कन्हय् निसें अनलाइन सेयर कारोवार

येँ – शेयर लगानीकर्तातय्सं कन्हय् निसें छेँछेँय् हे च्वनाः शेयर कारोवार यायेखनीग जूगु दु । नेपाल धितोपत्र बोर्डं आर्थिक दँ २०७५÷७६या सुरुया न्हि साउन १ गते निसें अनलाइन पाखें शेयर कारोवार यायेफइगु सिस्टर संचालन याइगु जुइवं छेँछेँय् हे च्वनाः शेयर न्याये मी यायेफइगु जूगु दु ।

सरकारं कन्हय् मंगलवाः निसें स्वचालित विद्युतीय कारोवार प्रणाली (अटोमेटेड इलेक्ट्रोनिक ट्रेडिङ सिस्टम)’ लागू यायेत्यंगु खः ।
धितोपत्र बोर्डं शेयर कारोवारयात थप व्यवस्थित, प्रभावकारी व लगानीमैत्री दयेकेत थ्व प्रणाली लागू यायेत्यनागु खँ धाःगु दु ।

अनलाइनपाखें शेयर कारोवार यायेगु निंतिं दकलय् न्हापां शेयर दलालयाथाय् वनाः थःगु पूवंक विवरण सहितया केवाईसी फारम जायेकाः युजरनेम व पास वार्ड कायेमाः । थ्व युजरनेम व पासवर्ड कायेधुंकल कि इन्टरनेट दुथाय् न्ह्याथाय् च्वनाः नं शेयर न्यायेमी यायेफइ ।

थ्व अनलाइन प्रणाली नेपाल स्टक एक्सचेञ्ज व शेयर दलाल कम्पनीइ जडान यानातःगु दु । लगानीकर्ता थःगु शेयर न्याये वा मी माल धाःसा धितोपत्र दलालयात थ्व अनलाईन प्रणाली पाखें आदेश बीमाः । थथे आदेश बीबलय् आदेश बिउम्हेसिया म्हसिका स्पष्ट जूगु, कारोवार याये चाहेजूगु संगठीत संस्था, शेयरया किसिम, परिमाण, मू व ई, धितोपत्र खरित वा विक्री छुकिया निंतिं आदेश खः व स्पष्ट रुपं तयेमाः ।

शेयर दलालं थज्याःगु आदेश वल धायेवं जक धितोपत्र कारोवार यायेदइ । शेयर सूचीकरण धुंकाः न्हापांगु कारोवारया मू व व धुंकाः जुइगु कारोवार मूया अन्तर, छन्हु न्ह्यः बजाः बन्द जूबलय् कायम जूगु मू व कन्हय् कुन्हु कारोवार सुरु जूगु मूया अन्तर व न्हियान्हिथं खुइन्हु तक कारोवार मजूगु शेयरया पुनः कारोवार यायेबलय् शुरु जुइगु मू धाःसा मूल्य परिवर्तन सीमाया आधारय् व्यवस्था याइ ।

अथेहे बजारय् न्ह्यव हे सूचं पितबियाः कारोवार जुइगु शेयरया न्यूनतम व अधिकमत ल्याः नं तोके यायेफइगु नियमावलीइ व्यवस्था दु । अथेहे शेयर कारोवार जुइबलय् बैंकपाखें ध्यबा कालबिल यायेगु व्यवस्था, बैंक खाताय् भुक्तानी यायेमाःगु व्यवस्था, शेयर दलालं कारोवारया निंतिं छ्यलीगु खाता कारोवारलिसे सम्बन्धित प्रयोजन बाहेक मेगु लागिं छ्यलमजिउगु व्यवस्था नं यानातःगु दु ।
आः जडान याःगु विद्युत कारोवार प्रणालीया सफ्टवेयर धाःसा परीक्षण याये ल्यंदनिगु खँ धाःगु दु । थ्व सफ्टवेयर दुगु खराबी वा मेगु समस्या धाःसा कारोवार सुरु जुइवं जक सिइकेफइगु खँ धाःगु दु ।

सम्बन्धित बुखँ

LEAVE YOUR COMMENTS