व ल्यइ । वहे कथं २०६५ साल चैत्र ७, ८ व ९ गते धनवmुटाय् न्याक्वःगु अधिवेशन मार्फत भाजु नरेश ताम्राकारया अध्यक्षताय् न्हूगु नेतृत्व वःगु खः । प्रत्येक स्वदँय् जुइमाःगु तःमुँज्या थें नेवाः देय् दबूया खुक्वःगु तःमुँज्या २०६९ असोज ६, ७ व ८ गते आनन्दकूटी स्कूलय् जूगु खः । उगु महाधिवेशनय् महासचिवया प्रतिवेदन, कोषाध्यक्षया आर्थिक प्रतिवेदन व विधान संशोधनयात सुझाव सहित पारित यायेगु व पारित विधानयात तत्काल लागू यायेगु कि सीडीओपाखें अनुमोदन याकाः जक लागू यायेगु धइगु खँय् विवाद जुल ।

संस्थापन पक्ष तुरुन्त हे लागू याकेगु पक्षय् व मेपिं सीडीओयाथाय् दर्ता लिपा जक लागू यायेगु पक्षय् वन । निर्वाचन अधिकृत अधिवक्ता चन्द्रेश्वर श्रेष्ठं निर्वाचन सम्बन्धी ज्या यायेगु भाला अध्यक्षयात हे बीगु धायेवं अथे याये दइ मखु धकाः होहल्ला जुल । वहे इलय् संरक्षक मल्ल के. सुन्दरजुं खुक्वःगु महाधिवेशन स्थगित जूगु घोषणा यानादिल । गुगु थौं न्यादँ तक नं जुइ फयाच्वंगु मदुनि । अले करिब गुदँ तक नरेश ताम्रकार हे बिना अधिवेशन अध्यक्ष जुयाः च्वनाच्वंगु दु । थ्वहे दथुइ पुलांगु सकतां खँयात ल्वःमंकाः आः शुरुंनिसें हे ज्या न्ह्याकेगु धकाः पुलांपिं सल्लाहकारपिनि समेत सहमतिइ मिति २०७३ वैशाख १९ गते नारायणघाटय् विधान अधिवेशनं न्हूगु विधान पारित यात ।

थ्वहे विधान अधिवेशन मार्फत निर्वाचन मण्डल व अधिवेशन मिति २०७३ कार्तिक मसान्तय् यायेगु धकाः विधान अधिवेशनया हलं हे घोषणा यात । तर दुःखया खँ, अधिवेशनं पारित यानातःगु विधानयात तोडमरोड यानाः संरक्षक, सल्लाहकार व केन्द्रीय कमिटीया उपाध्यक्ष लगायत सुं हे केन्द्रीय दुजःतय्सं हे मसीक अध्यक्ष व ‘निमित्त महासचिव’ निम्हेसिया मिलोमतों प्यंगू किसिमया फरक फरक विधान प्रकाशनय् हल । थ्व बाहेक कार्तिकं याये धकाः घोषणा याना तःगु महाधिवेशन तकं मयासेंलि देय् दबूया संरक्षक व सल्लाहकारतय्गु बैठक च्वनाः कार्तिकं जुइ धाःगु महाधिवेशन छाय् मजूगु खः, मेगु महाधिवेशनया मिति याकनं तोके या धकाः पौ बीगु ज्या जुल ।

वयांलि २०७३ माघ ३ गते कुन्हु बैठक च्वनाः देय् दबू केन्द्रीय समितिं छुं महत्वपूर्ण निर्णयत यात । नेवाः देय् दबूया संरक्षक व सल्लाहकारपिं समेत उपस्थित जुयाः अध्यक्षया अध्यक्षताय् च्वंगु उगु बैठकं याःगु निर्णयत थथे खः – १) थ्वहे २०७३ साल चैत्र ४ र ५ गत शुक्रवाः व शनिवाः दाङ्गया घोराहीइ नेवाः देय् दबूया खुक्वःगु महाधिवेशन यायेगु निर्णय जुल । २) नारायणघाट चितवनय् जूगु विधान अधिवेशनं निर्णय याःपिं स्वम्ह दुजः जयवmुमार श्रेष्ठ, विराटनगर संयोजक, दुजः मनोज नेवाः खड्गी येँ, गणेशमान श्रेष्ठ टोखा व निम्ह थप मंगल महर्जन व वmुमारराज श्रेष्ठयात दुजः दयेकेगु निर्णय जुल ।

३) नेवाः देय् दबूया दिनाच्वंगु खुक्वःगु तःमुँज्या सुव्यवस्थित रुपं सम्पन्न यायेया लागिं भाजु बिजयप्रकाश तण्डुकारया संयोजकत्वय् क्वय् न्ह्यथनापिं १७ म्ह दुजः दुगु महाधिवेशन ग्वसाः खलः गठन जुल । दुजलय् विजय वज्राचार्य, दिपक शाक्य, माइलाबाबु द्यौला, रमेश वmुमार श्रेष्ठ, पूर्णकृष्ण श्रेष्ठ, यशोधा श्रेष्ठ, जितेन्द्र विलास बज्राचार्य, सुदर्शना दर्शनधारी, ज्योतिरत्न शाक्य, देवदास मानन्धर, विष्णु चित्रकार, माधव स्यस्यः, मचाराजा महर्जन, राजेस शाक्य, दिपक श्रेष्ठ व विनोद श्रेष्ठ च्वनादीगु दु । ४) देय् दबूया संरक्षक व सल्लाहकारपिं नं महाधिवेशन ग्वसाः खलःया संरक्षक व सल्लाहकार सरह जुइ । ५)

महाधिवेशन ग्वसाः खलःयात दाङ्गय् जुइगु खुक्वःगु तःमुँज्या व्यवस्थित रुपं सम्पन्न यायेत सर्वाधिकार सम्पन्न अधिकार बीगु निर्णय जुल । ६) महाधिवेशन यायेत रु. ५,००,००÷– न्यागू लाख तका बजेट निकासा यायेगु निर्णय जुल । ७) आः दुगु केन्द्रीय समितिं सङ्व्रmमणकालीन ज्या जक याइ । व, दीर्घकालीन लिच्वः लाइगु छुं नं ज्या याइ मखु धकाः निर्णय जुल । थुकथं मिति २०७३ माघ ३ गतेया केन्द्रीय समितिया बैठकं हे दिनाच्वंगु खुक्वःगु महाधिवेशन सम्पन्न यायेत सर्वाधिकार सम्पन्न ग्वसाः खलः दयेकूगु खः । देय् दबूया संरक्षक व सल्लाहकारत हे ग्वसाः खलःया नं संरक्षक व सल्लाहकार दयेकल ।

लिसें थम्हं हे आः केन्द्रीय समिति संव्रmमणकालीन जुइगु व दीर्घकालीन लिच्वः लाकीगु छुं नं ज्या याइ मखु धकाः निर्णय याःगु जुल । थुकथं ग्वसाः खलःयात ६० न्हुया दुने अधिवेशन सम्पन्न यायेगु जिम्मा बिउगु खः । थज्याःगु जिम्मेवारी कयाः महाधिवेशनया तयारी यानाच्वंगु व नेवाःतय् दथुइ नं आः देय् दबूया तःमुँज्या जुइगु जुल धकाः सकारात्मक सन्देश प्रवाह जुयाच्वंगु इलय् निष्क्रिय जुइधुंकूगु केन्द्रीय समितिं गय् यानाः जिउ अय् यानाः भाँडे यायेगु कुतः याना हे च्वन । गबलें ग्वसाः खलःया बैठकय् कोरम मगाः धाइगु, गबलें ग्वसाः खलः विधानसम्मत मजू धाइगु ।

थ्व ग्वसाः खलःया ९ म्ह दुजः ला केन्द्रीय समितिया हे दुजःत खः । बैठकय् केन्द्रीय कमिटीया अधिकांश दुजःत वया हे बी मखु । कोषाध्यक्ष जुयादीम्ह विजय वज्राचार्य ग्वसाः खलःया चेकय् हस्ताक्षरकर्ता मध्ये छम्ह खः । प्रतिनिधि आह्वान सूचनाया विज्ञापनया लागिं रु. १०,००० या पेटिक्याशया चेकय् सही यायेत वय्कः माने जुया मदी । अध्यक्ष जुयादीम्ह नरेश ताम्रकारं ग्वसाः खलकं गय् यानाः ज्या यानाच्वन धकाः गबलें छक्वः जानकारी कयामदी । थम्हं थःत ‘निमित्त महासचिव’ धया जुइम्ह माइलाबाबु द्यौलां निर्णयय् सही यायेगु तर प्रभूया आदेश धकाः उकियात माने याये मखु धाइगु ।

थज्याःगु अवस्थाय् २०७३ माघ ३ गतेया निर्णय कथं थः हे करिब करिब मृत्युवरण यायेधुंकूगु केन्द्रीय समितिं तयारी मगाःगु वा मेगु छुं त्वहःचिनाः महाधिवेशन सारे यायेगु ज्या याइगु । देय् दबूया हे ज्याकुथी च्वनाः चांन्हि खटे जुयाच्वंगु ग्वसाः खलःयात जानकारी तक हे मबिसे केन्द्रीय कमिटीं थज्याःगु निर्णय याःगु खः । लछि न्ह्यः तक नं छगू सार्वजनिक भाषणय् संरक्षक मल्ल के. सुन्दरजुं ‘देशय् थज्याःगु स्थिति जुयाच्वंगु दु, तर बैशाखंनिसें देय् दबू गन दु, जि संरक्षकयात तकं जानकारी मदु’ धकाः आक्रोशपूर्ण मन्तव्य तयादीगु खः । वय्कः संरक्षक मल्ल के. सुन्दरजुं थ्वहे बारे गुनासो यायेत दबाब समूहयात तःक्वः तःक्वः फोन यानाः सःतादीगु खः ।

गुकी पवित्र वज्राचार्य, राजेस शाक्य, देवदास मानन्धर, ज्योति शाक्य वय्कःया छेँय् वनाबलय् वय्कलं देय् दबुलिं मिति २०७३ साल भाद्र १४ गतेनिसें नगद आम्दानीयात बैंक खाताय् जम्मा मयासे मनोमानी ढंगं थः यस्सें खर्च यानाच्वन धकाः जानकारी बियादीगु खः । उकिं दबाब समूह आः नं आवश्यक दनि, छिकपिंसं दबाब बियादी माल, महाधिवेशन याकेत ग्वाहालि याये माल धकाः ग्वाहालि फ्वनादीगु खः । जिमिसं नं झी नेवाः देय् दबूया लागिं, नेवाः देय् दबू सम्पूर्ण नेवाःतय्गु लागिं खः । उकिं थुकियात ग्वाहालि यायेगु झीगु कर्तव्य धइगु तायेकाः ग्वाहालि याना ।

तर थौं महाधिवेशन लिछ्यायेगु धकाः हानं निर्णय जुलं नं वय्कः छाय् सुम्क च्वनादिल ? जिमिसं दीर्घकालीन लिच्वः लाइगु छुं नं निर्णय याये मखु धायेधुंकाः थौं वहे संरक्षक व सल्लाहाकार सहित बैठक च्वनाः निर्णय उल्टे यातं नं छाय् चुप जुयादिल ? न्ह्यसः थनं हे शुरु जुइ । म्हिगः तक नरेश ताम्रकारं छुं मयाः धकाः गुनासो यानाच्वंपिं मनूत थौं वहे नरेश ताम्रकारया पक्षय् वनाः महाधिवेशन छाय् लिछ्याः वन ? थ्व झीगु लागिं छगू रहस्य जुयाच्वंगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.