मतया भाः थकायेगु भारतीय प्रस्ताव अस्वीकार
येँ – नेपालं न्यानाच्वंगु मतया भाः थकायेगु भारतीय प्रस्तावयात विद्युत प्राधिकरणया अधिकारीतय्सं अस्वीकार यानावःगु दु । शुक्रवाः भारतय् जूगु दुइपक्षीय बैठकय् बिहारं न्याना हयाःगु मतय् १५ निसें २० प्रतिशत भाः थकायेगु प्रस्ताव भारतीय पक्षं तःगु खः । तर बैठकय् सहभागी प्राधिकरणया अधिकारीतय्सं थुकियात अस्वीकार यायेवं मेगु बैठकय् समाधान मालेगु सहमति यासें बैठक क्वचायेकूगु खः ।
भाः थकायेगु प्रस्ताव नेपालं माने मयाःसां भारतीय पक्षं धाःसा बिया वयाच्वंगु मत कटौती याइमखु । नेपालं भारतपाखें न्याना हयाच्वंगु ४५० मेगावाट मत मध्ये थ्यंमथ्यं ३०० वाट मत बिहार पाखें न्याना हयेगु याना वयाच्वंगु खः । थौंकन्हय् नेपालं १३२ केभिए क्षमताया प्रशारण लाइन पाखें न्यानाहःगु मतया भाः प्रति युनिट ५ तका ५५ पैसा पुला वयाच्वंगु खःसा ३३ केभिए प्रशारण लाइनं न्याना हयातःगु मतयात ६ तका भारु पुला वयाच्वंगु खः ।
भारतीय प्रस्ताव स्वीकार यात धाःसा दँय् डेढ अर्ब ध्यबा
अप्वः पुलेमालीगु
आः पुला वयाच्वनागु ध्यबा हे अप्वः खः धासें नेपालं थुकिया भाः न्हापं म्हो यायेमाःगु धयाच्वंगु अवस्थाय् भारतीय पक्षं अःखबतं मतया भाः थकायेगु प्रस्ताव तःगु खः ।नेपाल विद्युत प्राधिकरणया प्रवक्ता प्रबल अधिकारीं बिबिसीलिसे खँ ल्हासें धयादीगु दु, ‘बिहारं भाः थकायेगु प्रस्तावय् धिबाछगः ध्यबा नं थकायेगु अवस्था मदु धासें नेपालं अस्वीकार याःगु दु । उखे मतया भाः थहां वंगु धासें नेपाःयात बिया वयाच्वंगु मतया भाः नं थकायेगु कुतः याःगुलिं जिमिसं सहमति मबियागु खः ।’
नेपालं न्याना वयाच्वंगु मतया भाः दँय्दसं साढे ५ प्रतिशत स्वतः थहां वनीगु कथं जुयाच्वंगु सहमतिइ हे थगुने तिनि नेपाःया इनाप कथं सच्चे याःगु खः । आः मतया भाः क्वःछिइत याकनं हे मेगु बैठक जुइगु खँ प्रवक्ता अधिकारीं धयादीगु दु । थगुने नेपालं झिंछलाया दुने भारतपाखें १३ अर्ब तकया मत न्यानाहःगु खः ।
आः बिया वयाच्वंगु भावय् मत बीत माने मजुल धाःसा नेपालं थप डेढ अर्ब तका अप्वः पुलेमालीगु खँ विद्युत प्राधिकरणं धाःगु दु ।
नेपालं भारतया बिहार बाहेक मेमेगु भारतीय ऊर्जा कम्पनीपाखें ढल्केबर मुजफ्फपुर प्रशारण लाइनपाखें १२० मेगावाट व टनकपुरपाखें ३० मेगावाट मत न्याना वयाच्वंगु दु । थुकिया लिसें उत्तर प्रदेशपाखें १० मेगावाट व उत्तराखण्डपाखें १ मेगावाट मत न्यानाच्वंगु दु ।
LEAVE YOUR COMMENTS