ने. सं. ११४४ चौलाथ्व द्वादशी -

अजू चायापुगु पदयात्रा ब्लाइन्ड रक्स वान

येँ – ‘ब्लाइन्ड रक्स’ नांया छगू संस्थाया ग्वसालय् येँ छगू अजू चायापुगु पदयात्रा ज्याझ्वः जुल । ‘ब्लाइन्ड रक्स वान’ नामं जूगु उगु अजू चायापुगु पदयात्राया उलेज्या मूपाहांकथं झायादीम्ह नायिका बेनिशा हमालं मिखाय् कापतं चिनाः तुयुगु तुतांया ग्वाहालिं न्यासि वनाः यानादीगु खः ।

नेपालय् न्हापांखुसी जूगु उकथंया ज्याझ्वः फिरोज शाक्यया संयोजनय् व डा. सुरज शाक्यया प्रबन्धं जूगु खः । ज्याझ्वःया मू उद्देश्य धइगु हे दृष्टिविहीन जूपिंसं तुयुगु तुतांया ग्वाहालिं लँय् न्यासि वनेबलय् गुलितक संघर्ष यायेमाः व छु गज्याःगु समस्या फयेमाः धइगु अनुभव प्रयोगात्मक रुपं मेपिंत जानकारी बीगु ल्याखं खः धकाः ग्वसाः खलकं धाःगु दु ।

दृष्टिवानतय्त अज्याःगु प्रयोगाात्मक तरिकां अनुभव याकेत धकाः मिखाय् कापतं चिनाः स्वयमसेवकया ग्वाहालिं दृष्टिविहीननापनापं न्यासिकूगु खः । पदयात्रा न्ह्याके न्ह्यः संस्थाया अध्यक्ष दृष्टिविहीन सृष्टि केसीं दृष्टिवानतय्त मिखाय् कापतं चिनाः तुयुगु तुतां ज्वनाः उकिसनं स्वयमसेवकया ग्वाहालिं न्यासि वनेत इनाप यानादिल, तर शुरुइ धाःसा सुं नं तयार मजुल ।

मेपिनिगु ला छु खँ स्वयम जि नं तयार मजुयागु खः धयादिल । जब वय्कलं ‘प्लीज डेयर टु वाकविथ ब्लाइन्ड फोल्ड’ धकाः अपिल यानादिल अबलय् सकसिनं थःथःगु मिखाय् कापतं चीगु शुरु जुल, अनं लिपा अतिकं व्यस्त लागा बसन्तपू, वंघः, असं, कमलाछि, रानीपुखू, भोताहिति, वीर अस्पताल, न्हूसतक जुयाः हाकनं बसन्तपुलिइ हे थ्यंकाः पदयात्रा क्वचायेकूगु खः ।

ज्याझ्वलय् नवासें मूपाहां हमालं थम्हं सृष्टि केसीया सत्यकथाया लिधंसाय् दयेकूगु संकिपा ‘ब्लाइड रक्स’य् सृष्टि हे जुयाः अभिनय यानागु व उगु भूमिका थःगु निंतिं तसकं चुनौतिपूर्ण जूगु धयादिल । उगु पदयात्राय् नीम्ह दृष्टिविहीन व स्वीम्ह दृष्टिवानयात मिखाय् कापतं चिनाः प्रत्येक यात छम्ह छम्ह स्वयमसेवकया ग्वाहालिं सहर परिक्रमा याकूगु खः ।