राष्ट्रिय सभाया उम्मेदवारी थौं

येँ – राष्ट्रिय सभा चुनावया लागिं थौं उम्मेदवारी दर्ता यायेगु न्हि खः । उकिं संसदय् राष्ट्रिय पार्टी जुइत ताःलाःपिं न्यागू राजनीतिक दल–तय्सं चुनावय् उम्मेदवार जुइपिनि नां तयार यानाच्वंगु दु । थ्व चुनावय् एमाले व माओवादीं तालमेल यानाः उम्मेदवारी बीगु जूगुलिं माओवादीया भागय् १३ म्ह सांसद वःगु खः । माओवादीं रामबहादुर थापा बादल व दिनानाथ शर्मायात राष्ट्रिय सभाया उम्मेदवार दयेकेगु निर्णय याःगु दु ।

मेपिं उम्मेदवारत नं थीथी समुदाय व लिउने लानाच्वंगु वर्गपाखें कयातःगु दु । एमालेपाखें २९ म्ह उम्मेदवार छ्वये माःगु खःसा प्यंगू प्रदेशया उम्मेदवार म्हिगः ल्ययेधुंकूगु दु । मेगु थौं क्वःछीगु ग्वसाः दु । एमालें प्रदेश ५ पाखें नांजाःम्ह लोकगायिका कोमल वलीयात नं उम्मेदवार दयेकूगु दुसा उकियात कयाः धाःसा पार्टी दुने हे व्यापक आलोचना सुरु जूगु दु । वली वंगु चुनाव न्ह्यः तिनि राप्रपा त्वःताः एमालेय् वःम्ह खः । कांग्रेसं १६ म्ह उम्मेदवार छ्वयेत्यंगु दु । उकी नं प्रदेश १, २ व ३ या नां ल्यःगु मदुनि ।

२ नम्बर प्रदेशय् मधेसवादी दलतलिसे तालमेल यायेगु खँ जुयाच्वंगुलिं उम्मेदवार मल्यसे तयातःगु खः । कांग्रेसय् प्रधानमन्त्री शेरबहादुर देउवाया कलाः आरजु देउवां प्रत्यक्षपाखेया चुनाव बुइवं राष्ट्रिय सभापाखें जूसां सांसद जुइत कुतः याःगु खःसां अन्ततः वय्कःयात टिकट धाःसा मबिल । मेखे कांग्रेसलिसे चुनावी तालमेल यानाः न्ह्याः वनेत्यंगु मधेसवादी दल दुने धाःसा कांग्रेस सिबें नं एमाले–माओवादीलिसे तालमेल यात धाःसा संविधान संशोधन याके फइ धइगु बिचाः दुहां वःगुलिं अन्यौल ब्वलनाच्वंगु दु ।

सम्बन्धित बुखँ

LEAVE YOUR COMMENTS