सरकारी लक्ष्य हासिल यायेत थाकुइगु

येँ – चालु आर्थिक दँया निंतिं सरकारं काःगु ८ प्रतिशत लक्ष्य हासिल यायेत निजी क्षेत्रं ७० प्रतिशत लगानी यायेमाःगु खँ धाःगु दु । तर निजी क्षेत्रं धाःसा थःपिं उलिमछि लगानी यायेगु अवस्थाय् मदुगु खँ धाःगु दु ।राष्ट्र बैंकं थुगु आर्थिक दँय् निजी क्षेत्रं १० खर्ब ७ अर्ब तक लगानी याइगु अपेक्षा यानातःगु दु ।

अथेहे सरकार ४ खर्ब ३२ अर्ब तका लगानी यायेगु कथं ज्याझ्वः दयेकातःगु दु । सरकारं खर्च अप्वयेके मफुत धाःसा व निजी क्षेत्रं सरकारं अनुमान याः कथं लगानी मयात धाःसा ८ प्रतिशतया लक्ष्य हासिल यायेमफइगु खँ राष्ट्र बैंकं धाःगु दु । तर राष्ट्र बैंकं धाःसा मौद्रिक नीतिया कारणं लक्ष्य हासिल जुइगु खँ धाःगु दु ।

राष्ट्र बैंकया कथं लगानी योग्य पुँजीया समस्या समाधान यायेत व ब्याज दर क्वकायेत ग्वाहालि जुइ कथं मौद्रिक नीति वःगुलिं लक्ष्य हासिल यायेत अःपुइगु खँ धाःगु दु । मेखे नेपाल बैंकर्स संघया अध्यक्ष ज्ञानेन्द्र ढुंगानां धाःसा ८ प्रतिशत लक्ष्य हासिल यायेत सम्भव मदुगु खँ कनादीगु दु ।

वय्कलं १८ प्रतिशत निक्षेप वृद्धि जुइवं १० खर्ब लगानी यायेत सम्भव मदुगु खँ कनादीगु खः । वय्कःया कथं थुगु आर्थिक दँय् ५ खर्ब तक निक्षेप परिचालन यायेफइ । सरकारं अपेक्षा याःगु स्वयां ५० प्रतिशत म्हो जक निजी क्षेत्रं लगानी यायेफइगु अवस्था दु ।

बैंकय् लगानी योग्य पुँजीया अभाव तच्वया वनाच्वंगु धासें राष्ट्र बैंकं थुगु आर्थिक दँय् नं प्राथमिक पुँजी, कर्जा व निक्षेप अनुपात (सीसीडी रेसियो) मचीकूगुलिं पर्याप्त लगानी यायेत पुँजीया अभाव जुइगु खँ ढुंगाना कनादिल । चालु आर्थिक दँय् ८ प्रतिशत आर्थिक वृद्धिया निंतिं औद्योगिक क्षेत्रं १२, कृषि ४.५ व सेवा क्षेत्रं ८.५ प्रतिशत विस्तार जुइगु अनुमान यानातःगु दु ।

सम्बन्धित बुखँ

LEAVE YOUR COMMENTS