ने. सं. ११४४ चौलाथ्व दशमी -

विश्वकप पुलुपालु

नेयमार भाइरल

फिफा विश्वकप फुटबलय् दकलय् अप्वः न्याक्वःतकया उपाधि विजेता ब्राजिल थुगुसीया विश्वकपं पिहां वनेधुंकूगु दु । बेल्जियम विरुद्धया क्वार्टरफाइनलय् २–१ गोलं पराजित जुयाः ब्राजिलया विश्वकपया यात्रा क्वचाःसां वया मुख्य स्ट्राइकर नेयमारया चर्चा विश्वकपय् आतक जुयाच्वंगु दु । नेयमारया चर्चा वयागु खेल शैली व कौशलतायात कयाः मखसे वयागु चर्तिकलायात कयाः खः ।

नेयमारया चर्चा स्वयां वयात पात्र दयेकाः चर्चा यायेगु ज्या थ्व इलय् रुस विश्वकपय् जुयाच्वंगु दु । नेयमारं याःगु थेंज्याःगु हे अभिनयया भिडियो सामाजिक संजालय् तयेगु क्रम लिपांगु इलय् छक्वलं अप्वया वनाच्वंगु दु । जबकि विश्वकप फुटबल थौं औपचारिक रुपं सिधयेत्यंगु दु ।

जारी विश्वकपय् नेयमार अनावश्यक रुपं मैदानय् ग्वारा ग्वारा तूगु घटना यक्वसिनं वयात कासामि मखसे कलाकार’या रुपय् व्यंग्य यानाः नाटक याःगु धासें आलोचना याना हयाचवंगु दु । अझ अफ्रिकाया छगू कम्पनीं ला नेयमारया उगु नाटकयात कयाः छगू विज्ञापन हे दयेकूगु दु । मेम्ह छम्हेसिनं ला नेयमार स्वयां नं अप्वः खिचा ग्वाराग्वारा तुलीगु जक मखसे चाचाःतुलाः वनाच्वंगु भिडियो दयेका पोस्ट यानातःगु दु ।

कासा छगू, घटना ३८७ !

विश्व फुटबलया इतिहासय् इंग्ल्याण्डया समर्थकतय् छवि उलि बांलाः मजू । विश्व फुटबलय् इंग्ल्याण्डया समर्थकतय्त दकलय् उच्छृंखल, असभ्य, हुल्याहाया रुपय् कायेगु याः । गन इंग्ल्याण्डया समर्थक दइ, अन हुलदंगा जुइ धकाः नं धाः । थ्व हे कारणं विश्वकपय् इंग्ल्याण्डया समर्थकतय्त संयमित जुयाच्वनेत प्रहरीं ख्याच्वः नं बिइगु याइ ।

घटना इंग्ल्याण्डया हे खः । इंग्ल्याण्ड विरुद्ध स्वीडेन दथुइ जूगु कासाय् कानुन अःखः ३८७ गू स्वयां अप्वः उच्छृंखल घटना जुल । अज्याःगु घटना न्यंकूगु द्वपनय् ७० म्ह स्वयां अप्वःसित प्रहरीं नियन्त्रणय् नं काःगु खः । थःगु हे देशय् छन्हुं हे झण्डै प्यसः कानुन अःखःया घटना जुइवं विश्वकपया इलय् संयमित जुइत धासें इंग्लिश समर्थकतय्त प्रहरीं ख्याच्वः बिउगु खः ।

इंग्लिश समर्थकत अप्वःथें अय्लाः त्वनाः होहल्ला यायेगु व हुलदंगा यायेगुलिइ माहिर । स्वीडेन विरुद्धया कासाय् विजय प्राप्त यायेवं समर्थकतय्सं लण्डन ब्रिजय् छगः एम्बुलेन्स तोडफोड याना बिउगु खःसा सतक अवरुद्ध यानाः बस, कारया च्वय् गयाः तिंन्हुइगु, ट्याक्सी तोडफोड याना बिउगु खः ।

समर्थकतय्त टियर ग्यास

विश्वकप अन्तिम चरणय् थ्यंलिसें रोमाञ्चक जुया वइ अले फाइनलय् तक थ्यनीबलय् झन अप्वइ । सुनां उपाधि त्याकी धइगु कौतुहलता दयाच्वनी । नकआउटनिसें फाइनल तक थ्यनेत सफल व असफल निगुलिं टिमया समर्थकतय् मिखां ख्वबि नं पिहां वइ । त्याःगु टिम व वया समर्थकत लसतां ख्वइ, पराजय फःगु टिमं वियोग, वेदना व दुःखी जुयाः ख्वइ ।

थ्व झ्वलय् १२ दँ लिपा विश्वकपया फाइनलय् थ्यंगु लसताय् हनाच्वंपिं समर्थकय्त पेरिसय् टियर ग्यास प्रहार जूगु दु । १२ दँ लिपा विश्वकपया फाइनलय् थ्यनेत सफल फ्रान्सया समर्थकत उच्छृंखल जुयाः लसता हनेगु झ्वलय् तोडफाडय् तकं कुहां वयेवं इमिगु लसताया ख्वबि टियर ग्यासया ख्वबिइ हिउगु खः ।

विजयया लसता हनेत पेरिसय् मुनाच्वंपिं समर्थकतय्सं प्रहरीयात हे अपा व सिमेन्टया कुचां तक प्रहार यायेवं स्थिति तनावग्रस्त जुल । वयां लिपा प्रहरीं स्थिति नियन्त्रणय् कायेत टियर ग्यास कयेकूगु खः ।