बैंकयात मुद्दा तयाः धर्ना बीगु

येँ -भुखाचं पीडित स्वनिगःया जनतां थःपिंसं त्यासा काःगु बैंक व नेपाल राष्ट्र बैंकयात मुद्दा तयेगु तयारी यानाच्वंगु दु । लिसें बैंकतय् विरुद्ध न्ह्याकेत्यंगु आन्दोलनया न्हापांगु चरण कथं आः वइगु आइतवाः भुखाचं पीडिततय्सं स्थानीय जनतां राष्ट्र बैंक न्ह्यःने धर्ना बीगु तयारी नं यानाच्वंगु दु ।

राष्ट्र बैंकं मौखिक निर्देशन जारी यासें बैंकतय्त पुनर्कर्जा निदँया निंतिं जक बीगु धकाः धाःगुलिं आः बैंकतय्सं नं भुखाचं पीडिततय्त निदँया जक पुनर्कर्जा बीगु व वयां लिपा बैंकया ब्याज सरह ब्याज कायेगु खँ धायेवं भुखाचं पीडितत थप पीडाय् लाःगु खः ।

सरकारं झिदँया निंतिं २ प्रतिशत ब्याजं बिउगु त्यासा आः निदँया निंतिं जक बीगु जुइवं थःपिंसं उगु त्यासा पुले मफइगु खँ भुखाचं पीडित रुपक क्षेत्रीं ‘नेपालभाषा टाइम्स’ यात कनादिल । भुखाचय् लानाः पीडित जूपिंसं थःथिति व पासा भाइपिंके भचा भचा ध्यबा त्याय् कयाः मगाःगु ध्यबा बैंकय् त्यासा कयाः छेँ दनेगु ज्या न्ह्याकूगु खः । अज्याःपिंसं आः राष्ट्र बैंकं धाः थें ब्याज पुले मफइगु अवस्था वयाच्वंगु खँ धाःगु दु ।

पीडित क्षेत्रीं धयादी, ‘२५ लाखया किस्ता जिं आः २३ हजार पुलाच्वनागु दु । यदि बैंक सरह ब्याज पुले माल धाःसा ४६ हजार पुले माली । उलिमछि पुलेगु जिगु क्षमता मदु ।’

वय्कःया कथं राष्ट्र बैंकया निर्णय कथं थःपिंत उकिया भ्वं बीत इनाप यानागु खःसां नं बैंकं अज्याःगु भ्वं वा स्टेटमेन्ट तकं बीत आलताल यानाच्वंगु खँ नं वय्कलं कनादिल ।मेखे नां कने चाहे मजूम्ह यलया छगू बैंकया मैनेजरं राष्ट्र बैंकया हुनिं स्थानीय पीडित जनताया छेँबुँ हे लिलाम यायेमालीगु अवस्था वयाच्वंगु खँ कनादिल ।

थज्याःगु हे खँयात कयाः आः पीडिततय्सं सरकारया थ्व नीति विरुद्ध अदालतय् मुद्दा तयेगु तयारी यानाच्वंगु खँ धाःगु दु । सरकारं न्हापा झिदँया निंतिं २ प्रतिशत ब्याजं त्यासा बी धाःसां आः निदँ जक धाःगु धइगु थःपिंत अन्याय याःगु खः धासें उगु रिट तयेत्यंगु खः । लिसें आः न्हापांगु चरणया आन्दोलन कथं राष्ट्र बैंक न्ह्यःने धर्ना बीत्यंगु खः । यदि उलि यानाः नं थःपिनि समस्याया सुनुवाई मजुल धाःसा वयां लिपा चरणवद्ध रुपं मेमेगु ज्याझ्वःत नं याना वने मालीगु खँ पीडिततय्सं धाःगु दु ।

सम्बन्धित बुखँ

LEAVE YOUR COMMENTS