थनिंनिसें इन्टरनेटया भाः थहांवन

येँ – सरकारं थनिंनिसें दूरसंचार सेवाय् सेवा शुल्क अप्वयेकेवं थनिंनिसें हे इन्टरनेट उपभोक्तातय्सं अप्वः ध्यबा पुलेमालीगु जूगु दु । सरकारं बजेटय् हे आर्थिक दँ २०७५÷७६ या सुरु निसें हे दूरसंचार सेवा शुल्क अप्वयेकेगु न्ह्यथनेवं उपभोक्तां इन्टरनेटय् अप्वः ध्यबा पुलेमालीगु जूगु खः ।

संसारय् इन्टरनेट सेवाया भाः धमाधम कुहां वयाच्वंसां सरकारं सेवा शुल्क अप्वयेकूगु कारणं नेपालय् धाःसा थुकथं भाः अप्वयेत्यंगु खः ।

सरकारं थुगुसी न्हापांखुसी इन्टरनेट सेवा प्रदायकतय्त सेवा शुल्क कायेत्यंगु खः । सरकारं डाटा सेवाय् १३ प्रतिशत सेवा शुल्क कायेत्यंगु खःसा टेलिफोन सेवा बियाच्वंगु दूरसंचार सेवा शुल्कय् नं २ प्रतिशत अप्वयेकूगु खः । थ्व ल्याखं आः इन्टरनेट सेवाय् म्होतिं नं १३ प्रतिशतया हे ल्याखं भाः थहां वनीगु जूगु दुसा टेलिफोन सेवाय् म्होतिं नं २ प्रतिशतं भाः थहां वनेत्यंगु खः ।

इन्टरनेट सेवा बिया वयाच्वंपिं भायोनेट, सुविसु, क्लासिटेक लिसें एनसेल, नेपाल टेलिकमय् भाः अप्वयेकीगु जुइधुंकूगु दुसा वल्र्ड लिंकं भाः थकायेगु तयारी यानाच्वंगु खँ धाःगु दु । थुपिं इन्टरनेट सेवा प्रदायकतय्सं न्हापा हे खुला वा दछिया ध्यबा पुला तयेधुंकूपिंके धाःसा थप ध्यबा काइमखु, तर थ्व अवधि सिधयेधुंकाः रिन्यु यायेबलय् धाःसा थहांवंगु भाः कथं ध्यबा कायेगु खँ धाःगु दु ।

नेपाल टेलिकमं फुक्क कथंया सेवाय् भाः थमकायेगु खँ धाःगु दु । टेलिकमं विकेन्ड प्याक, नाइट टाइम अनलिमिटेड डाटा प्याक, जिएसएम थ्रीजी फोरजी, एडिएसएल, इन्डिया अफर अन्तर्गत डेली प्याकया सेवाय् सेवा शल्क थप मयाइगु खँ धाःगु दु ।
टेलिकमया प्रवक्ता प्रतिभा वैद्यं अल टाइम भ्वाइस प्याकेज, नाइट टाइम भ्वाइस प्याकेज, एसएमएस प्याकेज, मिस्डकल अलर्ट थेंज्याःगु सेवाय् मूल्य समायोजना जुइगु खँ धयादीगु दु ।

मेखे एनसेलं धाःसा सरकारं अप्वयेकूगु सेवा शुल्ककथं हे ग्राहकतय्त साउन निसें हे भाः थकाःगु दु । एनसेलं भाः थहां वनीगु बारे एसएमएस यानाः हे ग्राहकतय्त जानकारी बियाच्वने धुंकूगु दु ।

सम्बन्धित बुखँ

LEAVE YOUR COMMENTS