सरकार पञ्चायती शैलीं वयाच्वन – प्रा‍ डा केदारभक्त माथेमा

येँ – जुम्लाय् अनसन च्वनादीम्ह डा. गोविन्द केसीया स्वास्थ्य खराब जुया वंलिसे वय्कःया माग पूवंकाः वय्कःयात बचे याये माल धासें म्हिगः येँय् विरोध प्रदर्शन जुल ।

येँया माइतिघर मण्डलाय् प्रदर्शन यानाः अनं तुं जुलुस न्ह्याकाः न्हू वानेश्वरय् वंगु खः । अनं तुं याःगु छगू सभाय् डा. केसीया माग पूवंकेमाः धकाः न्हापांनिसें सक्रिय जुया वःपिं अभियन्तातय्सं सम्बोधन यानादीगु खः ।

सरकारया लागिं चिकित्सा शिक्षाया रिपोर्ट तयारयानादीम्ह डा. केदारभक्त माथेमां आः वइगु झिदँ तक स्वनिगलय् मेडिकल चायेके दइ मखु धकाः माथेमा प्रतिवेदनय् धयातःगु खँ मिले मजू धाइपिंसं कारण समेत बियाः धाः वयेत हाथ्या बियादिल । वय्कलं सरकार थौंकन्हय् पञ्चायती शैलीं सञ्चालन जुयाच्वन धकाः द्वपं बियादिल ।

अथे हे पुलांम्ह स्वास्थ्यमन्त्री लिसें नेपाली कांग्रेसया सांसद गगन थापां मेडिकल कलेज अप्वः चायेकेवं नेपालय् विदेशी विद्यार्थीत ग्वाःग्वाः ब्वं वइ धकाः बिचाः मयायेत आग्रह यानादिल । वय्कलं मेडिकल कलेज चायेकेगु धइगु जहाजया खँ ल्हाये थें मखु धकाः नं चेतावनी बियादिल ।

मेडिकल कलेजत यक्व दयेवं उपचारया गुणस्तर बांलाइगु मखु धासें वय्कलं अथे खःसा बंगलादेशय् उपचार तसकं बांलायेमाःगु खः तर नेपाःया प्रधानमन्त्री हे थःगु उपचार याकेत बंगलादेश मवँसे छाय् बैंकक वनाच्वन धकाः न्ह्यसः नं तयादिल ।

वरिष्ठ अधिवक्ता सुरेन्द्र केसीं थौंकन्हय् प्रम केपी ओलीं लाक्वपाक्व न्ववाना जूगु दु, यदि थ्वहे पहः जुयाच्वन धाःसा वय्कःया अवस्था नं लोकमान कार्कीया थें जुइ धकाः ख्याच्वः बियादिल । ज्याझ्वलय् विवेकशील साझा पार्टीया रविन्द्र मिश्रं नं न्ववानादीगु खः ।

सम्बन्धित बुखँ

LEAVE YOUR COMMENTS