मधेस आन्दोलनया रिपोर्ट ग्व ? प्रहरीयात कारवाही याये माली धकाः सुचुका तःगु द्वपं

येँ – मधेस आन्दोलनया नापनापं जूगु टीकापुर घटनाय् दोषी ठहर यानाः निर्वाचित सांसद रेशम चौधरीयात ज्वनेगु लागिं सरकारं कुतः यानाच्वंगु हे इलय् मधेस आन्दोलन व उकी जूगु थीथी घटना बारे छानबिन यायेत गठित आयोगया प्रतिवेदन सार्वजनिक यायेत मधेसवादी नेतातय्सं इनाप याःगु दु । मधेस आन्दोलन व उकी जूगु ज्यादतीपूर्ण घटनाया छानबिन यायेत गठित आयोगं थनं लछि न्ह्यः हे प्रतिवेदन तयार यानाः प्रधानमन्त्री शेरबहादुर देउवायात लःल्हायेधुंकूगु दु ।

तर सरकारं उकियात कार्यान्वयन यायेगु ला खँ हे त्वःते सार्वजनिक यायेगु तकं आँट यानाच्वंगु मदु । विज्ञ सूत्रतय्सं धाः कथं उगु प्रतिवेदन सार्वजनिक यात धाःसा उगु इलय् मधेसय् खटे जुयाच्वंपिं प्रहरीया उच्च पदाधिकारीतय्त समेत कारवाही याये मालीगु स्थिति पिहां वइगु जुयाः सरकारं उकियात अथें थन्के याना तःगु खः । प्रतिवेदनय् मधेस आन्दोलनया इलय् ज्यादतपूर्ण भूमिका म्हितूपिं छुं प्रहरी अधिकृत व जवानतय्गु नां नं उल्लेख यानातःगु दु ।

वहे इलय् जूगु टीकापुर घटनाय् आः निर्वाचित जुयादीम्ह सांसद रेशम चौधरीया छुं ल्हाः मदुगु खँ नं प्रतिवेदनय् स्पष्ट याना तःगु दु ।
कैलालीया टीकापुरय् प्रहरीया छम्ह डीआईजी लगायत च्याम्ह प्रहरीया ज्यान वनी कथं जूगु आक्रमणया घटनायात न्ह्यःने तयाः थारू आन्दोलनया आपालं नेता कार्यकर्तातय्त ज्वनाः कुना तःगु दुसा मेपिं आपाःसिया नामय् वारेन्ट जारी यानातःगु दु । उकी हे लाकाः थारू नेता लक्ष्मण थारूयात ज्वना तःगु दुसा रेशम चौधरीया नामय् वारेन्ट जारी जुयाच्वंगु दु ।

प्रतिवेदन सार्वजनिक जुल धाःसा वय्कःपिंत बियातःगु द्वपं नं फय्गं साबित जुइगु दावी सूत्रं याःगु दु । मधेस आन्दोलन जूगु १४ महिना लिपा उगु प्रतिवेदन तयार जूगु खः । प्रधानमन्त्रीया ल्हातय् लःल्हाःगु उगु प्रतिवेदन कार्यान्वयन यायेत गृह मन्त्रालयय् वये मानिगु खँ धाःगु दु । थौंकन्हय् गृह मन्त्रालयया कार्यभार नं प्रधानमन्त्री शेरबहादुर देउवां हे कयातःगु दु ।

अय्नं गृह सूत्रं धाःसा थ्व प्रतिवेदन आः विधिपूर्वक गृह मन्त्रालयय् वयेगु प्रक्रियाय् दुगु खँ धाःगु दु । प्रतिवेदन गृह मन्त्रालयय् वइबलय् तक सरकार हे हिलेधुंकीगु जूगुलिं उकियात कार्यान्वयन यायेगु जिम्मा न्हूगु सरकारया ब्वहलय् लाः वनीगु खँ धाःगु दु । मधेसवादी दलतय्सं प्रतिवेदन कार्यान्वयन मयाः धकाः आः हे सः तयाच्वंगु दुसा न्हू सरकार वइबलय् नं सः तयां तुं च्वनेगु खँ धाःगु दु ।

सम्बन्धित बुखँ

LEAVE YOUR COMMENTS