All for Joomla All for Webmasters

ने.सं. ११३६ यंलागा अष्टमी

तःमुँज्या ग्वसाः खलः व ज्यासना पुचः टक्कर

न्ह्यःने वयाच्वंगु खुक्वःगु तःमुँज्या ताःलाक न्ह्याकेगु झ्वलय् नेवाः देय् दबूया बैठक, मुँज्या व भेटघाट न्हिंन्हिं हे जुयाच्वंगु दु । वइगु चैत ४ व ५ गते दाङया घोराहीइ जुइगु तःमुँज्याया लागिं जिल्ला जिल्लां प्रतिनिधितय्गु नां वयेगु शुरु जूगु दु । जिल्ला अधिवेशन यायेमाःगु थासय् केन्द्रं्र मनू छ्वयेगु ज्या नं न्ह्याकाच्वंगु दु । थ्वहे झ्वलय् तःमुँज्या ग्वसाः खलः व देय् दबूया ज्यासना पुचः दथुइ नं सी मदयेक तनाव खने दया वःगु दु ।

तःमुँज्याया तयारी बारे ग्वसाः खलकं यानाच्वंगु ज्याखँ बारे देय् दबूया कार्यसमितियात छुं हे जानकारी मबिउगु द्वपं महासचिव माइलाबाबु द्योलां बियादीगु दु । बरु ग्वसाः खलः थम्हं हे ‘यकःति’ ढंगं पत्रकार सम्मेलन यानाः थुकिया बारे जानकारी यानाच्वंगु ज्यासना पुचःया आरोप वःगु दु । महासचिव द्योलां ग्वसाः खलःयात ज्याया जिम्मा बियागुया अर्थ आः नेवाः देय् दबू हे म्वाःल वा विघटन जुल धइगु मखु धासें यदि ग्वसाः खलकं थथे हे थः यत्थे ज्या याना जुल धाःसा घोषित तःमुँज्या नं स्थगित जुइफुगु ख्याच्वः समेत बियादिल ।

तःमुँज्या गुकथं यायेगु धइगु बारे म्हिगः ज्यासना पुचःया दुजःतय्सं देय् दबूया संरक्षक मल्ल के. सुन्दरनाप वय्कःया छेँय् हे वनाः सहलह ब्याकूगु खः । थीथी पत्राचार नापं प्रचार प्रसार व देय् दबूया आन्तरिक ज्याझ्वः देय् दबू ज्यासना पुचलं हे यायेमाःगु जिकिर यासें महासचिव माइलाबाबु द्योलां ग्वसाः खलःया ज्या धइगु मञ्च दयेकेगु, यातायात ब्यवस्था यायेगुु, सहभागीतय्त नके–त्वंकेगु, स्वयम्सेवक परिचालन यायेगु जक खः धयादिल ।

उखे ग्वसाः खलकं धाःसा तःमुँज्याय् सहभागी प्रतिनिधि ल्ययेगु ज्या थःपिंसं हे याये दयेमाः धकाः माग यानाच्वंगु दु । उकिया लागिं ग्वसाः खलकं जिल्ला अधिवेशन जूगु थासय् अधिवेशनं हे प्रतिनिधि ल्ययेगु व अधिवेशन जुइ मफुगु जिल्लाया हकय् आनन्दकुटीइ जूगु तःमुँज्याय् ब्वति काःपिं प्रतिनिधितय्त हे छ्वया हयेगु धकाः मापदण्ड दयेकूगु दु ।

ग्वसाः खलकं यानाच्वंगु थ्व ज्या धाःसा ज्यासना पुचःयात ययाच्वंगु मदु । थ्वहे झ्वलय् तःमुँज्या न्ह्यःने वयाच्वंगु इलय् लाक्क देय् दबूया कार्यालय सचिव नं विदाय् च्वना बिउगुलिं अन दैनिक ज्याखँ यायेत नं समस्या जुयाच्वंगु खँ सीदुगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.