डा. केसीयात हेलिकप्टरं येँय् हल

येँ – जुम्लाय् आमरण अनसन च्वनाच्वंम्ह डा. गोविन्द केसीयात म्हिगः येँय् हःगु दु । डा. केसीयात सेनाया हेलिकप्टरं येँय् छ्वया हःगु खः । डा. केसीयात कायेत निंतिं न्हापा कर्णाली प्रदेशया मुख्यमन्त्री महेन्द्रबहादुर शाही, शिक्षा मन्त्रालयया सहसचिव, सरकारी वार्ता पुचःया संयोजक खगराज बराल व दुजः गुणराज लोहनी जुम्ला वंगु खः ।
तर कर्णाली स्वास्थ्य विज्ञानया विद्यार्थी व स्थानीय वासिन्दां उकिया विरोध यायेवं अन प्रहरीं लाठीचार्ज समेत याःगु खः । प्रहरीं दमन यायेवं डा. केसीं थः येँ वनेत तयार जूगु खँ धाःगु दु । डा. केसीयात येँय् हयाः टिचिङ अस्पतालय् भर्नायाःगु दु । अन लाठीचार्ज जुइवं विद्यार्थी व प्रहरी दथुइ झडप जूगु खःसा उकी लानाः प्रहरी जवान कमल उपाध्याय घाःपाः जूगु खः । सरकारं घाःपाः जूम्ह प्रहरी जवान मंत धायेवं डा. केसी थःहे बेडं कुहां वयाः जि येँय् वने धकाः तयार जुयादीगु खः । तर उम्ह प्रहरी जवान घाःपाः जक जूगु खः ।
थ्वहे झ्वलय् डा. केसीया समर्थन यासें म्हिगः येँय् द्वलंद्वः मनूतय्सं प्रदर्शन याःगु दु । येँया माइतीघर मण्डलांनिसें न्हू वानेश्वर तक प्रदर्शन याःगु खः ।
अथे हे म्हिगः नेपाल चिकित्सक संघं देय्न्यंकं इमर्जेन्सी बाहेक मेगु सेवा ठप्प यात । म्हिगः सरकारी अस्पताल लिसें शिक्षण अस्पताल व निजी अस्पतालय् तकं छन्हुया लागिं इमर्जेन्सी बाहेक मेगु फुक्कं सेवा बन्द याःगु खः ।

सम्बन्धित बुखँ

LEAVE YOUR COMMENTS