All for Joomla All for Webmasters

ने.सं. ११३६ यंलागा अष्टमी

दौरा सुरुवाः व नेपाली राष्ट्रियता

एमालेया केपी ओली प्रधानमन्त्री जूबलय् फुक्क मन्त्रीतय्सं दौरा सुरुवाःलं फीमाःगु अनिवार्य याःगु खः । उकुन्हु तिनि एमालें याःगु प्रदर्शनय् चन्द्रसूर्य अंकित राष्ट्रिय ध्वाँय् ज्वनाः प्रदर्शनय् वयेत याःगु अपिलया लिउने एमालेया विचारधाराय् वःगु स्खलन जक खःला धकाः बौद्धिक वर्गय् चर्चा नं जुल । थुकिया बारे छुं भचा चर्चा यायेगु प्रासांगिक जुइगुलिं थ्व च्वसु थ्व हे विषयय् केन्द्रित जुयाः च्वयागु खः ।

हिन्दू मान्यताया अर्थ दुगु चन्द्र–सूर्य दुगु राष्ट्रिय ध्वाँय् व दौरा सुरुवाल पंचायतकालय् पंचतय्गु पहिचानकथं प्रचारित जुल । जनताया मनय् दुगु राष्ट्रिय भावनायात पञ्चायतकालय् दरवार व पञ्चतय्सं राष्ट्रिय ध्वाँय् व दौरा सुरुवाःया प्रयोग यानाः थःगु पक्षय् तया तयेत स्वःगु खः । थःगु सत्ताया निरन्तरताया नितिं दरवार व पञ्चतय्सं चन्द्रसूर्य अंकित राष्ट्रिय ध्वाँय् व दौरा सुरुवाःया गुगु प्रयोग याःगु खः थुकिया कपी थौंकन्हय् एमालें याना हल । पञ्चायतकालय् पञ्च मण्डलेतय्सं चन्द्र–सूर्य अंकित राष्ट्रिय ध्वाँय् ज्वनाः गुगु दुरुपयोग याःगु खः उकिया निरन्तरता थौंकन्हय्या एमालें यायेत सर्कुलर याःगु खनेदत ।

एमालें छुं दिं न्ह्यः याःगु प्रदर्शनय् राष्ट्रिय ध्वाँय् ज्वनाः पिहां वःगु घटना व विद्यार्थी चुनावय् राष्ट्रिय ध्वाँय् ज्वनाः प्रचारय् वनेगु निर्णय पञ्चायतकालय् मण्डलेतय्सं याःगु प्रयोगया पुनरावृत्ति जक खः । उकिं हे जुइ थौंकन्हय् उबलेया मण्डले नाइके कमल थापा व एमालेया नेतातय् दथुइ राष्ट्रवादयात स्वयेगु दृष्टिकोण छता हे जूगुलिं राजनीतिक सहकार्य जुयाच्वंगु ।

चन्द्र–सूर्य अंकित राष्ट्रिय ध्वाँय्यात पंचायतया अन्त लिपा बहुदलीय प्रजातन्त्रय् सरकारी औपचारिकता बाहेक कांग्रेस कम्युनिष्ट–तय्सं थःगु राजनीतिक गतिविधिइ प्रयोग मयाः। तर आः वयाः राष्ट्रिय एकताया निंतिं वा राष्ट्रिय अखण्डताया निंतिं धकाः एमालें चन्द्र–सूर्य अंकित राष्ट्रिय ध्वाँय्या प्रयोगयात पार्टीं हे औपचारिकता बीगु निर्णय याःगु खने दत ।

एमालेया नेतातय्के आः वयाः चन्द्र–सूर्य अंकित ध्वाँचं जक नेपाःया राष्ट्रिय एकता व अखण्डता ल्यनी धइगु ज्ञां नेपाली पहाडी राष्ट्रवादीया भावना थःगु पार्टीं क्यास यायेत छ्यःगु जक खः । ०४६ सालया आन्दोलन, ०४८ साल धुंकाः एमाले लगायत थीथी कम्युनिष्ट दलतय्सं याःगु तोडफोडपूर्ण आन्दोलन, ०६२÷६३ या जनआन्दोलन लगायत आन्दोलनय् एमालेया नेतातय्सं दौरा सुरुवाः पुनाः, राष्ट्रिय ध्वाँय् ज्वनाः आन्दोलन याःगु इतिहास मदु ।

छुं दिं न्ह्यः टोपी दिवस धकाः नं छुं मनूतय्सं दौरा सुरुवाः व नेपाली तपुलि पुनाः दिवस हंगु खनेदत । नेपाःया पहाडी लागाय् नेपाली तपुलि पुइगु परम्परा आःया मखु । च्वमि स्वय्मयात नेपाली तपुलि व दौरा सुरुवाः फीबलय् मल्वःगु मखु । तर अथे धकाः थुकियात राष्ट्रिय पोशाकया रुपय् हे दयेकेमाः धइगु पक्षय् मदु । दौरा सुरुवाःया सवालय् नं दौरा सुरुवालं नेपाःया राष्ट्रियताया समग्र प्रतिनिधित्व याइ मखु ।

थ्व पोशाक मध्य पहाडी लागाय् प्रचलित पोशाक खः तर नेपाःया फुक्क भूगोलयात ल्वःगु पोशाक मखु । दौरा सुरुवाः राष्ट्रिय पोशाक धकाःहिमाली लागाय् छ्यले फइ मखु । हिमाली लागाय् अनया मौसम कथं बक्खु हे माः । उकथं हे तान्वइगु तराई लागाय् सालुगु याउँसे च्वंगु पोशाक माः । संघीयताया कार्यान्वयन धुंकाः मधेस लागाया प्रदेशय् दौरा सुरुवाः फिना जुइ फइगु अवस्था नं मदु । उकिं हे प्रकृतिया नियम कथं नेपाःया थीथी समुदायया थःगु थाय्या मौसमया अनुकुलता कथं थःथःगु हे पोशाक दु । व फुक्कं
नेपाःया राष्ट्रिय पोशाक हे खः ।

तर मेमेगु पोशाकयात हाकुतिनाः दौरा सुरुवाः व नेपाली तपुलियात जक राष्ट्रियताया मान्यता बियाः वनेमाः धइगुली सहमत जुइ फइ मखु । नेपाःया पहिचान क्यनेत दौरा सुरुवाः व तपुलि पुइ हे माः धइगु जरुरत मदु । दौरा सुरुवाः व नेपाली तपुलि पूसा जक नेपाली पहिचान खने दइगु खःसा भगवान बुद्धयात नं थ्व पोशाक पुंकाः प्रचार याये माली, कुमारी द्यःयात नं दौरा सुरुवाः पुंके माली । वा सिएनएन सिरपाः त्याकूपिं मिसापिं, नेशनल जियोग्राफीकय् हिरो जूम्ह मीरा राई वा इण्डियन टेलिभिजनय् प्याखं हुलाः सिरपाः त्याकूम्ह तेरिया मगरयात नं दौरा सुरुवाः व तपुलि पुइकेगु ला ?

मखु नेपाली पहिचान धइगु मिजंपिसं पुनीगु दौरा सुरुवाः जक जुइमाः धइगु मानसिकता पुरुषवादी सामन्ती मानसिकता मखु ला ? उकुन्हु तपुलि दिवस धकाः गुलि नेपाली मिस्तय्सं नं नेपाली तपुलि पुनाः सामाजिक सञ्जालय् ब्वया जूगु खना । कन्हय् मिसापिं बल्लात धाःसा नेपाली मिस्तय्सं पुनीगु पर्सि नं राष्ट्रिय पोशाक जुल धकाः मिजंपिसं नं पर्सि सिनाः राष्ट्रिय पर्सि दिवस न्यायेकेगु कि ?

छगू इलय् दरवारय् दुहां वनेत अनिवार्य दौरा सुरुवाः पुनेमाःसा सिंह दरवारय् वनेत नं नेपाली तपुलि पुनेमाः । हानं छकः दौरा सुरुवाःया लोकप्रियता पहाडी लागाय् विस्तार जूगु दु । स्वतःस्पूmर्त रुपं लोकप्रिय जूसा उकियात नकारे यायेमाःगु मदु । तर थुकियात पञ्चायतकालय् थें राष्ट्रियताया प्रतिककथं थुइकाः अनिवार्यतां थ्व पोशाक प्रति अभ्यस्त मजूपिं नेपाली जनताया भावनायात च्यालेन्ज यायेगु जुल धाःसा वहे विखण्डनया पुसा पीगु जुइ ।

दौरा सुरुवाः प्रति वर्तमान प्रधानमन्त्री पुष्पकमल दाहालं खास हे लगाव क्यनाच्वंगु मदु । दौरा सुरुवाः फिना जूम्ह प्रधानमन्त्री जक राष्ट्रवादी जुइगु तर्कया छुं तुक मदु । एमालेया केपी ओली प्रधानमन्त्री जूबलय् मन्त्रीत फुकसिनं नं दौरा सुरुवाः अनिवार्य पुनेमाःगु निर्णय यात । तर इतिहासय् स्वयेगु खःसा दौरा सुरुवाःयात छगू इलय् पञ्चायतया लेगेसी कथं काइगु खः ।

०४६ सालया राजनीतिक परिवर्तन लिपा कांग्रेसया प्रधानमन्त्रीमन्त्रीतय्सं दौरा सुरुवाःयात अःपुक हे स्वीकार यात तर एमालेया मन्त्रीतसें स्वीकार याये मफु । उकिं ०४६ साल लिपाया अन्तरिम सरकारय् वंपिं एमालेया मन्त्रीतय्सं दौरा सुरुवाः मपुं । उकथं हे ०५१ सालय् मनमोहन अधिकारीया प्रधानमन्त्रीत्व कालय् नं दौरा सुरुवाः खास हे पुंगु इतिहास मदु । उबले एमालेया नेतातय्सं कोट पाइन्ट हे अःपुगु पोशाकया रुपय् ग्रहण यानाः विदेश वन ।

औपचारिक कार्यक्रमय् नं कोट पाइन्टयात हे बढावा बिल । एमालेया वर्तमान नायः निवर्तमान प्रधानमन्त्री केपी ओलीं तकं उबले कोट पाइन्ट हे फिनाः थःगु राजनीतिक धर्म पूरा यात । तर एमाले दुने विस्तारं दक्षिणपन्थी विचार–धारां हा कया हयेवं दौरा सुरुवाः, नेपाली तपुलि व राष्ट्रिय ध्वाँचय् नेपाःया एकता खंका हल ।

नेपाःया एकता अमूर्त वस्तुइ क्यनाः मखु देय्या थीथी समुदायया पहिचान, प्रतिनिधित्व व पहँुच थ्यन धाःसा जक राष्ट्रिय एकता क्वातुइगु खः । थ्व सत्ययात अस्वीकार यानाः अमूर्त वस्तुइ राष्ट्रिय एकता व अखण्डता माः जुइगु धइगु दक्षिणपन्थी विचारधारा हावी जुयावःगुया संकेत हे खः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.