All for Joomla All for Webmasters

ने.सं. ११३६ यंलागा अष्टमी

सत्ताय् च्वनाः राज्यकोष दोहन

मुलुकया विद्यमान राजनैतिक विवाद गबले व गुकथं ज्यनीगु खः, अन्यौलया विषय जुयाच्वंगु दु । फुक्क हे राजनीतिक पार्टीत थःथःपिनिगु अडानय् च्वनाच्वंगु दु । थुकिं समस्या समाधानया निकासयात पना बिउगु दु । राजनीतिक अन्यौलयात झन झन क्रोनिक याना यंकाच्वंगु दु । थुकिया मार जनतां फये मालाच्वंगु दु । तर राज्य सत्ताय् च्वनाच्वंपिनिगु निंतिं थज्याःगु अन्यौलता नं लाभदायक हे जुयाच्वंगु दु । संसद्य संविधान संशोधन विधेयकं निकास काये फयाच्वंगु मदु । संसद्य दर्ता जुयाच्वंगु संशोधन विधेयकयात कयाः हे मेगु थप १५ गू संशोधन थप जूगु दु ।

थुकिं क्यनाच्वंगु दु राजनीतिक समस्याया निकास व ०६२÷०६३या उपलब्धियात संस्थागत यायेगु खँय् थुपिं उदासिन दु । जारी जुयाच्वंगु नेपाःया संविधान हे सहमतिया संविधान जुयाः जक पिदनाच्वंगु खःसा थुकिं देय्या बहुसंख्यक जनताया हक अधिकार संविधानतः सुरक्षित यानाच्वंगु मदु । संसदय् तःधंगु पार्टीया हैसियत कयाच्वंपिं सत्तारुढ नेपाली कांग्रेस, माओवादी केन्द्र, मधेसी मोर्चा व प्रतिपक्षय् च्वनाच्वंम्ह नेकपा एमाले नं थःपिनिगु निहित स्वार्थपूर्तिया निंतिं हे जक राज्यकोषयात दोहन यानाच्वंगु दु । साया दुरु न्ह्याये थें जनताया करं जायेकातःगु राज्यया धुकू थःपिनिगु पार्टी व निजी फाइदाय् छ्यलाच्वंगु दु ।

संसदय् संविधान संशोधनया अज्याःगु महत्वपूर्ण विधेयक थानाच्वंसां सरकारया गृहमन्त्रीं पूर्व उच्च अधिकारीपिनिगु सेवा सुविधा अप्वयेकेगु विधेयक दर्ता यानाः राज्यया धुकू स्वब्याकेगु ज्या न्ह्याकाच्वंगु दु । मुलुकया आर्थिक अवस्था विषम खःसां पूर्वउच्चपदाधिकारीपिंत राज्य सुविधा अप्वयेकेमाःगुया छुं औचित्य मदु । थज्याःगु हे विधेयक न्हापा एमाले सरकारया पालय् गृहमन्त्री बामदेव गौतमं संसद्य् दर्ता याःगु खः । तर थुकिया ब्यापक विरोध जुइवं उगु विधेयक सरकारं लितकायेत बाध्य जुल । आः हाकनं वहे प्रकृतिया विधेयक नेपाली कांग्रेसया गृहमन्त्री विमिलेन्द्र निधिं दर्ता याकूगु दु ।

न्हापा उच्चपदय् आसिन जुयाः ज्या याःगु इलय् नं थुमिसं मेमेपिं कर्मचारीत स्वयां अप्वः तलब व सुविधा कया हे च्वंगु खः । तर आः सेवां निवृत्त जुइधुंकाः नं उज्वःगु हे जीवनस्तर हनेगु लोभ व लालसां थुज्वःगु सुविधा वृद्धिया विधेयक हःगु खः धायेगु बाहेक थुकिया मेगु औचित्य मदु । पूर्व उच्चपदाधिकारीतय्त आजीवन थुकथंया सेवा बीवं राज्यं अरबौं तकाया आर्थिक भार क्वबीमालीगु निश्चित दु । राज्यया स्रोत दुरुपयोग याये मजिउगु नैतिकता व कानूनया आवश्यकतायात सकसिनं वाःचायेकेमाःगु आःया अवस्था खः । लुमंकेबहः जू, अमेरिकाया राष्ट्रपति बाराक ओबामाया कार्यकाल क्वचायेवं हे वय्कलं थःगु जीवन यापनया निंतिं गनं रोजगारी शुरु यानादीगु खः ।

अमेरिका थेंजाःगु शक्तिशाली देय्या पूर्व राष्ट्रपतियात छुं कथंया सुरक्षाया आवश्यकता मदु, निवृत्तिभरणया आवश्यक मदु्, तर नेपाः थेंज्याःगु गरिब देय्या पूर्वपदाधिकारीतय्त संसारभरया सुविधा व सुरक्षा माः धकाः राज्यंकोषं हे खर्च ब्यहोरे याकेगु सोच वास्तविकरुपं हे दयनीय खः ।मुलुकय् सत्तारुढ जुयाच्वंपिं राजनीतिक पार्टीतय्सं विधिया शासन व देय्या कानूनयात सम्मान यानाः उदाहरणीय जीवन यापन यायेमाःगु खः । तर थुमिगु हरेक क्रियाकलाप देश व जनताया निंतिं मखुसें थःपिनिगु निजी स्वार्थया निंतिं जुयाच्वंगु अनेक प्रसंग आः समाचारया विषय जुयाच्वंगु दु ।

छुं ई न्ह्यः देय्या सुरक्षाया भालाकयातःगु पुलिस प्रशासनया प्रमुख आइजीपी नियुक्तिया चर्चा ब्यापककथं जुल । सत्तारुढ राजनीतिक पार्टी दुने नं तःधंगु विवाद ब्वलन । नियमकथं आइजीपी जुइमाःम्ह छम्ह, तर पहुँच व प्रभावया लिधंसाय् नेपाली कांग्रेसया सभापति शेर बहादुर देउपां रोलक्रमकथं वरिष्ठम्ह अधिकारीयात पुलिस प्रमुख मदयेकुसे थः अनुकूलया मनूयात प्रमुख दयेकेत सना जुल धकाः समाचार ब्यापक जुल । नेपाली कांग्रेसं ल्यःम्ह मनूयात प्रमुख मदयेकल धाःसा सरकारया समर्थन हे लित कयाः सरकार क्वःथलेगु दबाब तकं जुल धयागु समाचार ब्यापक जुल ।

थ्व खँयात कांग्रेस सभापतिं वक्तब्य बियाः खण्डन याःसां अन्तत देउवां धाःम्ह हे मनू पुलिस प्रमुख नियुक्ति जुइवं वास्तविकता छर्लङ्ग जूगु दु । थ्व निर्णययात कयाः सर्वोच्च अदालतय् तकं मुद्दा जुल, अदालतं प्रक्रिया पूमवंकुसे पुलिस प्रमुख नियक्ति याःगु ठहर यासें प्रक्रिया व नियम पूवंकाः जक पुलिस प्रमुख नियुक्ति यायेमाःगु आदेश बिल ।उकथं हे हालय् नेपाः सरकारं राजदूत नियुक्ति याःगु खँय् हाकनं विवाद ब्वलन । सत्तारुढ राजनीतिक पार्टीतय् दथुइ भागबण्डा जुइकथं जूगु राजदूत नियुक्ति सिफारिसय् नेपाली कांग्रेसया कोटां नियुक्त जूपिं राजदूततय्गु नामय् विवाद ब्वलन ।

थुकी नां पिदंपिं विवादित राजदूततय्सं आर्थिक लेनदेनया लिधंसाय् नां सिफारिस जूगु खँ पितहल सा थुकी नेपाली कांग्रेसया सभापति शेरबहादुर देउवाया कलाः आरजु देउवाया नां नं घानाः समाचार पिदनाच्वंगु दु । थुकथं शक्ति केन्द्रय् च्वनाः थःपिनिगु निजी स्वार्थया निंतिं प्रभावशाली मनूतय्सं राज्यया शक्तियात थः यत्थे दुरुपयोग यानाच्वंगु खनेदत । थुकिं मुलुकया राजनीतिक स्थितियात अझं अस्थिर याइगु ला जु हे जुल मेखे राजनीतिपाखें हे विरक्त जुइगु स्थिति धमाधम खने दया वयाच्वन, गुगु लोकतन्त्र व गणतन्त्रया निंतिं अति हे ग्यानापुगु स्थितिया विकास जुइफइगु खने दयावल ।


मुलुकय् वःगु राजनीतिक परिवर्तन जनतायात सशक्तीकरण याना यंकेगु निंतिं खः न कि पहुँच दुपिंपाखें राज्यया शक्ति व स्रोत दोहनया निंतिं । उकिं आः जनता सार्वभौम जुइधुंकूगु परिपे्रक्षय छगू इलय् शक्ति केन्द्रतय्सं न्ह्यागु याःसां जिउ धयागु मानसिकतायात आः चीका छ्वयेगु हे वेश जुइ । जनता दनावल धाःसा थुकिया लिच्वः छु जुइगु खः, शक्ति दोहन यानाच्वंपिसं इलय् हे होश यायेमाःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.