All for Joomla All for Webmasters

ने.सं. ११३६ यंलागा अष्टमी

नेवाः देय् दबूया तःमुँज्या विवाद

तःमुँज्या लिज्यात, आः वैशाखं


नेवाः देय् दबूया वर्तमान ज्यासना पुचः व खुक्वःगु तःमुँज्या ग्वसाः खलः दथुइ ब्वलंगु तनावया कारणं अन्ततः चैत ४ व ५ गते दांगय् यायेगु धयातःगु खुक्वःगु तःमुँज्या लिछ्यायेगु निर्णय जूगु दु । थौं सुथय् च्वंगु देय् दबू ज्यासना पुचःया मुँज्यां चैतं जुइमाःगु तःमुँज्या लिछ्यानाः वि.सं. २०७४ सालया वैशाख ८ व ९ गते दांगय् हे यायेगु धकाः निर्णय याःगु खः । देय् दबूया नायः नरेश ताम्रकारं तःमुँज्या लिछ्याये माःगुया कारण ‘तयारी मगाःगुलिं’ धयादीगु दु । थौं नेपालभाषा टाइम्स लिसे खँ ल्हासें वय्कलं धयादिल, ‘थीथी जिल्लाय् अधिवेशन मजूनि, उकिं स्थानीय निकायया चुनावयात नं लिच्वः मलाक वैशाखं तःमुँज्या यायेगु निर्णय जूगु दु ।’

अथे हे तःमुँज्या यायेत गठन याःगु ग्वसाः खलःया कजि विजयप्रकाश तण्डुकारं नं तःमुँज्या लिज्याःगु जानकारी बियादिल । नेपालभाषा टाइम्स लिसे खँ ल्हासें वय्कलं धयादिल, ‘तःमँुज्या यायेत प्रतिनिधित वये माल, तर आः तक मुक्कं न्यागू खुगू खलःया जक प्रतिनिधि वल । प्रतिनिधि हे मदयेक गय् यानाः तःमुँज्या यायेगु ? उकिं छुं भचा लिछ्यायेगु निर्णय जूगु खः ।’ समस्या वःगुलिं बाधा अडकाउ फुके यायेत नीस्वंगु सिफारिस समितिया सिफारिस कथं तःमुँज्या
लिछ्यानागु खँ धाःगु दु ।

‘लिज्याःगु मदु, चैतं हे जुइ’

चैतं याये धयातःगु तःमुँज्या लिछ्यायेगु जुल धकाः देय् दबूया कार्यसमितिं निर्णय याःसां तःमुँज्या ग्वसाः खलकं धाःसा उकियात स्वीकार मयाइगु खँ ग्वसाः खलःया दुजः देवदास मानन्धरं नेपालभाषा टाइम्सयात कनादिल । वय्कलं धयादिल, ‘कार्यसमितिं न्हूगु मिति बिल धाःसां जिमिसं उकियात स्वीकार याये फइ मखु । महाधिवेशन चैत ४ व ५ गते हे जुइ ।’ग्वसाः खलःयात सर्वाधिकारसम्पन्न धायेधुंकाः देय् दबूया कार्यसमितियाके तःमुँज्या लिछ्यायेगु छुं हे अधिकार मदु धासें वय्कलं थःपिंसं तःमुँज्या याये फइ मखुत धकाः आः तक सुयातं धयागु हे मदुसा छु आधारय् तःमुँज्या लिछ्यायेगु सिफारिस जुल धकाः नं न्ह्यसः तयादिल ।

ग्वसाः खलःया दुजः भाजु मानन्धरं धयादीगु थ्वहे खँ ग्वसाः खलःया कजि विजय तण्डुकार समक्ष तयाबलय् वय्कलं थुकिया बारे थौं हे ग्वसाः खलःया नं बैठक च्वनेत्यनागु जानकारी बियादिल । यदि वैशाखं नं तःमुँज्या मजुल धाःसा वयां लिपा स्थानीय चुनाव व अनं लिपा बर्खा शुरु जूगुलिं वैशाखं न्ह्याथे यानाः नं तःमुँज्या यायेगु खँ जूगु जानकारी नं वय्कलं बियादिल ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.