छेँय् छेँय् लः दुहां वनाः करोडौं क्षति

ख्वप  – म्हीग चछि वःगु वां यानाः मध्यपुर थिमि लागाया आपालं छेँ डुबानय् लाःगु दु। स्थानीय मनूतय् छेँय् छेँय् हे लः दुहां वनाः आपालं सम्पत्ति नोक्सान जूगु दु ।मनूतय् छेँय् करिब ४ फिट धइथें तजायेक लः दुहां वंगुलिं छेँया न्ह्यःने दिकातःगु गाडी, बाइक, भुतू क्वथाया सकतां ज्वलं, टिभी, कम्प्युटर, मोबाइल, कार्पेट, फर्निचर आदि थेंज्याःगु ज्वलं नोक्सान जूगु दु ।

आः तक गुलि नोक्सान जुल धकाः ल्याःचाः पिमकाःसां सर्वसाधारण जनतायागु जक करोडौं तका बराबरया धनमाल नोक्सा जूगु अनुमान याःगु दु । थिमि मू लँया जःखः लाःगु आपालं पसः बछि धइथें डुबे जुयाः अन च्वंगु सामान नं नोक्सान जूगु दुसा आपाःसिया गोदामय् तयातःगु खाद्यान्न लगायत मेमेगु ज्वलं ज्या लगे मजुइक स्यंगु दु । 

स्थानीय सीबर्ड कलेजय् अण्डर ग्राउण्ड मुक्कं लखं जायाः अन दिका तःगु निगः गाडी खने हे मदयेक डुबे जूगु खँ कलेजया प्रवन्धक ज्ञानराम श्रेष्ठं कनादिल । उगु कलेजया नापसं च्वंगु मध्यपुर अस्पतालय् नं अण्डर ग्राउण्ड डुबे जुयाः करिब छगू दर्जन गाडी लखं त्वपुना तःगु खँ नं वय्कलं कनादिल । 

प्यखेरं लःया लः जक जुयाः म्हिगः न्हिछि अन मत व इन्टरनेट लाइन नं बन्द जूगु दु । नापं लः जाःगुलिं यातायात समेत अवरुद्ध जूवंगु दुसा उकिया लिच्वः मेमेगु थासय् समेत लानाच्वंगु दु । उगु लागा जखं जाःगुलिं मनूत सुरक्षाया लागिं छेँया च्वय्या तल्लाय् च्वं वयाच्वंगु खःसा उमित बचे यायेगु लागिं सेना समेत परिचालन याःगु खः ।

अतिक्रमणया लिच्वः डुबान ः

थ्वहे झ्वलय् ख्वप थिमि लागाय् थपाय्सकं छेँ हे डुबे जुइक गथे लः वल धइगु खँय् नं सहलह सुरु जूगु दु । स्थानीय विज्ञतय्सं धाः कथं उगु लागाया दथुं बाः वनीगु मनोहरी व हनुमन्ते खुसि अतिक्रमण यानाः छेँ दना हःगुलिं थथे लः मुंगु खः । जग्गा दलालतय्सं खुसिया ब्या तकं चिबाला यानाः जग्गा पिकासें मीगु ज्या यानाच्वंगु दु ।

थुकथं खुसि चिबाला जूगुलिं व वनेथाय् मदयाः छेँय् छेँय् दुहां वःगु खः । खुसिया प्राकृतिक वहाव व ब्यायात अवरोध याःगुलिं उगु मुक्कं लागा हे डुबानय् लाःगु खँ नं धयाहःगु दु । जग्गा दलालतय् उगु ज्याया विरोधय् अन ताः ई न्ह्यवंनिसें विवाद समेत जुयाच्वंगु खः ।

सम्बन्धित बुखँ

LEAVE YOUR COMMENTS