प्यला दत, क्षतिपूर्ति बिउगु मखु

येँ – प्यला न्ह्यः येँया त्रिभुवन अन्तर्राष्ट्रिय विमानस्थलय् बंगलादेशी विमान दुर्घटना जुयाः सीपिं सुं नं नेपाःमिया छेँजःपिंसं क्षतिपूर्ति काये मखंनिगु सीदुगु दु । दुर्घटना जूगु प्यला दयेधुंकाः नं आःतक क्षतिपूर्ति काये मखंनिगुलिं उमि परिवारपिं चिन्तित जुयाच्वंगु दु ।

उगु दुर्घटनाय् लानाः नीस्वम्ह नेपाःमितय् ज्यान वंगु खः । तर आःतक थुमि सुं हे परिवारयात विमान कम्पनी वा सरकारं क्षतिपूर्तिया निंतिं स्वापू तःगु मदुनि । दुर्घटनाय् लानाः मदुपिं व घाःपाः जूपिंत क्षतिपूर्ति बीमाःगु विमान कम्पनीपाखें खः । अथे जूगुलिं सरकारी अधिकारीतय्सं थःपिंसं क्षतिपूर्तिया निंतिं सहजकर्ताया भूमिका जक म्हिते फइगु खँ धाःगु दु ।

विशेषत दुर्घटनाय् लानाः छेँया हामा सीपिनि परिवारपिनि विचल्लि जुयाच्वंगु दु । पर्यटन व्यवसायी हरिशंकर पौडेलया जहान निर्मला पौडेलं थःपिनि आम्दानीया छुं स्रोत मदुगु अवस्थाय् क्षतिपूर्ति नं मवःनिगुलिं तसकं समस्या जुयाच्वंगु खँ धयादीगु दु । वय्कलं धयादीगु दु, ‘क्षतिपूर्ति मबियाः जिगु पीडाय् थप पीडा बियाच्वंगु दु । जिगु आम्दानीया स्रोत छुं मदु, उकिं आः गथे यानाः म्वायेगु धयागु हे समस्या जुयाच्वंगु दु ।’

सरकार व एयरलाइन्सं आःतक छुं वास्ता तकं मयाःगुलिं दुर्घटनाय् लाःपिनि छेँजःपिं चिन्तित जुयाच्वंगु खः । नेपाःया सरकारपाखें धाःसा दुर्घटनाय् क्षतिपूर्ति बीकेगुली स्वंगूगु पक्षया उपस्थितिया व्यवस्था मदुगुलिं थःपिं तप्यंक वनाः धाः वने मछिंउगु खँ धाःगु दु । संस्कृति पर्यटन तथा नागरिक उड्डयन मन्त्रालयया सहसचिव व दुर्घटना जाँचबुझ आयोगया सदस्य सचिव बुद्धिसागर लामिछानें पीडिततय्पाखें उजुरी वल धाःसा जक छुं याये फइ, मखुसा अथें वनाः न्ववायेगु आधार सरकारयाके मदु धयादीगु दु ।

बांग्ला विमान दुर्घटनाय् २३ म्ह नेपाःमि व २७ म्ह बंगलादेशी यानाः ५१ म्हेसिया ज्यान वंगु खः । तर थ्व दुर्घटनाय् सीपिं नेपाःमिया छेँजःपिंसं धाःसा बंगलादेशीतय् स्वयां म्हो जक क्षतिपूर्ति कायेखनीगु जुयाच्वंगु दु ।विमान दुर्घटनाय् क्षतिपूर्ति बीगु खँ वार्सा महासन्धि व मोन्ट्रियल महासन्धिइ यानातःगु व्यवस्था कथं जक जुइ ।

नेपालं वार्सा महासन्धिइ जक हस्ताक्षर यानातःगु दुसा बंगलादेशं निगुलिं महासन्धिइ हस्ताक्षर यानातःगु दु । दुर्घटनाय् लाःगु युएस बांग्ला एयरलाइन्सया प्रमुख कार्यकारी अधिकृत इमरान आसिफं वार्सा महासन्धिया प्रावधान कथं छम्ह नेपाःमिया छेँजःयात ५० हजार अमेरिकी डलर बी फइगु प्रस्ताव तयागु खँ धयादीगु दु ।

बंगलादेशं निगुलिं महासन्धिइ हस्ताक्षर यानातःगुलिं उमि बंगलादेशी नागरिकया छेँजःपिंसं धाःसा सवा लाख डलर बराबरया क्षतिपूर्ति काये खनी । युएस बांग्ला एयरलाइन्सया सिइओ आसिफं बीबीसी बांग्ला सेवालिसे खँ ल्हासें छुं महिना दुने क्षतिपूर्ति बारे क्वःजीगु खँ धयादीगु दु । दुर्घटनाय् सीपिं व घाःपाः जूपिंत बीगु क्षतिपूर्ति धाःसा फरक जुइ ।

सम्बन्धित बुखँ

LEAVE YOUR COMMENTS