८१ दँया वैशय् गेहेन्द्रमानया आर्ट ग्यालरी
वरिष्ठ कलाकार गेहेन्द्रमान अमात्यं ८१ दँया वैशय् थ्यंकाः नं थःगु पुलांगु अमात्य आर्ट ग्यालरीयात हाकनं पुनस्र्थापित यानादीगु दु । छुं ई न्ह्यवनिसें निष्कृय जुयाच्वंगु अमात्य आर्ट ग्यालरी आर्ट नेपालया संयोजनय् येँया थाय्मदु थकुछेँय् सोमवाःनिसें हाकनं चायेकूगु खः ।
न्हू कलेवरय् पुनस्र्थापना याःगु आर्ट ग्यालरि सोमवाः छगू ज्याझ्वःया दथुइ वरिष्ठ साहित्यकार व कलाकार अमात्यया मचाबलय्निसेंया पासा मल्ल के. सुन्दरं उलेज्या यानादीगु खः । थःगु हे छेँय् मूर्धन्य कलाकार अमात्यया ग्यालरि चायेकूगु खँय् लसता प्वंकुसें भाजु मल्लं धयादीगु दु, ‘जिं ला छेँ दनाः देगः जक थनागु खः, आः मूर्धन्य कलाकार अमात्यं ग्यालरि चायेकाः थुगु छेँय् द्यः नं स्थापना यानाबिउगु दु ।’
ग्यालरिइ भाजु अमात्यया थीथी चित्र लिसें मदयेधुंकूपिं वरिष्ठ कलाकारपिं चन्द्रमान सिंह मास्के, तेजबहादुर चित्रकार, सुरेन्द्र प्रधान, जगदीश शम्शेरपिनिगु चित्र नं ब्वयातःगु दु ।
अमात्य आर्ट ग्यालरी वि.सं. २००९ सालय् हे वय्कःया छेँ खेचापुखुली चायेकूगु खः । उबलय् नांजाःपिं कलाकारपिं चन्द्रमान सिंह मास्के, हरिप्रसाद शर्मा, जीवरत्न शाक्य, लैनसिंह वाङदेल, जगदिश शम्शेर राणा, झसेन्द्र विक्रम राणा थेंज्याःपिं कलाकारपिं न्ह्याबलें मुनाच्वनीगु खः ।
थ्वयां लिपा २०१९ सालय् वय्कःपिं कालु पाण्डेया ऐतिहासिक छेँ न्यानाः कालधाराय् सरे जूबलय् थ्व ग्यालरि नं अन हे तयेयंकूगु खः । थन हे नांजाःम्ह कलाकार उत्तम नेपालीं न्हय्दँतक च्वनाः कला सृजना यानादीगु खः । थ्व ग्यालरी हाकनं २०२९ सालय् रत्नपार्कया मस्जिदय् सरे जूगु खः । थुगु मस्जिद २०५५ सालय् थुनेवं अमात्य ग्यालरी नं लक्ष्यहिन जुयाः च्वनाच्वंगु खः ।
आः कलाकार दिवेशमान सिंह प्रधान व आर्ट नेपालया ग्वाहालिं थुगु ग्यालरियात हाकनं पुनस्र्थापित यायेफुगु खँ कलाकार अमात्यं धयादीगु दु । थुकी कला संकलक मोतिरत्न तुलाधर व कोरियन कला सुभेच्छुक किमया नं ग्वाहालि दुगु खँ वय्कलं धयादीगु दु ।
LEAVE YOUR COMMENTS