All for Joomla All for Webmasters

ने.सं. ११३६ यंलागा अष्टमी

नेवाः देय् दबूया अधिवेशन व विधान

नेवाःतय्गु राष्ट्रिय संगठन नेवाः देय् दबूया खुदँ न्ह्यवंनिसें दिनाच्वंगु खुक्वःगु तःमुँज्या आः वइगु चैत महिनाया ४ व ५ गते दाङ्गय् जुइगु घोषणा जूगु दु । थुकिया तयारी ज्या न्ह्यानाच्वंगु देय् दबूया वर्तमान जःदुजःपिंसं यानाच्वनागु दावी जुयाच्वंगु दु । अझ देय् दबुलिं मध्यमाञ्चल न्वकुया अध्यक्षताय् छगू मुँज्यां अधिवेशन तयारी समितिया नीस्वनाः जूगु समाचार पितहःगु दु ।

पिदंगु अधिवेशन तयारी समितियात सर्वाधिकार सम्पन्न धकाः प्रचार जुयाच्वंगु खःसां निर्णय जूगु मुँज्याया माइन्यूटय् थुकियात ‘सर्वाधिकार सम्पन्न’ धकाः अधिकार सम्पन्न यानातःगु मदुगु खँ देय् दबूया हे सल्लाहकारपिंसं इलय् ब्यलय् न्ह्यथनेगु याना वयाच्वंगु दु । नेवाःतय्गु राष्ट्रिय संगठनया अकर्मण्यताया कारणं नेवाःतय्गु अधिकारया आन्दोलनयात हे घाः लाकाच्वंगु निक्र्यौल देय् दबूया सकल सल्लाहकारतय्गु छप्वाः म्हुतु जुयाच्वंगु जक मखुसें थ्वहे खँ न्ह्यथनाः देय् दबूयात पौ तकं च्वये धुंकूगु अवस्था दु ।

तर देय् दबूया पदाधिकारीतय्गु न्हाय्पनय् थ्व सलं मान्यता काये फयाच्वंगु मदु । कार्तिक महिना दुने दिनाच्वंगु खुक्वःगु अधिवेशन याये धकाः माइन्यूट तकं जुइधुंकाः नं उकिया कार्यान्वयन जुइमफुगु खँय् सुं नं पदाधिकारीतय्सं जिम्मेवारी कायेत तयार जुयाच्वंगु मदु । थ्व हे तथ्यया लिधंसाय् आः जुइ धयाच्वंगु दाङ्गया अधिवेशन जुइगु खःकि मखु धयागु खँय् स्वयम् पदाधिकारीत अन्यौलय् दु । सल्लाहकार व संरक्षकतय्सं जु हे जुइ धयागु विश्वास सुयातं बी फयाच्वंगु मदु ।

आः जुइ धयाच्वंगु तःमंँज्याया पूर्व तयारीयात कयाः चिन्तन यायेबलय् थ्व तःमुँज्या जुइ धयागु आधार तसकं सालुयाच्वंगु दु । आःया तःमुँज्या न्हापा आनन्दकुटी स्कुलय् पूर्णता कायेमफुगु तःमुँज्याया निरन्तरता खः धयागु खँ पिदनाच्वंगु दु । तर खुदँ तक दिनाच्वंगु तःमुँज्या, आः नारायणघाटय् जूगु विधान अधिवेशन व उकिं पारित जूगु संशोधनया आधारय् काठमाडौं स्थानीय विकासया ज्याकुथी प्रमाणीकरण जूकथं न्ह्याइ धयागु बल्लाःगु तर्क न्ह्यःने हयाच्वंगु दु ।

तर विडम्बनाया खँ, नारायणघाटय् पारित जूगु विधान लिपा प्रमाणीकरण जूगु इलय् आपालं हिलासू वःगु दु धयागु प्रमाण सहितया विवाद आः नं न्ह्यानाच्वंगु दु, तर प्रमाणीकरण जुयावःगु विधान आः तक सुं नं सदस्य खलः पुचःतय्त उपलब्ध याकूगु मदुनि, जिल्ला जिल्लाय् थ्यनाच्वंगु मदुनि। हिलावःगु विधानया आधारभूत खँ हे मसीक सदस्यतय्सं थुगु अधिवेशनयात गुकथं काइगु खः, इलं हे जक धाइ तिनि ।

दांगय् जुइ धयातःगु खुक्वःगु तःमुँज्याया दिं सतिनाः आः पतिंचाय् ल्याखाये फयेधुंकल, तर स्रोतया धापूकथं उगु परिमार्जन जुयावःगु विधानत जिल्लाय् थ्यनीगु ला छु, छपाई तकं मजूनि धयागु दु । विधानकथं हे आः जिल्ला अधिवेशन जुयाः अनं प्रतिनिधित वयाः तःमुँज्याय् ब्वति काइ धयातःगु दु । तर थुलि अल्प इलय् जिल्ला अधिवेशन जुइ फइगु सम्भावना मदु ।

मेखे थीथी जिल्लाय् न्हापा हे अधिवेशन जुइ धुंकूगुलिं अन प्रतिनिधित जक छ्वया हःसा गाः धयागु खँ नं पिदनाच्वंगु दु, तर विधान स्थानीय विकास अधिकारी कार्यालयस प्रमाणीकरण जुइ न्ह्यःया जिल्ला अधिवेशनयात मान्यता बी फइगु स्थिति मदु । स्वयम्भूया आनन्दकुटी स्कुलय् दिनाच्वंगु खुक्वःगु तःमुँज्याया प्रतिनिधितय्गु हैसियत छु जुइगु खः स्पष्ट मजूनि ।

आनन्दकुटीया अधिवेशन स्थगन जक जुयाच्वंगु मान्यताय् उगु इलय् प्रतिनिधि जुयाच्वंपिं सदस्यतय्गु अस्तित्वयात अस्वीकार यायेगु स्थिति ब्वलनी मखु । उगु इलय् तःमुँज्याय् ब्वति कायेत तःमुँज्या ग्वसाः खलकं क्वछिनातःगु शुल्क व नियमया आधारय् थुपिं तःमुँज्याया ब्वकथं अधिकार सम्पन्न प्रतिनिधित खः । थुमित आः नियम हिल, छिपिं वये दइ मखु धयां स्थगन धकाः सुम्क तयातःपिं सुं प्रतिनिधि सुम्क च्वनीगु स्थिति दइ मखु ।

मेखे आः तःमुँज्या ग्वसाः खलः हे न्ह्याः वयाः जिल्ला अधिवेशन क्वचायेकेगु खँ नं पिदनाच्वंगु दु, तर आः जुयाच्वंगु थीथी जिल्लाय् देय् दबूया नायःया हैसियत कयाच्वंम्ह मनू, तःमुँज्या ग्वसाः खलःया असहमति वावजूद मूपाहां जुयाः संलग्न जुयाच्वंगु सन्दर्भय् आः जुइगु देय् दबूया न्हू कार्यसमितिया ल्यज्या गुकथं स्वच्छ जुइफइ धयागु न्ह्यसः नं ब्वलनाच्वंगु दु ।

थःनि गुदँ न्ह्यः धनकुटाय् जूगु देय् दबूया पदाधिकारी ल्यज्या षडयन्त्रपूर्वक मतदान याइपिनिगु नां धलः हे सार्वजनिक मयासे पदाधिकारी ल्ययेगु ज्या जूगु खः । थ्वयां लिपा आनन्दकुटीइ जूगु तःमुँज्याय् विधान विपरित गठन जूगु संगठनया पदाधिकारीतय्त मतदान याके बीगु षडयन्त्र जुइवं तःमुँज्या हे स्थगन जूवंगु खः । आः दाङ्गय् जुइत्यंगु तःमुँज्याय् नं थुज्वःगु हे छुं षडयन्त्रमूलक ज्याझ्वःत हयाः छथ्वः मनूत निर्वाचित जुइगु आशंका ब्वलनाच्वंगु दु ।

आः दाङ्गय् जुइ धयाच्वंगु तःमुँज्या आःया संशोधित विधानकथं हे जुइमाःगु खँय् विवाद मदु । तर विधानय् न्ह्यथनातःकथं विधान लागू जुइ न्ह्यः निर्वाचित निकायत थःगु पदावधि दुगु ई तक जक कायम जुइ (परिच्छेद ११, विविध दफा ४४ उपदफा २) धयागु स्पष्टकथं न्ह्यथनातःगु दु । उकिं आः कार्यसमिति धकाः विद्यमान जुयाच्वंपिं सकलें म्याद फुइधुंकूपिं पदाधिकारीत जुयाच्वंगु खःसां आः नं थुमिसं थःपिं हे आधिकारिक धकाः दावी यानाः तःमुँज्या न्ह्याकेगु प्रपंच याना वयाच्वंगु खनेदु । थ्व अवैधानिक ज्यायात कयाः सुयां ध्यानाकर्षण जुल धाःसा मेगु हे दृश्य पिदनीगु निश्चित दु ।

नेवाःतय्गु राष्ट्रिय संगठन नेवाः देय् दबू सकल नेवाःतय्गु मंकाः संगठन धयागु मान्यता ब्वलनाच्वंगु सन्दर्भय् आः दिनाच्वंगु तःमुँज्यायात सकसियां सहमतिं न्ह्याकेमाःगु खँय् विवाद मदु । षडयन्त्रमूलक ढंगं सुनानं नेतृत्व थःगु हे ल्हातय् लायेमाः धकाः स्वयाच्वंगु जूसा व दिवास्वप्न बाहेक मेता मखु । उकिं सकल नेवाःतय्गु हित व भिंया निंतिं सम्बन्धित सकलया ध्यान इलय् हे वनेमाःगु खनेदु । नेवाः हक अधिकारया संरक्षणया निंतिं पद तःधं धयागु मानसिकतापाखें बचे जुइमाःगु आवश्यकता दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.