All for Joomla All for Webmasters

ने.सं. ११३६ यंलागा अष्टमी

नेवाः मिसा दबूया न्हापांगु अधिवेशन क्वचाल

नेवाःतय् राष्ट्रिय संगठन नेवाः देय् दबूया विषयगत संगठन कथं नीस्वनातःगु नेवाः मिसा दबूया न्हापांगु राष्ट्रिय अधिवेशन आः नकतिनि जुल । दबूया तदर्थ कमिटीया संयोजक मय्जु रश्मिला प्रजापतिया सभापतित्वय् जूगु ज्याझ्वःया मूपाहां लोकसेवा आयोगया पुलांम्ह अध्यक्ष कयोदेवी यमि जुयादीगु खः । मूपाहां यमिं त्वाःदेवाय् मत च्याकाः अधिवेशनया उलेज्या यानादीगु खः । ज्याझ्वलय् नवासें वय्कलं नेवाः मिसातय्सं नं थःपिनिगु सशक्तिकरण याना वनेमाःगु खँय् बः बियादिसें थःगु भाषा, कला, संस्कृतियात नं निरन्तरता बिया वनेमाः धयादिल ।

तदर्थ समितिया न्वकु कस्तुरी श्रेष्ठं लसकुस यानादीगु ज्याझ्वलय् छ्यांजे विद्या श्रेष्ठं संगठनया प्रगति प्रतिवेदन व दांभरिं सरिता श्रेष्ठं आर्थिक प्रतिवेदन न्ह्यब्वयादीगु खः । ज्याझ्वलय् नेवाः देय् दबूया नायः नरेश ताम्राकार, देय् दबूया खुक्वःगु तःमुँज्या ग्वसाः खलःया कजि विजयप्रकाश तण्डुकार, सांसद राज्यलक्ष्मी श्रेष्ठ, संस्कतिविद् डा. चुन्दा वज्राचार्य लगायतयापिंसं भुतू ज्याय् जक तक्यना च्वनेमाःपिं नेवाः मिसातय्सं आः नेतृत्व विकास याना वनेमाःगु खँय् नं ध्यान बिया वनेमाः धासे अधिवेशनया सफलताया कामना यासे भिंतुना बियादीगु खः ।

सभापतिया थासं मय्जु प्रजापतिं नेवाः मिसा दबूया औचित्य व दृष्टिकोण छु खः धइगु प्रष्ट यासें नेवाः मिसापिंत संगठि त यायेगु जक मखसें संगठनया उद्देश्य नेवाः मिसातय्त नं सामाजिक, आर्थिक, राजनीतिक दृष्टिकोणं सशक्त याना वनेगु खः धयादिल ।
अधिवेशनं मय्जु प्रजापतिया अध्यक्षताय् नीखुम्हेसिया न्हूगु ज्यासना पुचः नं ल्यःगु खः ।

न्हूगु ज्यासना पुचलय् विमला प्रधान (पूर्व), कस्तुरी श्रेष्ठ (मध्य) व योगिता श्रेष्ठ (पश्चिम)यात न्वकु पदय् ल्यःगु दु । अथे हे दुजलय् पूर्वी क्षेत्रं कल्पना श्रेष्ठ, सपना प्रधान, रञ्जना अमात्य, इन्द्र श्रेष्ठ, गंगा मास्के, पश्चिम क्षेत्रपाखें जगिता वज्राचार्य, गीता मल्ल श्रेष्ठ, रम्बा शाक्य, श्रृजना श्रेष्ठ, मध्य क्षेत्रपाखे मेनुका श्रेष्ठ, विना महर्जन, विनु श्रेष्ठ, रीना श्रेष्ठ, सबिता श्रेष्ठ, सरस्वती वैद्य व स्वनिगःपाखें सुजाता श्रेष्ठ, विद्या श्रेष्ठ, सरीता श्रेष्ठ, शान्ति वैद्य, श्रीमिला सुवाल दुजलय् ल्यःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.