कन्हय‍्निसें क्वार्टरफाइनल कासा

मंगलवाः चान्हय् इंग्ल्यान्ड व कोलम्बिया दथुया कासा क्वचायेवं थुगुसीया विश्वकपया निंतिं क्वार्टरफाइनलय् वनीगु टिमया ल्यज्या नं क्वचाःगु दु । आः क्वार्टरफाइनलय् फ्रान्स, बेल्जियम, क्रोसिया, उरुग्वे, ब्राजिल, स्वीडेन, रसिया व इंग्ल्यान्ड थ्यंगु दु । थुपिं मध्ये खुगू युरोपेली टिम दुसा निगू दक्षिण अमेरिकी टिम दु ।

क्वार्टरफाइनल तक थ्यंबलय् दावेदार धयातःगु तःगू टिमत धेंधेंबल्लाखं पिने लाःवंगु दु । दकलय् न्हापां डिफेन्डिङ च्याम्पियन जर्मनी समूह चरणं हे लिहां वनसा विश्वया उत्कृष्ट कासामि मेसी व रोनाल्डो दुगु अर्जेन्टिना व पोर्चुगलं नं क्वार्टरफाइनलया यात्रा यायेमफुत । अथेहे सन २०१० या विश्वबिजेता स्पेन नं ग्वसाः देय रसिया पाखें टाइब्रेकरय् बुनाः प्रिक्वार्टरफाइनलं हे लिहां वनेमाल ।

थुगुसी क्वार्टरफाइनलय् थ्यंगु न्हापांगु टिम फ्रान्स जुल । अर्जेन्टिनायात ४–३ गोलं बुकाः फ्रान्स क्वार्टरफाइनल थ्यंगु खः । थ्व कासाय् निगुलिं टिमं यानाः मुक्कं च्याक्वः तक जक गोल पोस्टया सहि दिशाय् आक्रमण जूगु खःसा उकी मध्ये न्हय्क्व ला गोल हे जूगु खः । छगू इलय् अग्रता कायेधुंकूगु अर्जेन्टिनायात बुकेत १९ दँया केलियन एमबाप्पे नायक जुल ।

लुइस स्वारेज व इन्डिभन काभानीया उत्कृष्ट तालमेल जुइवं उरुग्वे पोर्चुगलयात २–१ गोलं बुकाः क्वार्टरफाइनलय् दुहां वंगु खः । थ्व कासाय् काभानीं स्वारेजया पासय् निगू गोल याःगु खः । उरुग्वें सन् १९३० लिपा विश्वकपय् झ्वःलाक्क प्यंगू कासा त्याकेफुगु थ्व हे न्हापांखुसी खः ।

पोर्चुगल विरुद्धया कासाय् नायक जूम्ह काभानी धाःसा थ्व हे कासाय् चोटग्रस्त जुयाः फ्रान्स लिसे जुइगु क्वार्टरफाइनलय् म्हिते फइ मफइ धायेमफुनि । ब्राजिलय् जूगु विश्वकपय् समूह चरणं हे पिहां वनेमाःगु रसिया धाःसा थुगुसी दावेदार स्पेनयात टाइब्रेकरय् बुकाः क्वार्टरफाइनलय् यंगु दु ।

सोभियत युनियनं छुटे जुइधुंकाः रसिया न्हापांखुसी विश्वकपया क्वार्टरफाइनलय् थ्यंगु खः । ट्राइब्रेकरया अन्तिम पेनाल्टिइ आसपासं थ्वाःगु बल रसियन गोलकिपर एकिनफिवं उत्कृष्ट बचाव यायेवं स्पेन लिहां वनेमाःगु खः । डेनमार्कयात बुकाः क्रोसिया १९९८ लिपा क्वार्टरफाइनल थ्यंगु खः ।

डेनमार्कया निंतिं एरिक्सनं थ्वाःगु न्हापांगु पेनाल्टि हे क्रोसियाया गोलकिपर सुबासिकं पंगु खः । क्रोसियां क्वार्टरफाइनलय् रसियानाप म्हिती । मेक्सिकोयात बुकाः ब्राजिल लगातार न्हय्क्वःखुसी विश्वकपया क्वार्टरफाइनलय् दुहां वंगु खः । मेक्सिकों धाःसा लगातार न्हय्क्वःखुसी हे प्रिक्वार्टरफाइनलय् हे छेँ लिहां वनेगुयात निरन्तरता बिल ।

थ्व टिम सन् १९९४ निसें प्रिक्वार्टरफाइनलय् थहां वनेफुगु मदुनि । विश्वया उत्कृष्ट कासामि मेसी व रोनाल्डों थःगु टिमयात क्वार्टरफाइनलय् थ्यंकेमफुबलय् नेयमार ब्राजिलयात क्वाटरफाइनलय् थ्यंकूगु दु । मेक्सिको विरुद्ध न्हापांगु गोल याःम्ह नेयमारं मेगु गोल यायेत नं पास मिले यानाबिउगु खः ।

मेखे निगू गोलं लिउने लायेधुंकाः नं उत्कृष्ट पुनरागमन यानाः जापानयात ३–२ गोलं बुकाः बेल्जियम क्वार्टरफाइनलय् थ्यंगु दु । बेल्जियम थ्वयां न्ह्यव विश्वकपय् आःतक क्वार्टरफाइनलय् थ्यंगु मदुनि । समूह चरणय् नं फुक्क कासा त्याकावःगु बेल्जियमं आः क्वार्टरफाइनलय् ब्राजिलया सामना याइ ।

स्वीट्जरल्यान्डयात १–० गोलं बुकाः स्वीडेन क्वार्टरफाइनलय् दुहां वंगु खः । सन् १९९४ लिपा क्वार्टरफाइनलय् थ्यंकेमफुनिगु स्वीडेन दक्षिण अफ्रिका व ब्राजिलय् जूगु विश्वकपय् छनोट तकं जुइमफुगु खः ।

मेखे कोलम्बियात बुकाः क्वार्टरफाइनलय् दुहां वंगु इंग्ल्यान्डं धाःसा न्हापांखुसी विश्वकपय् ट्राइबेकरय् कासा त्याकूगु खः । इंग्ल्यान्ड सन् २००६ य् जूगु विश्वकप लिपा न्हापांखुसी क्वार्टरफाइनलय् थ्यंगु खः । ब्राजिलय् जूगु विश्वकपय् इंग्ल्यान्ड समूह चरणं हे छेँय् लिहां वंगु खः ।
क्वार्टरफाइनल कासा शुक्रवाः व शनिवाः जुइ ।

सम्बन्धित बुखँ

LEAVE YOUR COMMENTS