ने. सं. ११४४ चौलाथ्व द्वादशी -

सलमानलिसें तापाक

उमेरं ५० पुलेधुंकूम्ह बलिउड नायिक सलमान खानयात कयाः बलिउडय् भचा अप्वः चर्चा जुइगु याः । थौंकन्हय् ५३ दँ दयेधुंम्ह बलिउड नायक सलमान न्ह्याबलें थं सुं नं सुं छम्ह मिसा व नायिका नापं सतिनाच्वंगु, डेटिंगय् वंगु, मतिना स्वापू दुगु आदि इत्यादि खँ चर्चाय् वयाच्वनीगु खः ।

लिपांगु इलय् वयाः नायक सलमान व नायिका युलिया वन्तुर दथुइ प्रेम सम्बन्ध क्वातुया वनाच्वंगु धइगु खँ व्यापक चर्चा जुयाच्वंगु खः । तर आः वयाः इमि दथुइ सम्बन्ध ख्वाउँया वंगु धइगु खँ चर्चाय् वयाच्वंगु दु । सलमान व युलियायात शुटिंगस्थलय् जक मखु ‘आउटडोर’य् नं नापनापं वनाच्वंगु खनाच्वंगु खः । तर आः वयाः इमिगु लँपु फरक जूगु दु ।

सलमान थ्व इलय् ‘द–बांग’ फिल्मया प्रमोशन यायेत पिहां वनाच्वंगु दु । न्ह्याबलें थें सलमान नापं खने दइम्ह युलिया थ्व इलय् सलमाननापं मदु । थ्व इलय् युलिया नं विदेशय् हे वनाच्वंगु दु । तर सलमाननाप मखसे वया थः हे छेँजःपिं नापं इटालीइ विदा माने यानाच्वंगु दु ।

प्रायःथें शुटिंग मजुइगु इलय् नं आउटडोरय् सलमाननाप हे खने दइम्ह युलियां आः वयात याकचा त्वःता बिउगु दु । गनं थुकिया कारण सोनाक्षी, क्याटरिना व ज्याकलिन फर्नाण्डिस जकं खःला धइगु न्ह्यसः दनाच्वंगु दु । थज्याःगु न्ह्यसः दनीगु स्वाभाविक नं खः छाय्कि थ्व इलय् थुपिं सकलें नायिक सलमान नापं हे भ्रमणय् वनाच्वंगु दु ।