All for Joomla All for Webmasters

ने.सं. ११३६ यंलागा अष्टमी

मिडियाय् नेवाः प्रतिनिधित्व

निदँ न्ह्यःया तःभुखाचं स्वनिगः दुनेया यक्व महत्वपूर्ण व मौलिक सांस्कृतिक सम्पदाय् क्षति लाकल । गुलिं क्षति सामान्य जक जूसां यक्व धइथें सम्पदा पूर्णरुपं क्षति जुल । स्वनिगः नापं नेपाःयात विश्व न्ह्यःने म्हसीकेगु ज्या यानाच्वंगु आपालं सम्पदाय् क्षति जुल । उकी मध्ये भुखाचं पूर्ण रुपं क्वःदःगु छगू महत्वपूर्ण सम्पदा खः, मरुसतः (काष्ठमण्डप) । तःभुखाचं क्षति याःगु यक्व सम्पदात मध्ये मरुसतः दकलय् पुलांगु व महत्वपूर्ण खत । न्हापा झिंस्वंगूगु शताब्दीइ निर्माण याःगु धकाः अनुमान यानाच्वंगु मरुसतः व स्वयां न्ह्यः हे जूगु न्हूगु तथ्यत लुइकूगु दु ।

सम्भवतः न्हय्गूगु शताब्दीइ थुगु सम्पदा निर्माण जूगु न्हूगु तथ्यपाखें क्यंगु दु । थज्याःगुु अतिकं महत्वं जाःगु मरुसतः पूर्ण रुपं क्षति जूगु धइगु देय्या निंतिं तःधंगु विडम्बनाया खँ खत । मरुसतः नापं तःभुखाचं धरहरायात नं पूर्ण रुपं क्षति यात । मरुसतः निर्माण जूगु धकाः आः अनुमान यानातःगु स्वयां झिंछगूगु शताब्दी लिपा जक धरहराया निर्माण जूगु खनेदु । मरुसतःया महत्व व स्वापू थनया इतिहास व मनूतय् सेन्टिमेन्टनाप गुलि सती उलि धरहरानाप मजू । कारण यक्व दयेफु । अथे खयां नं तःभुखाय् धुंकाः मरुसतः ध्याकुनय् व धरहरा व स्वयां यक्व हे न्ह्यःने लात । कारण थुकिया बारे सञ्चार माध्यमं याःगु प्रचार ।

सञ्चार माध्यमया प्रचारया प्रभावं धरहरा पुनःनिर्माण यायेत यक्व थासं आर्थिक ग्वाहालि यायेत तकं प्रतिबद्धता वल । देय्या इतिहास, संस्कृति व महत्व दुगु मरुसतःयात ग्वाहालि जक मखु माः कथं प्रचार तकं जुइ मफुत ।सञ्चार माध्यमय् छाय् माःगु कथं मरुसतःया महत्वया प्रचार जुइ मफुत ले ? थुकिया लिसः माला स्वयेगु खःसा सञ्चार क्षेत्रय् ज्या यानाच्वंपिं अधिकांश सञ्चारकःमित स्वनिगः पिनेयापिं गैर नेवाःत । सुयात स्वनिगः दुनेया इतिहास, स्वनिगः दुनेया संस्कृति, स्वनिगःया मनूतय् अट्याचमेन्ट व सेन्टिमेन्टया बारे ज्ञान मदु वा मतलब मदु । सायद नेपाःया मूलधारया सञ्चार क्षेत्रय् नेवाःतय् उपस्थिति गाक्कं दुगु खःसा भुखाय् लिपा मरुसतःयात नं उलि हे महत्व साथ थाय् बियाः प्रचार प्रसार याइगु खइ ।

मूलधारया सञ्चार माध्यमय् प्रचार प्रसारया खँ केवल थनया सांस्कृतिक सम्पदा व तःभुखाय् लिपाया जक खँ मखु । सञ्चार माध्यमय् नेवाः सः, नेवाः सरोकार व नेवाः मुद्दा बारे थाय् मदइगु÷मबीगु ज्या यक्व न्ह्यवंनिसें यानाच्वंगु जुल । छखे नेवाः मुद्दाया बारे प्रचार प्रसार मजुइगु व मेखे प्रचार जूसां गलत ढंगं व मखुगु कोणं समाचार प्रसारण जुइगु यानाच्वंगु दु । न्हापांगु संविधानसभा विघटन जुइ न्ह्यःया छगू दसु स्वयेगु खःसा थुकिया बारे स्पष्ट जुइ ।
न्हापांगुु संविधानसभाया इलय् नेवाः स्वायत्तता लगायत पहिचानया पक्षय् व्यापक आन्दोलन जुयाच्वंगु ई ।

उगु इलय् पहिचान सहितया संघीय व्यवस्था संविधानय् दुथ्याकेगु ज्या जुइमाः धकाः आदिवासी जनजातितय्सं जेठ ६, ७ व ८ गते नेपाल बन्दया घोषणा यात । स्वनिगलय् नेवाःतय्सं उकियात व्यापक रुपं समर्थन यासें जुलुस व सभा यात । उगु इलय् कुहां वःगु नेवाःतय् ल्याः तसकं अप्वः । व्यापक जनसमर्थन दुगु प्रदर्शनयात सञ्चार माध्यमं आदिवासी जनजातितय्सं देशय् जातीय द्वन्द्व ब्वलंकेत स्वःगु व जातीय राज्यया माग यासें बन्दया आह्वान याःगु धासें प्रचार यात । उलि जक मखु बन्दया झ्वलय् समाचार संकलन याः वःपिं पत्रकातय्त अःपुइमा धकाः प्रदर्शनकारीतय्सं यक्व ग्वाहालि यात । ग्वाहालि याःगु प्रति कृतज्ञ जुइगु स्वयांं अःखतं पत्रकारतय्त बन्दकर्तातय्सं दुव्र्यवहार याःगु धासें प्रचार यात ।

नेवाःतय्सं ल्ह्वनाच्वंगु मुद्दा राजनीतिक, भाषिक, सांस्कृतिक वा सामाजिक न्ह्याःगु हे जूसां उकिया प्रचार मजुइगु व जूसां मखुगु तरिकां यानाच्वंगुलिं झीगु थःगु मुद्दाया बारे थःगु हे समुदाय दुने नं मखुगु कथं प्रचार जुयाच्वंगु जुल । गनं नेवाः वस्ती वा नेवाः संस्कारया बारेया रिपोर्टिङ जूसां झीगु मौलिक नांयात स्यंकाः मेगु कथं प्रचार जुइगु घटना नं म्हो मजू । छखे सञ्चार माध्यमया पूर्वाग्रहया कारणं थज्याःगु घटनाया शिकार नेवाःत जुइ मालाच्वंगु दुसा मेखे मूलधारया सञ्चार माध्यमय् नेवाः सञ्चारकःमितय् उपस्थिति तसकं म्हो जूगुया लबः मेपिंसं कयाच्वंगु जुल ।

नेपाःया मू सञ्चार संस्था – राष्ट्रिय समाचार समिति (रासस) जक स्वयेगु खःसा थन स्ट्रिन्जर बाहेक स्थायी व अस्थायी यानाः १५० जवान सञ्चारकःमित दु । उकी मध्ये समाचार शाखाय् ज्या याइपिं नेवाःतय् ल्याः मुक्कं स्वम्ह जक । थज्याःगु अवस्था केवल राससया जक मखु, सरकारी नापं निजी सञ्चारमाध्यम दक्व थासय् थज्याःगु हे अवस्था दु ।न्ह्यागु नं देशय् आदिवासीतय् भाय्, तजिलजि, संस्कृति व समुदाययात लिउने लाकेत शिक्षा व सञ्चार क्षेत्रय् अनया शासकतय्सं कब्जा कायेगु याइ । शिक्षा व सञ्चार क्षेत्र थज्याःगु ल्वाभः गुकिया माध्यमं छक्वलं द्वलंद्वः मनूतय्त भ्रमित याये फइ ।

नेपालय् नं मांभाय्पाखें शिक्षा काये दइगु मस्तय् नैसर्गिक अधिकारयात लाका कयाः शासकतय्सं शिक्षा क्षेत्रयात कब्जाय् कायेधुंकूगु जुल । थुकी शिक्षा क्षेत्र थें सञ्चार क्षेत्रय् नं खय् भाय्यात जक प्राथमिकता बियाः मेमेगु जातितय् भाय्यात लिउने लाकाच्वंगु दु । थ्व शासकतपाखें यानाच्वंगु ज्या जुल । तर उकिया सामना यानाः झीसं मूलधारया सञ्चार क्षेत्रय् झीगु पहुँच व प्रतिनिधित्व गुकथं बल्लाकेगु धाइगुपाखे दृष्टिकोण दयेकेमाः । नेवाःतय् मुद्दा नापं समग्र नेवाः एजेण्डाया सही ढंगं प्रचार यायेगु व झीगु आन्दोलनयात
क्वातुकेगु खःसा झीगु बल्लाःगु पहुँच व प्रतिनिधित्वयात मूलधारया सञ्चार क्षेत्रय् जुइ अतिकं आवश्यक जू ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.