ने. सं. ११४४ चौलाथ्व अष्टमी -

अरनिको समाजया निःशुल्क स्वास्थ्य शिविर

यल – अरनिको समाजया ग्वसालय् थनया ख्वनाय् वंगु शनिवाः छगू वृहत निःशुल्क स्वास्थ्य शिविर जुल । आर्थिक स्थिति कमजोर जूपिंत स्वास्थ्य सेवाय् सहज रुपं पहुँच थ्यंकेगु उद्देश्यं उगु शिविर जूगु खः । यल महानगरपालिका वडा नं. २१ स्वास्थ्य समितिया ग्वाहालिं ख्वनाया रुद्रायणी मा.वि.इ जूगु शिविरय् मिखा, मुटु, स्येँ, प्वाःया छ्यंगू, वा, जनरल, नसा व मिसा ल्वय् सम्बन्धी थीथी ल्वय्या निःशुल्क परीक्षण यायेगु ज्या जूगु खः ।समाजया महासचिव सुशील प्रजापतिं बियादीगु जानकारीकथं शिविरय् दकलय् अप्वः ज्याथजिथिपिं व मिसापिंसं स्वास्थ्य परीक्षण याकूगु खःसा इमित निःशुल्क वासः नं इनाबिउगु खः ।

शिविरया उलेज्या नेकपा (माओवादी केन्द्र)या नेतृ नापं यल क्षेत्र नं ३ पाखें प्रतिनिधिसभाय् निर्वाचित पम्फ भुसालं यानादीगु खः । शिविरया उलेज्या यासें नेतृ भुसालं गरिब व विपन्न वर्गं थज्याःगु शिविरपाखें यक्व लाभान्वित जुइ फइगु जूगुलिं थज्याःगु ज्याझ्वःया महत्व आपालं दुगु नापं निरन्तरता बिया वनेमाःगु खँय् बः बियादिल । चीनय् अध्ययन यानाः नेपाः लिहां वःपिंसं नीस्वंगु अरनिको समाजं निगू देय्या दथुइ कुटनीतिक सम्बन्ध, लोककल्याणकारी ज्या व शिक्षाया ख्यलय् बिया वयाच्वंगु योगदानयात कयाः च्वछायादीगु खः ।

ज्याझ्वलय् नेपाःस्थित चिनिया दूतावासया डीसीएम याङ सि छावं नेपाःमितय् स्वास्थ्य् सहज पहुँच, नेपाःया विकास व समृद्धि नापं सामाजिक न्यायया निंतिं चीन सरकार व जनता न्ह्याबलें सहयोगी जुयाच्वनीगु विचाः प्वंकादीगु खः । समाजया नायः डा. सर्वोत्तम श्रेष्ठं स्वास्थ्य शिविरय् सहज पहुँच व निगू देय्या सम्बन्ध अझ बांलाका यंकेगु उद्देश्यं समाजं याना वयाच्वंगु थीथी ज्याझ्वःत मध्ये स्वास्थ्य शिविर छगू महत्वपूर्ण ज्याझ्वः जूगु जानकारी बियादीगु खः ।

ज्याझ्वलय् यल मनपा २१ वडाया वडाअध्यक्ष रविन्द्र महर्जन, चिनिया दूतावासया सांस्कृतिक सहचारी छिपाइ, समाजया उपाध्यक्ष डा. मनोजमान श्रेष्ठ, अरनिको सांस्कृतिक व व्यापार प्रवद्र्धन समाजया अध्यक्ष अजरमान जोशी, वडा स्वास्थ्य समितिया अध्यक्ष अशोक महर्जनं २०७२ बैशाख १२ गतेया विनाशकारी तःभुखाचं ख्वनाया गां छगुलिं हे ध्वस्त जूगु व थुकथंया स्वास्थ्य शिविर तसकं महत्वपूर्ण जूगु धासें सफलताया कामना यानादीगु खः ।