तरकारीया भाः थहां वनीगु

आयात जुइगु तरकारीइ अग्रिम आयकर कायेवं उपभोक्ता मारय्

येँ – सरकारं थुगु आर्थिक दँनिसें भन्सारय् हे ५ प्रतिशत अग्रिम आयकर कायेगु सुरु यायेवं भारतया लगायत स्वंगूगु देसं आयात जुइगु तरकारी, सिसाबुसा, न्या व लाया भाः थहां वनीगु जूगु दु । व्यापारीतय् कथं छुं न्हिया दुने बजाः भाः थहां वनी । साउन लिपा भन्सार छुटे जूगु आपालं कृषि वस्तु बजारय् मवःनिगुलिं यानाः आःतक सी दयेक भाः थहां मवंनि ।

साउनय् भन्सार छुटे जूगु सामान बजारय् वल धायेवं छक्वलं फुक्ककथंया तरकारी, सिसाबुसाया भाःथहां वनीगु व्यापारीतय्सं धाःगु दु ।
सरकारं साउन १ गतेनिसें तरकारी, फलफुल, खसी, म्येय् व न्या आयातय् ५ प्रतिशत अग्रिम आयकर कायेगु सुरु यायेधुंकूगु दु । थ्व स्वयां न्ह्यः व्यापारीतय्सं कारोबारया आधारय् जक आयकर पुला वयाच्वंगु खःसा आः सरकारं व्यापारीतय्सं तःधंगु मात्राय् वस्तु आयात याःसां उकथंया आयकर मपूगु धासें अग्रिम आयकर लागू याःगु खः ।

आः पिने आयात यायेबलय् बिलबिजकय् खनेदइगु कारोबारय् ५ प्रतिशत अग्रिम आयकर धकाः भन्सारय् हे पुलेमाः । छुं जुयाः आयात जूगु वस्तुइ घाटा जुल धाःसा व्यापारीतय्सं उकिया दावी सहित आयकर मिलान धाःसा यायेदइ । अग्रिम आयकर कायेवं आः हे भारतं आयात जुइगु आलुइ हे थ्यंमथ्यं १० प्रतिशत भाः थहां वने धुंकूगु दु ।

निन्हुया दुने आलुया भाः थहांवंगु धासें आः प्याजया भाः नं थहां वनीगु खँ धाःगु दु । सरकारं धाःसा अग्रिम आयकरं तरकारीया भावय् छुं लिच्वः मलाइगु खँ धाःगु दु । भन्सार विभागया महानिर्देशक तोयम रोयं धयादी, ‘अग्रिम आयकरं आयात जूगु तरकारीया भावय् छुं लिच्वः लाइमखु । व्यापारीतय्सं न्हापा नं आयकर पुला वयाच्वंगु खः, आः नं पुलीगु हे खः ।

थ्व न्हूगु कर मखु, अग्रिम पुलेमाःगु जक खः । अग्रिम करयात आयात लागतय् जोडे यानाः नाफा काये मजिउ ।’सरकारं कर म्हयेगु नामय् जनतायात आर्थिक भार लाकाच्वंगु खँ व्यापारीतय्सं धाःगु दु । अग्रिम आयकर भन्सारय् बुझे यायेमाःगुलिं थःपिनिगु लागत अप्वःगु खँ धासें व्यापारीतय्सं थुकिया मार उपभोक्तातय्त हे लाःवनीगु खँ धाःगु खः ।

सम्बन्धित बुखँ

LEAVE YOUR COMMENTS