पद्मरत्न अभिनन्दनया निंतिं सचिवालय गठन

ये – नेवाः न्ह्यलुवा पद्मरत्न तुलाधरया नागरिक अभिनन्दन नेवाः आन्दोलनया हे छगू लँपु जूगु खँ धाःगु दु । पद्मरत्न तुलाधरया तःजिक नागरिक अभिनन्दन यायेगु निंतिं आइतवाः थनया क्षेत्रपाटी पार्टी प्यालेसय् जूगु तःजिगु भेलाय् न्ववानादिसें नेवाः न्ह्यलुवा मल्ल के सुन्दरं थ्व खँ धयादीगु खः । ज्याझ्वलय् न्ववानादिसें वय्कलं पद्मरत्न थज्याःम्ह व्यक्तित्व खः, गुम्हेसिया स्वापू राजनै तिक, साहित्यक,
नेवाः आन्दोलन, नागरिक आन्दोलन, मानवअधिकार न्ह्यागु कथं स्वःसां छुं न छुं खँय् झीलिसे स्वापू दःवइ धयादिसें वय्कलं वय्कःया अभिनन्दन नेवाः आन्दोलनया छगू ब्वकथं न्ह्याके माः धयादीगु खः ।

अथे हे वय्कलं सुं नं विदेशीपिं वइबलय् नागरिक अभिनन्दन धयागु निर्वाचित स्थानीय जनप्रतिनिधिपिंसं याइगु धासें स्वनिगःया फुक्क स्थानीय तहया मेयरपिं दुथ्याका छगू अभिनन्दन समिति नं दयेकेगु प्रस्ताव तयादीगु खः ।

नागरिक अभिनन्दन समितिया अध्यक्ष लक्ष्मीदास मानन्धरया सभापतित्वय् जूगु ज्याझ्वं नागरिकअभिनन्दनया निंतिं छगू सचिवालय नं गठन याःगु खः । सचिवालयय् पद्मरत्नया व्यक्तित्व, कृतित्वलिसे सम्बन्ध दु कथं नेवाःआन्दोलन, नागरिक आन्दोलन, साहित्यक, मानवअधिकार आदिलिसे सम्बन्धित व्यक्तिपिंत सचिवालयया दुजः दयेकूगु खः । सचिवालयय् आवश्यककथं मेपिं दुजःपिं नं थप याना यंकेगु खँ धाःगु दु ।

सचिवालयया ज्याकू नेपाःब्यांक्वेट खुसिबुँइ तइगु जूगु दु । अथेहे थ्व भेला व थ्वयां न्ह्यः जूगु मेमेगु भेलाय् सहभागी जूपिं सकसितं अभिनन्दन मूल समारोह समितिया दुजः नं दयेकूगु खः । ज्याझ्वलय् नागरिक अभिनन्दनया निंतिं दयेकातःगु निर्देशन समितिया दुजःपिं जनकवि दुर्गालाल श्रेष्ठ, गायक भृगुराम श्रेष्ठ, कलाकार निर्देशक गणेश साय्मिपिंसं नं न्ववानादीगु खः ।

ज्याझ्वलय् समितिया दुजः नरेशवीर शाक्यं लसकुस यानादीगु खः ।

सम्बन्धित बुखँ

LEAVE YOUR COMMENTS