जनजाति आन्दोलनया तयारी

येँ- थीथी प्रदेशया नामाकरणया ज्याय् राज्य पक्षं पहिचानया मुद्दायात वेवास्ता यानाच्वंगु खँयात कयाः आदिवासी जनजाति राष्ट्रिय आन्दोलनं विरोधया ज्याझ्वःत याइगु जूगु दु । उकिया लागिं बैठकत च्वनाः तयारी ज्याझ्वःत जुयाच्वंगु खँ सीदुगु दु ।

उकिया लागिं तयारी यानाच्वनादीम्ह जनजाति नेता डा. ओम गुरुङं आः ३ गते छगू वृहत् भेला च्वनाः कार्यक्रमया ज्याझ्वः क्वःछीगु तयारी जुयाच्वंगु दु ।

पहिचानया खँयात वेवास्ता यानाच्वंगु खँयात कयाः छुं ई न्ह्यः तिनि आन्दोलनया संयोजक पद्मरत्न तुलाधरं छगू वक्तव्य पिकासें आः नकतिनि ४ प्रदेशया नां गण्डकी प्रदेश तःगु खँय् असन्तुष्टि प्वंकादीगु खः । थ्व प्रदेशया नां ‘तमुवान–मगरात’ तयेमाः धकाः स्थानीय आदिवासी जनजातितय्सं माग यानाच्वंसां नं सरकारं वेवास्ता याःगु कारणं थुकिं यानाः बांमलाःगु लिच्वः पिहां वल धाःसा उकिया जिम्मेवारी सरकारं हे काये माली धकाः नं ख्याच्वः बियादीगु खः ।

छुं न्हि न्ह्यः तिनि संयोजक तुलाधरया छेँय् हे थुकियात कयाः च्वंगु आदिवासी जनजातितय्गु छगू बैठक च्वनाः सरोकार क्यनेगु ज्या जूगु खः । वयां लिपा आः थुकिया विरुद्ध आन्दोलन न्ह्याके मालीगु खँयात वाःचायेकाः ३ गते वृहत् भेला सःताः कार्यक्रम सार्वजनिक यायेगु तयारी जूगु खः ।

सम्बन्धित बुखँ

LEAVE YOUR COMMENTS