All for Joomla All for Webmasters

ने.सं. ११३६ यंलागा अष्टमी

नेवाः देय् दबू – दोषी सु खः ?

नेवाःतय्गु राष्ट्रिय संगठन नेवाः देय् दबूया तःमुँज्या थ्वहे चैत्र ४ व ५ गते दांगय् जुइ धयागु समाचार पिदनाच्वंगु दु । तर थ्व अधिवेशन जुइगु खः कि मखु धयागु आशंका व अन्यौलता धाःसा अधिवेशन जुइगु तिथि न्ह्यःने वःलिसे झन हे अप्वया वनाच्वंगु दु ।
नेवाः देय् दबू ब्यवस्थितकथं न्ह्याना मच्वंगु बारे आः आपालं खँ स्पष्ट जुजुं वयाच्वंगु दु । अधिवेशनया सुनिश्चितता जुइ न्ह्यः हे थुकी अध्यक्ष जुइपिनिगु धेंधेंबल्लाःया खँ नं प्रचारय् वयाच्वंगु दुसा थुकी देय् दबू एकलौटीकथं न्ह्याः वनाच्वंगु आभास नं स्पष्ट जुजुं वयाच्वंगु दु ।

छथ्वः मनूत न्ह्याथे यानाः जूसां पदय् एकाधिकार यायेगु कुतः याये मफइथे च्वन धाःसा अझं अन्यौल ब्वलकाः यथास्थितिया देय् दबुली च्वंच्वनेगु सोचय् दुगु खँ स्पष्ट जूगु दु । नेवाः देय् दबूया आः जुइत्यंगु अधिवेशन न्यादँ न्ह्यः स्वयम्भूया दिनाच्वंगु खुक्वःगु अधिवेशनया निरन्तरता खः धयागु आधिकारिक सुचं पिदनेधुंकूगु दु (ने.सं. ११३७ पोहेलागा ४ या कार्यसमितिया निर्णयकथं खुक्वःगु दिनाच्वंगु अधिवेशन न्ह्याकेगु संरक्षक व सल्लाहकार सहमतिया निर्णय– माइन्यूट) । आनन्दकुटी स्कूलय् जूगु खुक्वःगु धिवेशनय् अधिवेशनया फुक्क हे नियमित ज्याझ्वः क्वचायेधुंकूगु दु ।

थ्वं फुक्क कथंया प्रतिवेदन पारित यानाः निर्वाचन जुइगु ज्याझ्वलय् विधान सम्बन्धि विवाद जुइवं थ्व अधिवेशन स्थगन जूगु घोषणा जूगु खः । तर ग्वसाः खलकं थ्वहे कारणं अधिवेशन स्थगन जूगु दावी आधिकारिकरुपं आः तकं याःगु मदुनि । खुक्वःगु धिवेशनया निरन्तरता खःसा थ्वहे छगू जक ज्या ल्यं दनि ।अधिवेशन स्थगनया कारण थुकियात हे माने यानाः आः विधान अधिवेशन नारायणघाटय् क्वचायेकूगु दुसा थुकिं विधान सम्बन्धि विवाद क्वचाःगु अनुमान यानाः आः दांगय् उगु दिनाच्वंगु अधिवेशन पूवंकेगु लक्ष्यकथं हे ज्याझ्वः न्ह्याकेगु तातुना खः धयागु विश्वास दुजः संगठनतय्गु खः ।

उकिं थ्व ज्या पूवंकेया लागि न्हापायापिं हे आधिकारिक प्रतिनिधितय्गु उपस्थिति अन आवश्यक जुइ । अले आनन्दकुटीइ स्थगन जूगु ज्या निसें जक थन थनया अधिवेशनं निरन्तरता कायेमालीगु स्थिति अन दइ । अथे धायेबलय् थ्व अधिवेशनय् नानाथरीया प्रतिवेदन स्वयां अन मूलतः आनन्दकुटीइ ल्यनाच्वंगु निर्वाचनयात जक पूर्णता बीमाःगु अपरिहार्य जुइ, मखुसा खुक्वःगु अधिवेशन असफल घोषणा यानाः थुकियात न्हूगु अधिवेशन धायेमालीगु स्थिति ब्वलनी । देय् दबूया दुने दुजः संगठनतय् दथुइ ब्वलनाच्वंगु अनेक असमझदारी लिउने देय् दबूयात नेवाःतय्गु आन्दोलनया मूलधारय् हयेगु निंतिं थुकियात सशक्त यायेमाःगु सकसिनं वाःचायेकाच्वंगु दु ।

देय् दबूया अधिवेशन बिना अवरोध सम्पन्न यायेगु निंतिं सर्वाधिकार सम्पन्न समिति नीस्वने धुंकाः आः हाकनं देय् दबूया हे सुं सुं मनूतय्सं सर्वाधिकार सम्पन्न समितिया ज्याय् अवरोध हयेगु कुतः स्वरुप अधिवेशन ग्वसाः खलकं खलः पुचःतय्त अधिवेशन तिनिधि आह्वान याःगु पौयात हे कार्यान्वयनय् रोक तया बिउगु दु (प.स.च.नं ३०३७÷११३७÷११३८, तिथि २०७३ फागुन ८,) ।

देय् दबूया थ्व पतिं कार्यान्वयन दिका बीधुंकाः थुकिया थासय् गज्याःगु ज्या जुइ धयागु आधिकारिक पौ आः तक खलः पुचःतय्गु ल्हाति थ्यंगु मदुनि, न छुं सार्वजनिक सुचं हे पित बिउगु खनेदत । थुकिं यानाः लछि ई हे ल्यं मदयेधुंकूगु अधिवेशन गुकथं न्ह्याइ, थुकिया आधिकारिक प्रतिनिधि सु जुइगु खः, गुकथं ल्यइगु खः, व जिल्ला अधिवेशनं हे जक ल्यइगु खःसा अधिवेशनया कार्यसूची पिदनेमाःगु खः ।

उकथं हे विधान सम्मतकथं अधिवेशन यायेत थुकी जुइपिं आधिकारिक प्रतिनिधि जातीय परिषदय् दुपिं जातीय संगठनया प्रतिनिधित जुइ धकाः न्ह्यथनातःगु दु (प.स.च.नं ३०३८÷११३७÷११३८, तिथि २०७३ फागुन ८) तर नेवाः देय् दबूया संशोधित विधान स्थानीय अधिकारीया थाय् अभिलेखनया इलय् परिच्छेद ३ या (ग) जातीय संस्थागत सदस्य हे दइ मखु धकाः विधान अभिलेखीकरण यानाहःगु वास्तविकता खः ।

थु्कथं थः संगठन सदस्यतय्त भ्रमय् तयेगु व विधान अःख अधिकार सम्पन्न यायेगु ज्या आःया अधिवेशनं यायेगु कुतः न्ह्याकाच्वंगु स्पष्ट जुइ । विधान विषयय् जक अलमल यानाच्वन धाःसा आःया अधिवेशन नं विवादित जुइगु खँय् शंका मदु । विधानया च्वय् सुं नं वने मफइगु वास्तविकता खःसा यथास्थितियात मनन यानाः समझदारीया अधिवेशन आःया आवश्यकता खः । थ्वहे कारणं अधिवेशन तयारी समितिं विवेकया लिधंसाय् याःगु निर्णययात हाथ्या बीगु जुयावन धाःसा देय् दबूया समस्या गबलें मज्यनीगु व छथ्वः मनूत न्ह्याबलें विवाद ब्वलंकेगु व देय् दबुली हालिमुहाली यायेगु सोच दयेकाच्वंगु खँया अनुमान याये फइ ।

देय् दबूया कार्यसमितिया सर्वसम्मत निर्णयकथं दयेकूगु सर्वाधिकार सम्पन्न तःमुँज्या ग्वसाः खलःयात छपुचः मनूतय्सं पना बिउगु खनेदत । थुकिया नियत छु खः धयागु न्ह्यसः ब्वलनीगु स्वाभाविक खः । नेवाः देय् दबूया निष्कृयतां नेवाः आन्दोलनयात घाः लाकाच्वंगु वास्तविकतायात ध्यानय् तयाः देय् दबूयात सक्रिय यायेमाःगु आःया आवश्यकता खः । थ्वहे कारणं न्ह्याथेंजाःगु पंगःयात नं सहमतिया लिधंसाय् चीकाः÷थातं तयाः आःया अधिवेशन क्वःछिनातःगु इलय् हे क्वचायेकेमाःगु आवश्यक दु ।

तर छथ्वः मनूतय्सं व वा थ्व त्वह तयाः देय् दबूयात पंगु यायेगु योजना दयेकाच्वंगु खःसा अज्याःगु ज्याया परिकल्पना यानाच्वंम्ह न्ह्याम्ह हे पदाधिकारी, संरक्षक, सल्लाहकार जुयाच्वंगु खःसां वाधायात चीकाः अधिवेशन क्वचायेकेमाःगु आःया आवश्यकता खः । आः वयाः नं थ्व वा व कारण न्ह्यथनाः अधिवेशन मयायेगु, तिथि चीकेगु ज्या जुल धाःसा थ्व १३ लाख नेवाःतय्त हे धोका बिउगु सरह जुइ । अले छ्यं हे तछ्यानाः जूसां विधान संशोधन पारित यायेगु धकाः बिउगु हाथ्या कचवं वनीगु खँय् झी सकलें सतर्क जुइ ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.