प्रदेश नां बारे जनजातिया ख्याच्वः

येँ – प्रदेश नम्बर ४ या नां स्थानीय पहिचान खने मदइ कथं तयेत्यंगु खँय् थीथी आदिवासी जनजाति संस्थातय्सं मंकाः रुपं विरोध याःगु दु ।
उगु प्रदेशया पहिचान व सभ्यता पिब्वइ कथं अनया नां ‘तमुवान–मगरात’ तयेमाः धकाः ताः ई न्ह्यवंनिसें माग जुया वयाच्वंगु खःसां आः प्रदेशया नां ‘गण्डकी प्रदेश’ तयेगु तयारी जुयाच्वंगु खँय् थःपिनि ध्यानाकर्षण जूगु दु धासें यदि अज्याःगु नां तल धाःसा देशय् हानं मेगु द्वन्द्व सिर्जना जुइगु ख्याच्वः नं उगु संस्थातय्सं बिउगु दु ।

मंकाः वक्तव्यय् धयातःगु दु, ‘पहिचानया मूलभूत सिद्धान्तयात ल्वःमंकाः प्रदेश सरकार न्ह्याः वन धाःसा देश व जनताया लागिं गम्भीर ऐतिहासिक भूल जुइ ।’

अंक गणितया दम्भय् जनभावना अःखः ज्या यानाः उकियापाखें छुं बांमलाःगु लिच्वः पिहां वल धाःसा उकिया सम्पूर्ण दोषी प्रदेश सरकार व संसद हे जुइ धकाः नं धयातःगु दु ।

वक्तव्यय् नेपाल आदिवासी जनजाति महासंघया नायः जगत बराम, तमु ह्युल छोंज धीं गुरुङ राष्ट्रिय परिषद्या नायः रेशम गुरुङ, नेपाल मगर संघया नायः नवीन रोका मगर, नेवाः देय् दबूया नायः नरेश ताम्रकार, नेपाल तामाङ घेदुङया नायः मोहन गोले तामाङ, किरात याक्थुङ चुम्लुङया नायः योगराज वनेम लिम्बु व नेपाल शेर्पा संघया वरिष्ठ न्वकु लाक्पा शेर्पां हस्ताक्षर यानातःगु दु ।

सम्बन्धित बुखँ

LEAVE YOUR COMMENTS