नेस्वरसया आह्वानय् हिदान व अभिनन्दन

येँ –  नेपाल स्वयमसेवी रक्तदाता समाजया आह्वानय् महोत्तरीया सीतापुरय् स्थानीय ल्याय्म्ह व चिकित्सा प्रयोगशाला विज्ञान संघ नेपालया मंकाः ग्वसालय् छगू वृहत हिदान व सम्मान ज्याझ्वः जुल ।

भंगाहा नगरपालिकाया प्रमुख संजीवकुमार शाहया प्रमुख आतिथ्यताय् जूगु ज्याझ्वलय् विशेष पाहांकथं चिकित्सा विज्ञान प्रयोगशाला संघ, नेपालया केन्द्रीय अध्यक्ष विनोदकुमार यादव, समाजया केन्द्रीय दुजः नापं धनुषा जिल्ला शाखाया अध्यक्ष शिवकुमार शाह व पाहांकथं स्थानीय समाजसेवी भरत यादव, नेपाली कांग्रेस तरुण दलया जिल्ला सभापति सुरेश यादव झायादीगु खः । 

वृहत हिदान ज्याझ्वःया हे झ्वलय् समाजया केन्द्रीय अध्यक्ष प्रेमसागर कर्माचार्ययात नगरपालिकाया प्रमुख शाहं दोसल्लां न्ययेकाः अभिनन्द पौ लःल्हानाः सम्मान याःगु खः । उगु इलय् जनकपुर रक्तसंचार केन्द्रया प्रमुख नारायण न्यौपानें समाजया आह्वानय् नगरपालिका लागाय् उकथं जूगु हिदान ज्याझ्वः तसकं च्वछायेबह जूगु विचाः प्वंकादीगु खः । 

नगरप्रमुखपाखें उलेज्या जूगु हिदान ज्याझ्वलय् मुक्कं ४१ म्ह स्वयमसेवी हिदातां हिदान यानादीगु ज्याझ्वः नरेशकुमार शाहया सभापतित्वय् जूगु खः । 

थ्व हे झ्वलय् नरेशकुमार शाहया संयोजकत्वय् झिंछम्ह दुजः दुथ्याःगु महोत्तरी जिल्ला शाखा नं गठन याःगु दु । शाखाय् भरत यादव, नवीन मण्डल, इन्द्रेश यादव, कमलेश सिंह, अवजीत यादव, सन्तोष शाह, सलिम राईन मियाँ, मुकेश यादव, सुरेश शाह व कृष्ण यादव सदस्यय् च्वनादीगु खः ।

सम्बन्धित बुखँ

LEAVE YOUR COMMENTS