सवारी निषेध छगू सकारात्मक पलाः

डेनमार्कया राजधानी कोपनहेगन शहरया छगू तसकं नांजाःगु पर्यटकीय क्षेत्र खः, स्त्रोजेन । यक्व सतकत स्वानाच्वंगु थुगु क्षेत्र १.१ किलोमिटर क्षेत्रफलय् लानाच्वंगु दु । झिंगुंगूगु शताब्दी तक रुतेन धकाः म्हसिउगु थुगु क्षेत्र कोपनहेगन शहरया नुगःचु कथं नं नांजाः । थुगु क्षेत्र शहरया छगू पुलांगु व ऐतिहासिक थाय् खः । थन सन् १६१६ निसेंया पुलांगु व ऐतिहासिक छेँखात अझ नं संरक्षण याना तयातःगु दु । थज्याःगु पुलांगु व शहरया नुगःचुइ लाःगु क्षेत्र आः पर्यटकीय क्षेत्र कथं विकसित जुइधुंकूगु दु । थुगु क्षेत्रया संरक्षण व संवद्र्धन यायेगु निंतिं अनया सम्बन्धित निकायं ल्ह्वंगु पलाः खः, सवारी निषेधित क्षेत्रया घोषणा ।

स्त्रोजेनय् सन् १९६२ नोभेम्बर १७ तारिख कुन्हु न्हापांखुसी सवारी निषेधित क्षेत्र याःगु खः । शहरया पुलांगु वस्ती दुने सवारी साधनतय् चाप अत्यधिक जुया वयेवं अन छुं ईया निंतिं अस्थायी कथं अज्याःगु व्यवस्था याःगु खः । तर लिपा सन् १९६४ निसें याःगु सवारी निषेधया ज्या थौं तक मदिक्क न्ह्यानाच्वंगु दु । सवारी निषेध घोषणा याःगु प्रारम्भिक चरणय् अनया सम्बन्धित स्थानीय व व्यापारीतय्सं विरोधया सः मथ्वयेकूगु मखु । अझ अन उगु योजना दयेकूम्ह अल्फर्ड वासार्डयात स्यायेगु तकया ख्याच्वः वःगु खः ।

अन सम्बन्धित छगू पुचलं विरोधया सः थ्वयेकूगु व योजना दयेकूम्ह मनूयात स्यायेगु तकं ख्याच्वः वःगुलिं योजना लागू जूगु न्हापांगु न्हि प्रहरी पाः च्वने माःगु तकया समस्या वःगु खः । मेखे गाडी चालकतय्सं गाडी अन हये मबिउगुलिं ताउ तक हर्न न्यायेकाः विरोध याःगु खः । अथेखःसां अनया हे आपालं स्थानीय मनूतय्सं म्यँे हालाः, प्याखं ल्हुयाः न्हूगु योजनायात लसकुस याःगु खः । विरोध व लसकुस यानाः सुरु जूगु थुगु नियमयात छुं लिपा हे यक्व मनूतय्सं सकारात्मक मिखा तयेगु यात । उगु नियम व योजना याकनं हे छगू सफलताय् थ्यन ।

अनया मनूतय्सं गाडी बिनाया सतक अझ अप्वः व्यवस्थित व फाइदाजनक जूगु अनुभव यानाहल । सीमित ईया दुने हे अनया व्यापार व्यवसाय अप्वया वनेगु नापं अन न्हूगु पसः तयेगु व नयेगु रेस्टुरेण्टत चायेकीपिनिगु ल्याः अप्वल । पर्यटकत दुहां वयेगु ज्या न्हापा स्वयां कयौं गुणा अप्वयावन । थुगु सफलता लिपा सन् १९६८, १९७३, १९९३ य् थप मेमेगु थाय्यात नं सवारी निषेधित क्षेत्र घोषणा यात । शुरु जूगु इलय् मुक्कं १५,८०० स्क्वायर मिटरं सुरु जूगु थुगु योजना थौंया इलय् वयाः १००,००० स्क्वायर मिटर क्षेत्रफलय् विस्तार जुयावंगु दु ।

आधुनिक युगय् सन् १९२९ य् जर्मनीया इसेन शहरं सवारी निषेध यानाः मनू न्यासि वनेगु सतकया योजना विकास जूगु खः । पुलांगु शहरी क्षेत्रयात संरक्षण यायेगु कथं जर्मनीया इसेनय् सुरु जूगु थुगु योजना सन् १९३० य् अनया मेगु निगू शहरय् लागू जूगु खः । निक्वःगु विश्वयुद्ध लिपा सन् १९५५ तकया दुने जर्मनीया जक नीछगू सतकय् थज्याःगु निगम लागू याःगु खः । थज्याःगु योजना विशेषतः स्वंगू मू उद्देश्य ज्वनाः सुरु जूगु खः । दकलय् न्हापांगु, अनया स्थानीय मनूतय् निंतिं सामाजिक व सांस्कृतिक ज्याझ्वः यायेगु नापं अप्वः खुल्ला थाय् व्यवस्थित यायेगु निंतिं ।

मेगु, म्हो सवारी चले जुयाः सतक जामया समस्या समाधानया निंतिं । अले स्वंगूगु, स्थानीय मनूतय् निंतिं स्वच्छ सासः ल्हायेगु व न्यासि वनेबहःगु सतक सुविधाया निंतिं । थज्याःगु उद्देश्य ज्वनाः जर्मनीं न्ह्याकूगु योजना कोपनहेगनया स्त्रोजेन, पूर्वी युरोप, अमेरिका, अफ्रिका, अष्ट्रेलिया, एसिया जुयाः आः येँया नुगःचु असनय् थ्यंकः वःगु दु । आः थन नं स्त्रोजेनय् थें गनं विरोधया सः ताये दयाच्वंगु दुसा गनं लसकुस याइपिं झ्वःछुनाः च्वनाच्वंगु दु । थन नं विशेष यानाः स्थानीय सवारी साधन दुपिं व व्यापार व्यवसाय यानाच्वंपिं छुं छुं सम्बन्धित पक्षं थःगु व्यवसाय गथे जुइगु धकाः चिउताः प्वंकाच्वंगु खनेदु ।

सम्बन्धित थासय् च्वनीपिं व व्यापार यानाच्वंपिनि निंतिं थुगु चिउताःयात झीसं मेगु कथं काये मजिउ । चिउताःयात सकारात्मक रुपं कयाः सम्बन्धित निकायं थुकिया सकारात्मक पक्षयात उला बीगु व थुकिं वय्कःपिं स्वयम्या निंतिं लाकीगु बांलाःगु लिच्वः बारे ध्वाथुइके माःगु आवश्यकता दु । व्यापार यानाच्वंपिंसं व्यापार म्हो जकं जुइगु खःला धकाः चिउताः तयेगु यानाच्वंगु दु । थज्याःगु हे चिउताः थँबहिली नं जूगु खः । तर छुं लिपा हे अनया व्यापार झन् अप्वया वंगुलिं अनया व्यापारीत सवारी निषेधया योजनापाखे हर्षित जुयाच्वंगु दु ।

थनया स्थानीय मनूत व व्यापारीतय् थज्याःगु समस्यायात ध्यानय् तयाः आः दथुया लँपाखें थुगु योजना लागू याः थें च्वं । गथे कि निचाः घःचाः दुगु सवारीयात निषेध मयायेगु, स्थानीय मनूतय् प्यचाः घःचाः दुगुयात पासया व्यवस्था यायेगु, अत्यावश्यक छुं नं कथंया सवारीयात मपनेगु, फुक्कं थाय्यात सवारी निषेध मयासे वान वेया व्यवस्था यायेगु व बहनी न्हय्ताः ई निसें सुथय् न्हय्ताः ई तक फुक्क कथंया सवारीया निर्वाधरुपं चले याके बीगु ।तर येँया नुगःचु जुयाच्वंगु ऐतिहासिक लागायात सवारी निषेध जक यायेवं थुगु थाय् पूर्ण रुपं धाःसा व्यवस्थित जुइ मखु ।

सवारी साधन निषेधित क्षेत्रय् जःखः पार्किङया सुविधा, अनियन्त्रित रुपं यानातःगु पार्किङयात पनेगु, सतकय् तया तइगु बँपसःयात चीकेगु नापं पसः कवः स्वयां पिने थःगु सामान तयाः सतकय् पंगः थनाच्वंगु ज्यात नं नियन्त्रणय् यायेमाःगु आवश्यकता दु । थन दुने च्वंगु ऐतिहासिक सम्पदा नाप नापं स्वसः दँ न्ह्यवंनिसें पसः तयाः लजगाः यानाच्वंपिं घ्यःचाकु व चिकं पसः, निसःदँ न्ह्यःनिसें संचालन जुयाच्वंगु वैद्य पसः, सछिदँ न्ह्यःनिसें न्ह्यानाच्वंगु मसला पसः नापं मेगु यक्व ऐतिहासिक स्थानीय लजगाःयात संरक्षण व संवद्र्धन यायेत सवारी निषेधया योजनां यक्व हःपावः बी ।

अथेहे अन हे छेँ दुपिं मनूतय्त अत्यधिक सवारी चापं यानाः ब्वलंकाच्वंगु थीथी समस्यायात नं पनेगु ज्या याइ । थुगु ऐतिहासिक क्षेत्रया मौलिकतायात ल्यंकेगु निंतिं स्थानीय निकायया पहलय् जूगु सवारी निषेधया योजनायात सम्बन्धित फुक्कसिनं ग्वाहालि यानाः झीगु थाय्यात जीवन्त व मौलिक रुपं म्वाका तयेत ग्वाहालि याये आवश्यक जू । थुगु क्षेत्रया संरक्षण धइगु व झीगु पहिचानया संरक्षण खः ।

सम्बन्धित बुखँ

LEAVE YOUR COMMENTS