‘बेल्जियमं हे त्याकी’

ब्राजिलयात क्वार्टरफाइनलय् २–१ गोलं बुकुसें बेल्जियमं विश्वविजेता टिमयाके दयेमाःगु क्षमताया छकुचा ब्व न्ह्यब्वःगु दु । थ्व विजय लिपा बेल्जियम थुगुसीया विश्वकप विजेताया प्रवल दावेदारया रुपं न्ह्यःने वःगु दु ।

रोबेर्टो मार्टिनेजया रेड डेभिल टिमं जापान विरुद्ध निगू गोलं लिउने लायेधुंकाः नं उत्कृष्ट पुनरागमन यानाः प्रि क्वार्टरफाइनल त्याकावःगु प्यन्हु लिपा न्याक्वःतकया विश्व विजेता ब्राजिलयात थःगु इतिहासय् निक्वःखुसी पराजित याःगु खः । थ्व विजय बेल्जियमं विश्वकप त्याकेफइ ला धकाः न्ह्यसः तयाच्वनीपिं आलोचकतय् निंतिं नं बांलाःगु लिसः जूगु दु ।

बेल्जियमय् दुथ्याःपिं कासामितय्त थौंकन्हय् स्वर्णिम पुस्ताया कासामि कथं कया वयाच्वंगु दु । अथे खःसां यक्वस्यां उमिगु मानसितायात कयाः न्ह्यसः तयाच्वंगु खः । ब्राजिल विरुद्ध जीत थज्याःगु न्ह्यसःया बांलाःगु लिसः जूगु खँ इंग्ल्यान्डया पुलांम्ह रक्षक रिया फर्नान्डिजं धाःगु दु ।

‘थ्व तसकं महत्वपूर्ण लिच्वः खः’ फर्नान्डिजं धाःगु दु, ‘निदँ न्ह्यव युरो कपय् निराश याःगुलिं यक्वस्यां बेल्जियम टिमया मानसिकतायात कयाः न्ह्यसः थना वयाच्वंगु खः ।’‘थ्व स्वर्ण पुस्ताया कासामिपिंसं ब्राजिलयात बुकाः थज्याःगु आलोचनाया बांलाःगु लिसः बिउगु दु । ब्राजिल विरुद्धया कासाय् गुकथं थःपिंत बल्लाःगु टिम कथं न्ह्यब्वल उकिं आः थ्व टिमं न्ह्याम्हेसितं बुकेफु धयागु क्यंगु दु’, फर्नान्डिजं धाःगु दु ।

फर्नान्डिजया खँय् मेम्ह विख्यात कासामि जर्गन क्लिन्सम्यान नं सहमत दु । सन् १९९० य् पश्चिम जर्मनीं विश्वकप त्याकूबलय् टिमया छम्ह मुख्यम्ह कासामि क्लिन्सम्यानं धाःगु दु, ‘उमिसं गजबया स्पिरिटी क्यंगु दु । उपिं विश्वकपया यक्व सतिक थ्यनेधुंकूगु दु । रोबेर्टो मार्टिनेजं गज्जबया ज्या क्यंगु दु । ’बेल्जियमं आः फ्रान्सलिसे मंगलवाः सेमिफाइनल कासा म्हिती ।

सम्बन्धित बुखँ

LEAVE YOUR COMMENTS